በትግራይ ክልል የተካሄው ወታደራዊ ትርኢት ለምን አስፈለገ?

Views: 198

‹‹በወጣቶች የደም ግብር ታጅቦ የሰልጣን ዘመንን የማራዘሙ የህውሃቶች እኩይ ተግባር ነው።›› ፈንቅል

ከሰሞኑ ከወደ ትግራይ ክልል፤ መሃል አገር በታላቁ የሕዳሴ ግድብ የውሃ ሙሊትን በመመርኮዝ ‹‹ድምጻችን ለግድባችን›› በሚል መሪ ቃል አዲስ አበባ እና ሌሎች ኢትዮጵያ ክፍሎች አገር በተደሰተበት ወቅት አንድ ጉዳይ እየተካሔደ ነበር። ጉዳዩም በርካታ ክልሉ ልዩ ኃይል አባላት እና የሚሊሻ አባላት ወታደራዊ ሰልፍን ሲያካሒዱ እና ወታደራዊው ትዕይንትም ሲደምቅ በመገናኛ ብዙኀን ሲተላለፍም ለመመልከት ተችሏል።

በዚህም ወቅት ታዲያ ከግራም ከቀኝም በድርጊቱ ታላላቅ ትችቶች በተለይም ደግሞ ዓለምን ረግጦ በሚያስጨንቅበት የኮሮና መዓት ውስጥ ትግራይ ከየት ባመጣችው ድፍረት እና መረጋጋት ነው እንዲህ ለጠጠር መጣያ ስፍራ በታጣበት መልኩ በአንድ ላይ በተከማቸ እና በተጠጋጋ መልኩ በአንድ እግር ኳስ ሜዳ ላይ ታድመው መመልከት ትችቱ አንደኛው ምክንያት ነው።

በሌላ በኩል ደግሞ አንድ ክልል የሚያስመርቀውም ሆነ ወራሪ ኃይል ሳያጋጥመው እንዲህ ያለ እጅግ የሠለጠነ መሣሪያ ይዘው በአደባባይ ወታደራዊ ሰለፍን ማካሔድ አንደምታው ምንድነው ? በቀጣይስ እንዴት አይነት አካሔድ እና አሰራር ሊከተል ይችላል? የሚሉ ጥያቄዎችን የሚያነሱ ያሉ ሲሆን እንዲህ አይነት ወታደራዊ ሰልፍ ትርዒት በዋናነት የአምባገነኖች መለያ ነው ሲሉም ይስተዋልሉ።

አዲስ ማለዳም በትግራይ ክልል መናገሻ መቐለ ከተማ የተካሔደውን ወታደራዊ ሰልፍ በሚመለከት በክልሉ የሚንቀሳቀሱ እና በሕወሓት አመራር ዙሪያ ያለንን ቅሬታ በንቅናቄ እንፈታዋለን በሚል የሚንቀሳቀሱትን የፈንቅል አባላትን እና ሌሎች በክልሉ የሚንቀሳቀሱ የፖለቲካ ፓርቲዎችን አስተያየት በማካተት ለንባብ አብቅታለች። በዚህም ረገድ ፈንቅል የወጣቶችን ደም በማፍሰስ እና ለጦርነት እና ለከፍተኛ ችግር በመዳረግ የስልጣን ዘመንን በማራዘም ማምሻም ዕድሜ ነውን ከሕወሓት ወገን እየተዘመረ የሚገኝ አካሔድ ነው ሲል ፤ ሕወሓት በበኩሉም የተካሔደው ወታደራዊ ትዕይንት በክልሉ ውስጥ ታየውን ኮቪድ 19 ወረርሽን በሚመለከት በሕዝቡ ዘንድ ግንዛቤ ለመፍተር መሆኑን በማንሳትም ይሞግታል።

‹‹በትግራይ ክልል ኹለት መንግሥት ነው ያለው። በፌደራል መንግሥቱ የሚታወቀው የደብረጽዮን ገብረማርያም (ዶ/ር) ክልላዊ መንግሥት እና በሌብነት ሥልጣናቸውን ተቀምተው የተሸሸጉ ባላንጣዎች ናቸው›› የሚለው ፈንቅል፡- ከዕውቅና ውጪ ለሆነው መንግሥት የልብ ልብ የሰጠው ፤የመንግሥት ከፍተኛ መዘናጋት አሁንም በትረ ሥልጣኑን ለመያዝ ምርጫ እንዳላቸው እንዲያልሙ አድርጓቸዋል የሚሉት የፈንቅል አባል የሆኑት በላይ ብስራት ለአዲስ ማለዳ በመናገር ይጀምራሉ።
አክለውም ወታደራዊ ሰልፉም እንዲካሄድ ያደረገው ኹለተኛው መንግሥት እንደሆነ ፈንቅል ያውቃል ይላሉ። ‹‹ነገር ግን ይሄ ከበቂ በላይ የከሰረ እና በዚህ ዘመን ወታደራዊ ሰልፍ ማሳየት እነስበሃት ነጋ፣ ጌታቸው አሰፋ እና ጌታቸው ረዳ የሚመሩትም ነው። እየሄዱበት ያለው መንገድ አዋጪ ሆኖ ስላላገኙት ምርጫ ብለው ነበር። እንደማይሆን በመረዳት፤ ሥልጠና ሳይሰጣቸው አና ወታደራዊ ልምምድ ሳይኖራቸው ወጣቶችን በግድ መሣርያ አስታጥቀው ነው ያቀረቡዋቸው።›› ብለዋል።
በላይ በዚህ ላይ አክለው ‹‹ያንን የቀድሞ ማን አለብኝነት ተጠናውቶት በደም ግብር ታጅቦ እዚህ የደረሰው ህውሃት ገና ከ1960ዎቹ አንስቶ የተጀመረው የሥልጣን ጥማቱ ዛሬም የለቀቀው አይመስልም። እና በሌላ የደም ግብር ዳግም ወደ ሥልጣን ለመውጣት እየተንጠላጠለ ይገኛል።›› ሲሉ በላይ ይገልፃሉ።

‹‹ሕወሓት የትግራይ ህዝብ በደል እና ጭቆና እረፍት አልሰጠኝም›› በሚል ነበር ነፍጥ አንግቦ ጫካ የገባው፤ ታዲያ 17 ዓመታትን በሙሉ በትጥቅ ትግል ጫካ ያቆየው ትግል ከሌሎች ግንባሮች ጋር አቅም እንዲያገኝ እድል ሆነለት። እናም በምሥራቅ አፍሪካ ተወዳዳሪ የለውም የተባለውን ወታደራዊውን የደርግ ስርዓት እንዲጥል አደረገው ።

ከእዚህ ባለፈ በደርግ ስርዓት ውስጥ የነበረው መናከስ እና መበጣጠስ ለሕወሓት ጥርጊያውን አመቻችቶለታል። በደርግ ዘመነ መንግሥት በወታደራዊ ቤት ውስጥ የነበረውን ሽኩቻ እና መተራመስ ለመረዳት የ1981 የመፈንቅለ መንግሥት ሙከራ እና ፕሬዝዳንት ኮሮኔል መንግሥቱ ኃይለማርያምን ለመጣል የተሞከረው እንቅስቃሴ ይታወሳል። ያንን እንቅስቃሴ ተከትሎ ከመፈንቅለ መንግሥቱ ክሽፈት በኋላ በወቅቱ የነበሩት ከፍተኛ የጦር ጀነራሎች እና የመፈንቅለ መንግሥቱን ሴራ ተብትባችኋል የተባሉት መኮንኖች ግድያ ትልቅ ማሳያ ሆኖ እናገኛለን።

ሕወሓት ግን ዛሬም ያን ብርቱ ወታደራዊ ኃይል በአንዲት ጀንበር በሙሉ አቅሙ እንደረታው እና እንደጣለው ሲፎክር መክረሙ የሚዘነጋ አይደለም።
17 ዓመታትን ነፍጥ አንግቦ ጫካ ያከረማቸው ሩጫ ከደርግ ስልጣን መውደቅ ማግስት የመሪነት መንበሩን አቆናጠጣቸው። የሥልጣን ጥማቸውን እንዳይቆርጡ ያደረጋቸው ዋናው ሙስና እና የእርስ በእርስ መበላላት ስልጣን ላይ ከመጡ አስር ዓመታት በኋላ በ1993 ክፍፍል ውስጥ እንዲገቡ አድርጓቸው። ቀላል የማይባሉ የሕወሓት ታጋዮች ወደ ወህኒ እንዲሽቀነጠሩ አድርጓቸው ነበር ይለሉ በላይ።

በአገር ውስጥም የሥልጣን ዘመናቸውን እድሜ ለማራዘም ያልተወጣ ዳገት ያልተወረደ ቁልቅለት ሆነ ያልተቧጠጠ ጋራ እንዳልነበር ለመረዳት በቂ ማሳያ ሆነው የምንገኛቸው በርካታ ማመሳከሪያዎች አሉ።

በአገር ውስጥ በርካታ ብርቱ ፖለቲከኞችን፤ የሰብአዊ መብት ታጋይና ጋዜጠኞችን እስከማሰር የነበረው ሂደት በሥልጣን እየነበረ የሚጠቀመው ዋነው ቴክኒክ ነበር ብለዋል። የ1997ቱ ምርጫ መጭበርበር እና እሱን ተከትሎ በመንግሥት ወታደራዊ ኃይሎች የተወሰደው እና ንፁሃንን በሜዳ ጥሎ ደመ ከልብ ያደረጋቸው ክስተት ሕወሓት ለሥልጣን የነበረውን ጥማት እና ለእዚህ የሥልጣን ጥማት ደሞ የትኛውም እርምጃ ለመውሰድ እንደሚገደድ አሳይቷል።

የመወዳደሪያ ሜዳውን ካፀዳ በኋላ ‹‹በ2002ቱ እና በ2007ቱ ምርጫ በዓለም ታሪክ ታይቶ በማይታወቅ መልኩ ሙሉ የፓርላማ ወንበር አሸንፍኩ ብሎ ሲኩራራ ከከረመ በኋላ ነበር ከ2008 አንስቶ የነበረው ማዕበል ገፍቶ ገፍቶ ካበቃ በኋላ የቀድሞው ጠቅላይ ሚኒስትር ሃይለማርያም ደሳለኝ ስልጣን ይብቃኝ ብለው እንዲነሱ ያደረጋቸውን ክስተት የተፈጠረው።

ከእዚህ ጊዜ በኋላ በመጋቢት ወር 2010 ላይ የአሁን መሪ ጠቅላይ ሚኒስትር ዐቢይ አህመድ (ዶ/ር) እንዲመጡ ሆነ። የጠቅላይ ሚኒስትር ዐቢይ አህመድ ወደ ስልጣን መምጣት ሕወሓቶችን እፎይ ብሎ የሚያስቀምጣቸው ሳይሆን ያለ እንቅልፍ እንዲማስኑ ያደረጋቸው ሲገፋም ወደ መቀሌ ገብተው እንዲሸሸጉ ያደረገበትን አጋጣሚ ተፈጠረ።

በእዛም ሆነው መተኛት አልሆነላቸውም። እና በቻሉት አቅም እጃቸውን እያሰረዘሙ ከመሃል አገር እስከ ተለያዩ ክልሎች የብሔር አንዳንዴ ደግሞ የሃይማኖት መልክ የሚይዙ ጥቃቶች እና አለመረጋጋቶች እንዲከሰቱ ሲያደርጉ ለመቆየታቸው በርካታ ማመሳከሪያዎች አሉ።

የሰሞንኛው እንቅስቃሴ ከእዚህ የተለየ ነገር እንደሌለ ነው የነገረንም ሲሉ የፈንቅል አባል ያነሳለ፡፡ ለትግራይ ሕዝብ መመለስ የሚገባቸው መሠረታዊ ጥያቄዎች እያሉ፤ በክልሉ ነፃ የሆነ አውድ ባልተፈጠረበት እና ከላይ እስከ ታች በአፈና ውስጥ በሚገኝ ህዝብ ላይ የጦርነት ነጋሪት መጎሰም ምን የሚሉት እንደሆነ ለመረዳት አታካች ነው የሚሉት ደግሞ የብልፅግና አባል የሆኑት ዶ/ር አብርሃም በላይ ናቸው ።

ቁጥራቸው ቀላል የማይባሉ ወጣቶች ወደ ወታደራዊ ሥልጠና ገብተው ይህን ሥልጠና እንዲወስዱ ከተደረገ በኋላ በእዚህ ጊዜ ለአገር አንድነት መቆም ሲገባ ያን የመሰለ ወታደራዊ ትርኢት ማሳየቱ ለምን አስፈለገ?

አንዱ ማሳያ ህውሃት ዳግሞ ወደ ስልጣን ለመምጣት ያለውን ቁርጠኝነት ለማሳየት ብዙ ሳንናገር ብዙ የሚነግሩን ተግባራት ናቸው። በአስር ሺዎች የሚቆጠሩ ወጣቶች በተሳተፉበት በእዚህ ወታደራዊ ትርኢት ላይ የልዩ ኃይልና የሚሊሻ አባላቱ መሣሪያዎችን ታጥቀው ታይተዋል።

በክልሉ መቀለ ከተማ ላይ ከታየው ከእዚህ አስገራሚ ወታደራዊ ትርኢት ባለፈ በልሉ ሌሎች ከተሞችም ላይ መሰሉ ትርኢት እንደተካሄደ ተናግረዋል።
የክልሉ መንግሥት ይህን ወታደራዊ ትርኢት እና ሰልፍ ማድረግ ለምን እንዳስፈለገ? በግልፅ ስለ ሰልፉ የተናገረው ነገር የለም፤ የትግራይ ክልል የጸጥታ ቢሮ ፌስቡክ ገጹ ላይ ግን “ለሰላም ሲባል ለሚከፈል ዋጋ ሁሌም ዝግጁ ነን” የሚል መልዕክት አስፍሯል። ቢሮው አክሎም “የአንድ ሕዝብ የሰላሙ ዋስትና ውስጣዊ አቅሙ እንጂ የማንም የውጭ ኃይል ድጋፍና ጥበቃ ሆኖ አያውቅም” ብሎ ያሰፈረውን ለመመልከት አዲስ ማለዳ ችላለች ከዚ ጋር በተያያዘ ያነጋገርናቸው የትግራይ ኮሚውኒኬሽን ሊያ ካሳ ለሌላ ጊዜ ቀጠሮ ሰጥተውናል።

ከሳምንታት በፊት የትግራይ ክልል ርዕሰ መስተዳድር ደብረፂዮን ገብረሚካኤል ‹‹በሌላ ጉዳይ ላይ ለመነጋገር እንችላለን፤ በመብታችን ላይ በተለይ ደግሞ የራስን ዕድል በራስ የመወሰን መብታችን ላይ በተመለከተ ግን መደራደር አንችልም››፤ ይህ ቀይ መስመር ነው። ከዚህ በታች የሆኑ ብዙ ነገሮች ሊኖሩ ይችላሉ። ሲሉ አንስተው ነበር።

ደብረፂሆን ሲናገሩ “ይህን ኣምጣ ይህን ልሰጥህ” ልትል የምትችልበት። በዚህ ጉዳይ ላይ ግን ሰጥቶ መቀበል ብሎ ነገር የለም። ምርጫ መሰረታዊና ትልቅ ነገር ነው። ዋናው ነገር የራስን ዕድል በራስ የመወሰን መብት ነው። ያለፈው የትግል ውጤት አስጠብቆ የመሄድና ቀጣዩን የማስተካከል ጉዳይ ነው። ምክንያቱም ያለፈውን አስጠብቀን ነው ቀጣዩን ማስተካከል የምንችለው። በትግራይ እጅግ በጣም የተደራረበ ብዙ ጫና ነው ያለው።

እያልን ያለነው ግን ለምንም ጫና አንበገርም ነው። ምንም ዓይነት ጫና አይበግረንም። ጊዜ ተጣበበብን ብለንም አንጨናነቅም። ሁላችንም ተጋግዘን ልንሻገረው እንችላለን። ምርጫችን በእጃችን ነው። መብታችንም በእጃችን ነው። የመመከቱ ነገርም እንደዚሁ በእጃችን ነው። ማሟላት ያለብንን ነገር ግን ማሟላት ኣለብን። ለዚህም ጎን ለጎንም ዝግጅት ማድረግም ጀምረናል።”

የፈንቅል አባል የሆኑት በላይ ብስራት እንዳነሱት ደግሞ ምን አልባት ሕወሓት ከዚህ ቀደም በተናገረው መሰረት እየሄ መሆኑን የሚሳይልን ነው ብለውናል።
ከትላንቱ ወታደራዊ ሰልፍ ጀርባ ያሉት ዕውነታዎችን ሲያነሱ መለስ የአደባባይ ሚስጥሮች ከሆኑት መካከል የክልሉ መንግሥት በእዚህ አለመረጋጋት እና አመቺ አጋጣሚ ተንጠላጥሎ የሥልጣን ዘመኑን ለማራዘም ቁርጠኛ ሆኖ መገኘቱን እና ሌላኛው ደግሞ በሀገሪቱ ውስጥ በአንድም ይሁን በሌላ የሚከሰቱ ትርምሶች እና የመንግሥት ዝምታ የልብ ልብ መስጠቱ ተጨምሮ አለመረጋጋቶች ሕወሓት በሚፈልገው ልክ ውጤት እያመጡ ባለመሆናቸውን ዳግሞ አገርን የሚያውክ እና ስጋት ውስጥ የሚከት ነገር ለመፍጠር ከመጓጓት የመነጨ ሊሆን እንደሚችል ወታደራዊ ትርኢቱ ፍንትው አድርጎ ማሳያ መሆኑን ነው ፈንቅል የሚያምነው ብለዋል።

ሦስተኛው እና በስተመጨረሻ የሚቀመጠው ጉዳይ በኮሮና ቫይረስ ሳቢያ ከአገር አልፎ ዓለም እንደዚህ የማያባራ ክስረት እና አለመረጋጋት ውስጥ እያለች እነዛን ሁሉ በአስር ሺዎች የሚቆጠሩ ወታደሮችን በአንድ ስፍራ አጭቆ ማሳየቱ የክልሉ መንግሥት ከግል ጥቁሙ ከሚመነጨው ፍላጎት ሌላ አርቆ የሚያስበው ጉዳይ እንደሌለ ዋነኛ ማሳያ እንደሆነ ነው የጠቆሙት።

በጥቅሉ ሕወሓት ዳግም በደም ግብር ታጅባ ወደ አራት ኪሎ የሚያደርሳትን ጥርጊያ ለማመቻት ያለውን ሁሉ ኃይል አሟጦ እንደሚጠቀም እሱ ባይሆን በክልሉ ዘለዓለማዊ የሥልጣን ዘመኑን አራዝሞ ለእዛም የሚሆነውን ማስተማመኛ ለመያዝ ያለውን ቁርጠኝነት ያየንበት እንቅስቃሴ ነው ብለዋል።

ይህ በደም ግብር ታጅቦ ስልጣንን የማራዘሙ ህልም ‹‹ሕወሓቶች ከጥንት እስከ አሁን ከአርባ ዓመታት በተሻገረ ጊዜ ውስጥ ያልተለወጡበት እና ተጣብቀው የቀሩበት እንደሆነ ለመረዳት ሌላ ነጋሪ አያሻም የትላንቱ ወታደራዊ ትርኢት ብቻወን ብዙ ተናጋሪ ነው›› ይላሉ መሰለ።

ድጋሚ ነፍጥ አንግቦ አንደ ከዚህ ቀደም መሣርያ ይዞ መውጣት ኋላ ቀር አስተሳሰብ እና ሕወሓት አሁንም ካለፈው ስህተት መማር እንዳልፈለገ ከፍተኛ ማሳያ ነው የሚሉት ደግሞ የትግራይ ብልፅግና ፓርቲ አባል የሆኑት ዶ/ር አብረሃም እንደዚህ አይነት እንቅስቃሴዎች እንመራዋለን ለሚሉት ሕዝብ አለማሰባቸው የሚሳነው። ‹‹አሁን ባለንበት ወቅት ሁሉንም እንቅስቃሴ ሰላም በተሞላበት መንገድ ማከናወን እና መጨረስ በሚቻልበት ሁኔታ መሳሪያ ይዞ መውጣት ካረጀ መንግሥት ነው ሚጠበቀው›› ብለዋል። ሕዝቡም ሰላም የሚፈልግ ከሆነ እነርሱን መቃውም ነው የሚጠበቅበት ብለዋል።

ይሄ ጊዜ በተወሰነ አካላት ፍላጎት እና ለአንዳንዶች ጥቅም ሲባል መሰዋዕትነት የሚከፈልበት ጊዜ አይደለም። ሕዝቡ ሊነቃ ይገባል ብለዋል። እርሳቸው እንደሚሉት ‹‹ሕዝቡን ለማወናበድ ሲሉ የሚያነሱት አሃዳዊ የሚለውን ነው›› ነገር ግን አሀዳዊ መንግሥት በኢትዮጵያ ላይመለስ ሄዷል። ለዛ ሐሳብ የሚሠራም ጊዜ የሚያጠፋም የለም ብለዋል። ይሄን ሐሳብ ለማራመድ የሚያስብ አካል ካለም ራሱ አሃዳዊነትን ያሰበው ጊዜ ነው የወደቀው በማለት ዶ/ር አብርሃም ለአዲስ ማለዳ ተናግረዋል።

ቅጽ 2 ቁጥር 92 ነሐሴ 2 2012

Comments: 0

Your email address will not be published. Required fields are marked with *

This site is protected by wp-copyrightpro.com