የማዕድንና ነዳጅ ሀብትን ለማሳደግ ሦስት ተቋማት ተፈራረሙ

Views: 467

የማዕድንና ነዳጅ ሚኒስቴር፣ የሳይንስና ከፍተኛ ትምህርት ሚኒስቴር እና የፌደራል ቴክኒክና ሙያ ትምህርትና ስልጠና ኢንስቲትዩት የማዕድንና ነዳጅ ልማትን ለማፋጠን የሚያስችል የሦስትዮሽ ስምምነት ሰነድ ተፈራረሙ።
ስምምነቱ የማዕድንና ነዳጅ ዘርፍን በሳይንስ፣ በጥናትና ምርምር መደገፍ ለሀገራችን ሁለንተናዊ እድገት ከፍተኛ አስተዋጽኦ እንደሚያበረክት ታምኖበታል።
ተቋማቱ የማዕድንና ነዳጅ ሀብቶችን በአግባቡ ለመጠቀምና ዓለም ዓቀፋዊ ተወዳዳሪነቱን ከፍ ለማድረግ በዘርፉ የሰለጠነ እና ብቁ የሰው ኃይል ለማፍራት፣ የዘርፉን ስርዓተ ትምህርት በመቅረጽ ትምህርትና ስልጠና የሚሰጥባቸው የትምህርት ክፍሎችን በተመረጡ የከፍተኛ ትምህርትና የቴክኒክና ሙያ ስልጠና ተቋማት ስር መክፈት እንዳለባቸው ተስማምተዋል።
የማዕድንና ነዳጅ ሚኒስትር ሳሙኤል ኡርቃቶ(ዶ/ር)፣ የማዕድንና ነዳጅ ልማትን ለማፋጠን የሚረዱ የምርምርና የማሰልጠኛ ተቋማትን በየደረጃው ለሚደረገው የሰው ኃብት ልማት፣ አቅም ግንባታ ስልጠና እና ለሰልጣኞች በዘርፉ ኢንዱስትሪዎች የተግባር ልምምድ የሚያገኙበትን ሁኔታ የማመቻቸት፣ በዘርፉ በተሰማሩ ኢንዱስትሪዎች የልምድ ልውውጥና የስራ ትብብርን የመፍጠር፣ ከተቋማቱ ጋር በቅንጅት ይሰራል ብለዋል።
የትምህርት ሚኒስትር ሂሩት ወልደማርያም(ፕ/ር) በበኩላቸው የዘርፉን የሰለጠነ የሰው ኃይል ለማፍራት የሚያስችል ስርዓተ ትምህርት ማዕቀፍ የማዘጋጀት፣ የሚከፈቱ ትምህርትና ስልጠና ክፍሎች በሳይንስ ጥናትና ምርምር እንዲጎለብቱ ስልት የመንደፍ ተግባራትን እንደሚያከናውን ገልፀዋል።
የቴክኒክና ሙያ ስልጠና ኢንስቲትዩት ዋና ዳይሬክተር ተሻለ በሬቻ በማዕድንና ነዳጅ ዘርፍ ለሚከፈቱ የትምህርትና ስልጠና ክፍሎች ፕሮግራም የመቅረጽ፣ የዘርፉን ባለሙያዎች በስልጠና የማብቃት፣ የልህቀት ማዕከላትን በማቋቋምና የምርምር ስራዎችን እና የተገኙ ውጤቶችን ለተጠቃሚዎች የማድረስ፣ በዘርፉ የተሰማሩ ኩባንያዎች እና ኢንዱስትሪዎች መካከል የስራ ትብብር እንዲፈጠር እና የሚዘጋጁ ስልጠናዎች፣ አውደ ጥናቶች፣ ሴሚናሮችና መሰል ሁነቶችን የማስተናገድ ስራዎችን ተቋማቸው እንደሚያከናውን ተገልጿል።

ቅጽ 2 ቁጥር 83 ግንቦት 29 2012

Comments: 0

Your email address will not be published. Required fields are marked with *

This site is protected by wp-copyrightpro.com