3 ሺህ የከተማ አውቶብሶች ግዢ ሊፈጸም ነው

Views: 74

የአዲስ አበባ ከተማ አስተዳደር ለ2013 በጀት አመት አገልግሎት የሚሰጡ ከ 3ሺኅ በላይ የከተማ አውቶብሶችን 9 ቢሊዮን ብር የሚጠጋ በመመደብ ግዢ እያካሔደ እንደሆነ አንበሳ የከተማ ትራንስፖርት አገልግሎት ድርጅት አስታወቀ።

ከተመሰረተ 75 ዓመታትን ያስቆጠረው ድርጅት በከተማው እየተስተዋለ ያለውን የትራንስፖርት ችግር ለመቅረፍ ይረዳ ዘንድ እያንዳንዳቸው 3 ሚሊዮን የሚጠጋ ብር ዋጋ የሚያወጡ አውቶብሶችን ከቢሾፍቱ አውቶሞቲቭ ኢንጅነሪንግ ግዢ እየፈፀመ መሆኑን መላኩ ካሳ ደስታ የአንበሳ ከተማ አውቶብስ አገልግሎት ድርጅት የብዙሃን ትራንስፖርት ስምሪት ቁጥጥር ዋና የስራ ሂደት መሪ ለአዲስ ማለዳ ገልፀዋል።

አገልግሎት ሰጪ ድርጅቱም 3 ሺህ ለሚጠጉ የከተማ አውቶብሶች ግዢ ተፈፅሞ ወደ ስራ ሲገቡ አሁን አገልግሎት እየሰጡ ያሉ አውቶብሶችን ቁጥር በአራት እጥፍ ከማሳደጉም ባሻገር የትራንስፖርት ችግር በከፍተኛ መጠን ይፈታዋል ተብሎ እንደሚጠበቅ ተገልጿል።

ግዢ እየተፈፀመባቸው የሚገኙት አውቶብሶች መቼ እንደሚረከቡ ያላወቁት መላኩ አሁን በከተማው አገልግሎት በመስጠት ላይ የሚገኙት 725 የከተማ አውቶብሶች መካከል ግን 52 የሚሆኑ አውቶብሶች ብልሽት ገጥሟቸው ጥገና የሚፈልጉ መሆናቸውን አንስተዋል። ድርጅቱ ከዚህ ቀደም ረጅም ዓመታትን በስራ ላይ አሳልፈው ሰፊ አገልግሎት የሰጡ አውቶብሶችን ለሌላ ጥቅማ በማዋል በአዲስ አበባ የተለያዩ ስፍራዎች ላይ የሸገር ዳቦ መሸጫ ሱቆች እንዲሆኑ ማድረጉ የሚታወስ ነው።

ግዢ የተፈፀመባቸውን አውቶቢሶች አገልግሎት ላይ ከማዋል ባለፈ በተለያዩ ምክንያት አገልግሎት መስጠት ያቆሙትንም አውቶብሶችን በፍጥነት በመጠገን ወደ ስራ እንዲገቡ ለማድገም ታስቧል ብለዋል።

እርሳቸው እንዳሉት ከሆነ ጥገና ከሚፈልጉት 52 አውቶብሶች በብልሽት ምክንያት የቆሙ መሆኑን አንስተው 22 የሚሆኑት ውጫዊ አካል (የቦዲ ) መስተካከል የሚያስፈልጋቸው ሲሆን የተቀሩት 30ዎቹ ደግሞ የሞተር (መካኒካል) ጥገና እና መለዋወጫ የሚፈልጉ መሆኑን ተመላክቷል።

ነገር ግን ይላሉ የኦፕሬሽን ኃላፊው ይህንን ስራ ለመስራ ስንወጣ ከሚገጥሙን እና እንዲስተካከልልን ከምንፈልገው ጉዳይ አንዱ መንገድ ነው ብለዋል።
የትራፊክ መጨናነቁ እና በተለይ በአውቶቢስ መጫኛ እና መውረጃ ስፍራዎች (ፌርማታዎች ) አካባቢ በሌሎች ተሸከርካሪዎች እየተያዙብን ለአገልግሎት ተቸግረናል በዚህም ምክንያት ስራችንም ተስተጓጉሎብናል በማለት መላኩ ይገልፃሉ ።

ለአብነትም ከ‹‹ ከሰበታ መርካቶ›› የሚሄድበት መንገድ ከፍተኛ የሆነ መጨናነቅ ስላለበት 12 ሰዓት ላይ የሚነሳ አውቶብስ መዳረሻው ቦታ ለመድረስ ከ3 ሰዓታት እና ከዚያም በላይ አንደሚወስድበት ጠቁመዋል።

የመንገድ መጨናነቁን ለመቅረፍ በከተማው በሚገኙ ኹለት እና ሦስት ቦታዎች ላይ የተወሰኑ ጅማሬዎች መኖራቸው ያነሱት መላኩ እሱም ቢሆን፤ በሰዓታት የተገደበ በመሆኑ ዘላቂነት ያለው አቅጣጫ ባለመሆኑ አሁንም ቢሆን ለስራ ሂደቱ ቅልጥፍና እንቅፋት መሆኑን ገልፀዋል ። ከጀርመን አደባባይ -ሜክሲኮ የሚወስደው መንገድ ከ ጠዋት 12 ሰዓት አስከ 6 ሰዓት ያለው የዳረኛው መንገድ ለህዝብ ማመላለሻ መኪኖች የተሰጠ ቢሆንም ከዚያ በኋላ ባለው ሰዓት ግን መልሶ ወደ ነበረበት ስለሚመለሱ ውጤት አልባ ያደርገዋል ብለዋል ።

የመጫኛ (terminal) ቦታ ችግርም ሌላው በድርጅቱ የስምሪት አገልግሎቱን ፈታኝ ያደረገባቸው መሆኑን የስምሪት ኀላፊው መላኩ ለአዲስ ማለዳ ተናግረዋል።
አንበሳ የከተማ አውቶቢስ አገልግሎት ድርጅት አገልግሎቱን የጀመረው 1945 ሲሆን በአሁኑ ወቅት 4500 የሚጠጉ ሰራተኞችን በስሩ አያስተዳደረ ይገኛል።ስምሪቶቹንም ገርጂ ከሚገኘው ከዋናው መስሪያቤት ውጪ ቃሊቲ፣ ሸጎሌ፣ መካኒሳ ( ዴፖ) ወይም የስምሪት ቦታዎች አሉት።

ቅጽ 2 ቁጥር 97 መስከረም 2 2012

Comments: 0

Your email address will not be published. Required fields are marked with *

This site is protected by wp-copyrightpro.com