ድርቅ በየተወሰነ ዓመቱ እየተከሰተ አገራችንን ለከፋ ጉዳት እየዳረገ የሚገኝ የተፈጥሮ አደጋ ነው፡፡ ይህን የተፈጥሮ ክስተት የሚያባብስ የሠው ልጅ ተግባር የመኖሩን ያህል፣ ጉዳቱን ለመቀነስ የሚደረግ ተግባር ደግሞ አናሳ መሆኑ ይነገራል፡፡ መፍትሔ የሚባሉ ዕርምጃዎችን ለማከናወን በመጀመሪያ የውኃ ዑደቱን ማወቅ ግድ ይላል፡፡ ከተፈጥሮ ዑደቱ ጋር በማስተያየት ስለአገራችን የውኃ አጠቃቀም ሠፊ እውቀት ያላቸው፣ በደንና ዕጽዋት ላይም ለበርካታ ዓመታት ጥናት ያካሔዱትና ያሠለጠኑት ደቻሳ ጅሩ ይህን ጽሑፍ እነሆ ብለዋል፡፡
ዕጽዋትና እንስሳት የተፈጥሮ ፋብሪካዎች ናቸው። አንድ፤ ሠው ሠራሽ ፋብሪካ ለመገንባትም ሆነ ከተገነባም በኋላ በዋናነትና ቀጣይነት ምርት ለማምረት ግብዓት እንደሚያስፈልገው ኹሉ፡ ለሠው ልጅም ከጽንስ እሰከ ልደትና ከዚያም እሰከ ቅድመ-ዕለተሞት ለአካል ግንባታ፣ እንዲሁም ለኃይል ምንጭ፣ ለበሽታ መከላከያ፡ ለጥገናና ለመራባት የማይቋረጥ ግብዓት ያስፈልገዋል። እነዚህም ግብዓቶች በሙቀት፣ በአየር፣ በምግብ፣ በመጠጥና በመድኃኒት መልክ ወደ ሠውነት ይገባሉ። ምግብ ማለት የተለያዩ ማዕድናት ናቸው። ውኃ ከመሬት የተለያዩ ማዕድናትን ስለያዘ አንድ ዓይነት ግብዓት ብቻ ሆኖ ለሰው ልጅ በተግባር መጠጥ፣ ምግብና መድኃኒት(ጸበል)ም ጭምር ነው።
ይህ ጽሑፍ ዓላማው በጎ ባህላዊ ተሞክሮ ላይ ተመሥርቶ ዘመናዊ ሳይንስን ሠግሥጎ በምርምር ጥናት ተፈትሸው በአብዛኛው ተጠቃሚና በአቅራቢው በተወሰነ ደረጃ የተከወኑትን በመምረጥ የተቀናጀ የቴክኖሎጂ ግኝቶችን በስፋት ወደመሬት አውርዶ በተግባር ማሰራጨትን ታሳቢ ያደረገ ነው። በተጨማሪ ሙያው ከሚመለከታቸውና ልምዱና ፍላጎቱ ካለቸው ጋር የተዘጋጁትን የተበታተኑ ግኝቶችን አካቶ በጋራ የውይይት መድረክ በመክፈት በተለይ በውኃና ተጓዳኝ የተፈጥሮ ሃብት ልማት የሐሳብ ፍጭት እንዲኖር የመነሻ አስተዋጽኦ ለማደረግ የታለመ ነው።
በአገራችን ደጋው 6፣ ወይናደጋው 28 እና ቆላው 66 ከመቶ የቆዳ ሽፋን የያዘ ሲሆን፣ በየምድቡ የተካተቱት ወንዞች፣ ድንበር ለቀው በሚወጡ ጊዜ በቁጥር አስራ አንድ ብቻ ናቸው። እያንዳንዱ የዳር አገር ወንዞች(ጅረቶች) ከዳር አገር ዝቀተኛ ቦታ ወደ ከፍተኛው ተራራ ጫፍ በተዘለቀ ቁጥር፣ ልክ እንደ ዛፍ ግንድ እየተከፋፈሉ፣ በቁጥር እየበዙ፣ በመጠን እያነሱ ከላይ እንደተገለጸው ከግንዱ(ከጅረቱ) ጀምሮ እንደሚያድግ ዛፍ ቅርንጫፉን እንደሚያበዛው በአስራ አንድ ዛፍ በምሳሌነት ለማሳየት ሥነ-አሰረጫጫቱን ግንዛቤ ማስጨበጥ ይቻላል። እያንዳንዱ ጅረት ልብ ጋር እንዳለ እንደ አንድ የደም ሥር ከግንዱ በራቀ ቁጥር እየተከፈለ እንደሚበዛ አድርገን ማሠብ ይቻላል። እነኛ ምሳሌዎች የሠው ጥበብ ሳይሆን ፈጣሪ ሳይጠበብ ሳይጨነቅ የሠራቸው መሆኑን ውስጤ ያምናል።
ተፈጥሮን በቁጥጥር ሥር እናደርጋለን የምንለው የ60ዎቹ ዘመን የተፈጥሮ ሳይንስ ተመራማሪዎችና ወጣቱ ትውልድ፣ ፈጣሪ ሕዝባዊና ዲሞክራሲያዊ አይደለም የሚል ጥድፈትን አማክሎ በተንጠለጠለ መጤ አገነዛዘብ፣ ለብዙኃን ቅንጣት፣ ለጥቂቱ የተትረፈረፈ ውኃና መሬት በጥቂት ሠዎች መያዙን በመቃወም፣ ኹሉን እኩል ለማድረግ የመሬት ላራሹ መፈክር አንገበን ያካሄድነው ትግል ራሱን የቻለ ምስክር ነው። ይህ አካሄድ ባህላዊ ዕውቀትን ያገለለና የገደለ መሆኑ ሊሠመርበት ይገባል።
የኢትዮጵያ የመሬት ከፍታን የሚያሳይ ካርታ ላይ ላዩን ስንመለከት፣ ኢ-ፍትሐዊ የወንዝ መጠን ይስተዋላል። በጥልቀት ስንገነዘበው ውኃው አንሶ በሙቀት ተኖ እንዳያልቅ ከመድረቅ የታደገበትን ድንቅና ረቂቅ ጥበቡን ከወንዞቹ መመጋገብ (ማበር) እንረዳለን። የመጀመሪያው ማሳያ ብዙ ምንጮች ወደ ጋራ ከዚያም መካከለኛ ቁጥር ያለቸው ገባር ወደ እጅግ ጥቂት ጅረቶች ተመጋግበው ወይም አብረው ገዳዩን የበረሃ ሙቀት በኅብረት አሸንፈው ለአገር፣ ለአኅጉርና ለዓለም መብቀታቸውን ነው። በሠው የተሳሳተ አጠባበቅ ይህ በረከት ወደ ዕጥረት፣ እሱም አልበቃ ብሎ በበጋ ደርቆ በክረምት በመጉረፍ ከልማት ውኃ ወደ ጥፋት ውኃ መለውጡ ዓለም ያወቀው ፀሐይ የሞቀውና ብርድ የመታው ወቅታዊ አስደንጋጭ ክስተት መሆኑን እያየን ነው።
ትንሽ ውኃ እንደ መርፌ ትወጋ /በተለያየ አቅጣጫ የውኃ ወሳኝ ሚና ዳሰሳ/
ዘመናዊው ሠው “የኔ ውኃ” ይላል። በአገርና በፖለቲካ ድንበር የተደናበረም፤ “የኛ ውኃ” ነው ቢልም፣ የኔ ከማለት ዕምብዛም ልዩነት የለውም። በአገራችን ባህል ማኅበረሠቡ የኔ ወይም የእኛም ሳይል የእግዜር ውኃ በማለት ለተጠማው ኹሉ ያጠጣል።
በዘመናዊ ትምህርት ስለፖለቲካና ስለተፈጥሮ ወሠን ወይም ድንበር ስንማር የተራራን ጫፍና ወንዝን የተፈጥሮ ድንበር ናቸው ብለው ሲነግሩን ተቀብለናል። እንደእኔ አገነዛዘብ ወንዝ ከፋፋይ ሳይሆን አገናኝ ነው። ከፋፋይ ቢሆንማ ኖሮ የጎረቤት አገር ሱዳን፣ ግብጽና ብራዚልን የመሳሰሉ ወንዝ መሀላቸው አቋርጦ የሚያልፍ እያንዳንዳቸው ኹለት ኹለት አገር በሆኑ ነበር። የሱዳን አከፋፈል በሰሜንና በደቡብ አቅጣጫ በመሆኑ ዓባይን በከፋፋይነት አያስጠይቀውም። በዓባይ ምክንያት ከተለያዩ የምሥራቅና የምዕራብ ሱዳን ነበር የሚባሉት። ምክንያቱም ዓባይ የሚፈሠው ከደቡብ ወደ ሰሜን በመሆኑ።
አንድ ወቅት በቴሌቪዥን ለጣሊያናዊቷ ሴት ጠፈርተኛ ቃለ-መጠይቅ ሲደረግ ‹‹ጠፈር ላይ በቆየሽ ጊዜ ከኹለም የናፈቅሽው (ያጣሽው) ምንድነው ስትባል፤ በውኃ መታጠብ(ሻዎር)›› ነበር መልስዋ።
በተጨማሪ፣ ሌላ በወሬ ወሬ የሠማሁት አንድ የአሜሪካ ወታደር በሳዑዲ አረቢያ የበረሃ ተልኮ ላይ በነበረበት ጊዜ የማትረሳው (ያጣኸው) በጎ ነገር ምንድን ነው? ሲባል መልሱ ‹‹ከአፍሪካ የውኃ ማማ እየመጣ የሚቀርብልን የአንቦ ውሃ(ጠበል) ነው›› አለ ይባላል።
በቀጥታም ሆነ በተዘዋዋሪ በገንዘብ ለማትተካው የተፈጥሮ በረከት ለሆነው ውኃ ተገቢውን ቦታ እንድንሠጠው፣ ክብርና እንክብካቤ እንድናደርግለት አስወድዶ ያስገድደናል። የዓለም አማካኝ የአንድ ሠው የውኃ ፍጆታ 4 ሊትር እንደሆነና በየቀኑ የምንበላው ምግብ የተጠቀመው የውኃ መጠን 2000 ሊትር መሆኑን ሌስተር አር በራዎን ‹‹የኹለተኛው የዓለም ዕቅድ›› መጽሐፍ ደራሲ በ2009 እ.አ.አ. ገልጾልናል። ይኸውም ከሚጠጣው የዓለም አማካይ ጋር ሲነጻጸር 500 ዕጥፍ እንደሚበልጥ ነው። ነገሩን ማመን አቅቶኝ ወደ አገርኛ በማዞር ጥናትና ምርምር ውስጥ ገበሁ። በቀን የምንበላው 3 እንጀራ 400 ግራም መመዘኑን፣ ከዚያም ይህ ከአማካይ የአገር ምርት አኳያ ሲሰላ በአንድ ሜትር ካሬ ያደገ ሆኖ እናገኘዋለን። በአንድ ክረምት በአንድ ካሬ ሜትር የሚዘንበው ዝናብ ደግሞ 1200ሊትር ነው። የአትክልቱ፣ የሥጋው(ከብቱ የጋጠው የ4 ክረምት የግጦሹ የውኃ ፍጆታ-ምክንያቱም ከብት ለዕርድ ለመድረስ 4 ዓመት ይፈጅበታልና)። ሌሎችም ተጨማምረው ሲጠቃለል የአገራችን የውኃ ፍጆታ ከዓለም አማካይ ጋር የሚመጠጠን ሆኖ ተገኝቷል።
ማጠቃለያው
ይህን ሁሉ የውኃ ፍጆታ ፈጣሪ የሚያሙዋላው ከውቅያኖስ በሚያመጣው የውኃ ዑደት ነው። አዘዋዋሪው የኃይል ምንጭ የፀሐይ ሙቀት በመሆኑ የውኃ ትነት በንፋስ አጓጓዥነት፣ በቀን ከፍ ባለ ቁጥር አየር ውስጥ ሲቀዘቅዝና በተለይ ሌሊት ደመናው ወደ ፈሳሽ ተለውጦ ይዘንባል። በዋናነት መሬት ውስጥ አግቢው የሳር ሽፋን ሲሆን አንደ ጋሻ መክቶ መሬት ላይ እንዳይወድቅና ከመሬትም ውስጥም በሥሩ ስቦ በማውጣት አትናኙ ቋሚ ተክል የሆነው ዛፍ ነው። ለማስረዳት ያህል የመረብ ኳስ ተጫዋቾችን በኹለት የሥራ መደብ ከፍሎ ማሳየት ይቻላል። ዛፍ፣ ኳሱ (ውኃው) መሬት እንደይወድቅ መከላከልና ከመሬት አንስቶ (በሥሩ መጦ) አየር ላይ ማዋል ነው። ቅጠል ላይ ያረፈው ሆነ ከሥር ተመጦ የመጣው በመትነን በየቀኑ ደመናን ማቀም(ይበልጥ ዳምኖ እንዲዘንብ ማድረግ ነው)። ወደ ዝርዝር ተግባሩ ስንገባ፣ የዛፉ ቅጠል እንደ ጣት ቅርንጨፉም እንደ ክንድ(እጅ) ሲያገለግል፣ ሳር እጅግ ጥቂት ብቻ በመመከት አብዛኛውን ዘሎ በኃይል ቀብሮ እንደሚመታ ተጫዋች ክልል ውስጥ አሳርፎ ጎል ማስቆጠር ነው። ይህ ማለት መሬት(ሳር) ላይ ያረፈው ኳስ (ውኃ) በቀጥታ በአብዛኛው መሬት ውስጥ ገብቶ አፈሩን በማራስ በከረስምድር ተከማችቶ ምንጮችን በቀጣይነት ይመግባል። መረቡን ግን የተራራ ሠንሰለት አድርገን መውሠድ እንችላለን።
ከላይ እንደተገለጸው የሳር ሽፋን በሚገባ መኖር በተለይ ተራራማ በሆነ ምድር ውኃን በማጎልበቱ እጅግ ከፍተኛ ሚዛን ይደፋል። ይህ የአርብቶ-አደር እንከን የለሽና ከተፈጥሮ ወስደው ሥራ ላይ ያዋሉት አዟዙሮ የማስጋጥ የበጎ ልማዳቸው መገለጫ ነው። ቴክኖሎጂ የአርሶ አደሩን ልማድ ሠብሮ ለከፍተኛ ድርቅ ሰለባ እንድንሆን ያደረገ አኅጉራዊና አገራዊ ችግር ነው። በደረቅ አከባቢ ደኑ እጅግ በጣም ሳሰቶ የሳር ሽፋኑን ፈጣሪ ያበዛው፣ ሳር ውኃን ለጥቂት ወር ብቻ ተጠቅሞ በበጋው በመድረቅ እጅግ በጣም ቆጠቦ የወንዝ ፍሰትን ቀጣይ ያደርጋል። ዛፍ ግን እንደ ገንዘብ አባካኝ ሠው መርጨትና ማባከን ነው ዋና ተግባሩ። ማጠንጠኛው፤ ማባከኑም ሆነ ማጠራቀሙም ሚዛናቸውን ጠብቀው መከወን ትክክለኛውና ጤናማ የውኃ ዑደት(ዝውውር)ን አረጋጋጭ ነው። ይህ የድርቅ ጉዳይ፣ ያለ ምንም ቅድመ ኹኔታ የውይይት አገራዊ መድረክ ተከፍቶለት አጠባበቁ ላይ ዕርምት መደረግ ያለበት በመሆኑ ለሥነ-ምህዳሩ በአንክሮና በጥድፍያ ትኩረት መሥጠት የግድ ይላል።
የጽሑፍን አዘጋጅ ደቻሳ ጅሩን በ [email protected]
ኢሜል አድራሻቸው ማግኘት ይችላሉ።
ቅጽ 4 ቁጥር 175 መጋቢት 3 2014



