‹‹ለኮሮና ቫይረስ መከላከያ ኬሚካል ርጭት ላልተፈለገ ወጪ ዳርጎናል›› አሽከርካሪዎች

Views: 47

የአማራ ክልል የሚገኙ አሽከርካሪዎች ለኮሮና መከላከያ የሚረጨው ኬሚካል ክፍያ የሚስጠይቅ በመሆኑ እና ክፍያውም ተደጋጋሚ በመሆኑ ተቸግረናል ሲሉ አሽከርካሪዎች ገለፁ።

የኬሚካል ርጭት በስፋት እየተደረገባቸው ከሚገኙ የኢትዮጲያ ክፍሎች መካከል የአማራ ክልል ይጠቀሳል ፤ ከዚሁ ጋር በተያያዘ በአማራ ክልል የሚገኙ አሽከርካሪዎች ጤና ሚኒስቴር ኮቪድ 19 ለመከላከል በሚል ካወጣው ትዕዛዝ ውስጥ ሆኖ ሳለ ግለሰብ ወደ ንግድ መለወጡ ትክክል አይደለም ሲሉ ለአዲስ ማለዳ ተናግረዋል።

በክልሉ ለኮቪድ 19 መከላከያ እንዲያግዝ የሚረጨው ኬሚካል የግዴታ ገንዘብ የሚጠየቅበት በመሆኑ ላልተፈለገ ወጪ ከመዳረጋችን ባሻገር የሚጠየቀውን ገንዘብ በተደጋጋሚ የምንመላለስበት ቦታ እንደመሆኑ ተደጋጋሚ መሆኑ ደግሞ ከባድ ያደርገዋል ሲሉ ይገልፃሉ።

አሽከርካሪዎች በተጨማሪነት ሲያነሱ የአማራ ክልል ጤና ቢሮ ለኮሮና ቫይረስ መከላከያ የሚሆነውን የኬሚካል ርጭት እንዲደረግ ካደረገ በኋላ ገንዘብ እንድንከፍል ግዴታ ውስጥ መክተቱ
ተገቢ አይደለም ሲሉ የአማራ ክልል የጤና ቢሮን ወቅሰዋል።

አሽከርካሪዎቹ እንዳሉት ከሆነ ጤና ሚኒስቴር አስገዳጅ ሆኖ ለተሸከርካሪዎች ከቦታ ቦታ ሲንቀሳቀሱ የኬሚካል ርጭቱ እንዲደረግ ያዘዘ ቢሆንም አሁን ላይ ግን ከ20 ብርእስከ 50 ብር የሚደርስ የገንዘብ መጠን እያስከፈሉ ርጭቱን እንድናደርግ አስገድደውናል ብለዋል። ከዛም ባለፈ ርጭት አናደርግም የሚሉትም አካላት በአስገዳጅ ሁኔታ ገንዘብ ከፍለው እንዲያልፉ እየተደረገ እንደሚገኝ አሽከርካሪዎች ተናግረዋል።

ከዚህ ጉዳይ ጋር በተያያዘ አዲስ ማለዳ ያነጋገረቻቸው የአማራ ክልል ጤና ቢሮ ኃላፊ በበኩላቸው በአለም አቀፍ ደረጃ የተዛመተው የኮሮና ቫይረስ ወረርሽኝ በኢትዮጲያም በስፋት እየተዛመተ መምጣቱን ተከትሎ በርካታ የቅድመ ጥንቃቄ እርምጃዎች እየተወሰዱ ይገኛሉ ብለዋል።

የቫይረሱን ስርጭት ለመከላከል እየተወሰዱ ከሚገኝ የመፍትሔ እርምጃዎች መካከል በተለያየ መንገድ የሚደረጉት የኬሚካል ርጭት ተግባራት ተጠቃሽ ናቸው። ከዛም ባለፈ የጤና ቢሮ ሃላፊው እንዳነሱት ከሆነ ‹‹ ሚኒስቴር አስገዳጅ ሆኖ ከተላለፈ ትዕዛዝ ውስጥ ማስክ ማድረግ አስገዳጅ ቢሆንም መንግስት አይደለም ወጪውን የሚፈፅመው መንግስት ገዝቶ አያከፋፍልም ይሄም ልክ እንደዛ ነው›› ብለዋል።

ከኮሮና ቫይረስ መከላከል ጋር ክልላችን ከፍተኛ ስራ እየሰራ ይገኛል ያሉት ኃላፊው ያም ሆኖ ግን ተሸከርካሪዎቻቸውን አስከፍለው ነገር ግን በኬሚካል ርጭት እንዲፀዳ የማያስደርጉ አካላት ላይ ክትትል እንደሚደረግ ተናግረዋል።

በኢትዮጲያ የኮሮና ቫይረስ ስርጭት በስፋት ከተስተዋለባቸው ክልሎች መካከል የአማራ ክልል እንደሚገኝበት ቁጥራዊ መረጃዎች አመላካች ሆነው እናገኛለን።

ከቀናት በፊት የኮሮና ቫይረስ ወረርሽኝን ለመከላከልና ለመቆጣጣር በወጣ መመሪያ ዙሪያ የጤና ሚኒስትር ዶ/ር ሊያ ታደሰ እና የኢትዮጵያ የህብረተሰብ ጤና ኢንስቲትዩት ዳይሬተር ዶ/ር ኤባ አባተ ጋዜጣዊ መግለጫ ሰጥተው ነበር። ምንም እንኳን የኮሮና ቫይረስ ወረርሽኝ ተዛማችነት በኢትዮጲያ እየጨመረ ቢሆንም እስካሁን በሽታውን ለመካላከልና ለመቆጣጠር በወሰድናቸው እርምጃዎች ከፍተኛ የሆነ ማህበራዊና ኢኮሚያዊ ጫና በመድረሱ እና ወረርሺኙ ከኛ ጋር ላልተወሰነ ጊዜ የሚቆይ ከመሆኑ አንጻር በአስቸኳይ ጊዜ አዋጅ ተጥለው የነበሩ ክልከላዎችና ግዴታዎች በተወሰነ መልኩ እንዲነሱ ተደርገዋል ሲሉ ማሳወቃቸው የሚታወስ ነው።

ይህ እንዳለ ሆኖ፤ የተቋማት እና ማህበረሰብ የእለት ተዕለት እንቅስቃሴ ሲቀጥል ቀድሞ በነበረው ሁኔታ ሳይሆን አሁንም ትልቅ የህብረተሰብ ስጋት የሆነውን የኮቪድ-19 መከላከልን ታሳቢ ባደረገና ህብረተሰቡን በማያጋልጥ መልኩ ማከናወን ይጠይቃል ሲሉ አሳውቀው ነበር።

Comments: 0

Your email address will not be published. Required fields are marked with *

This site is protected by wp-copyrightpro.com