የመስከረም 25ቱ ጉዳይ!?

Views: 47

ሰሞነኛ መነጋገሪያ ከሆኑት ጉዳዮች መካከል ከመስከረም 25 ቀጥሎ የሚውለው ቀን ምንድን ነው የሚል ይገኝበታል። በኢትዮጵያ የፖለቲካ ቱማታ ሰበብ ጸሐይ ተፈጥሮዋን ሳታዛንፍ እንደ ልማዷ በምስራቅ ትውጣለች ወይንስ ባልተለመደ መልኩ በተለየ አቅጣጫ በኩል የሚለው ውስጠ ወይራ ሙግቶች እና እንካ ሰላንቲያዎች በማኅበራዊ ትስስር መድረኮች ተሟሙቀው ነበር።

በአንድ በኩል የለውጥ ኀይል የሚባለውና በጠቅላይ ሚኒስትር ዐቢይ የሚመረራው መንግሥት ከመስከረም 25 በኋላ ሕጋዊ ቅቡልነት ስለማይኖረው ኢትዮጵያ መንግሥት አልባ አገር ትሆናለች። በመሆኑም መከላከያው፣ ፖሊስና የደህንነት መዋሩ ከመስከረም 25 በኋላ በዐቢይ አይመራም፤ የሚታዘዝ ጀነራልም ሆነ ወታደር አይኖርም በማለት ሕወሓት፣ አንዳንድ የኦሮሞ ፖለቲካ ድርጅቶች፣ ጃዋርና ልደቱ የሚያቀነቅኑት ሐሳብ አየሩን ሞልቶት ከርሟል።

መስከረም 25 ደግሞ ከእስር ቤት አንድ ወሬ ተሰማ። ጀዋር መሐመድ፣ በቀለ ገርባ፣ ሀምዛ አዳነ እና ሸምሰዲን ጣሃ ለፌደራል ማረሚያ ቤቶች የቃሊቲ ማረሚያ ቤቶች አስተዳደር ጽሕፈት ቤት “ከእስር ስለመለቀቅ ይመለከታል” በሚል ርዕስ ደብዳቤ ጽፈዋል። የደብዳቤው ጭብጥ ላለፉት አምስት ዓመታት ኢትዮጵያን ሲያስተዳድር የነበረው መንግሥት የሥራ ዘመኑ ያበቃ ስለሆነ ማረሚያ ቤቱ ከእስር እንዲለቃቸው እና ከዕለቱ ጀምሮ በሚመሰረተው የአደራ መንግሥት ውስጥ ተሳታፊ እንዲሆኑ የሚማጸን ነበር።

በርግጥ ተማጽኖው ከማኅበራዊ መድረኮች ፍዝ ጫጫታ አልፎ ምንም ተጽዕኖ ያሳደረ አይመስልም፤ የተለወጠ ነገር አልታየምና!

በሌላ በኩል ደግሞ ጸሐይ ተፈጥሮዋን አትለውጥም መስከረም 25 በምስራቅ ወጥታለች፤ መስከረም 26ም ዑደቷን ሳይዛነፍ በምስራቅ ትወጣለች፤ ከመስረረም 25 ቀጥሎ ያለው ቀን ማክሰኞ፣ መስከረም 26 ነው በሚሉ አቅላይ አንዳንዴም ፈገግታ አጫሪ ንግግሮች ከላይኞቹ በተቃራኒ የፖለቲካ መስመር ከተሰለፉት ወገኖች ተንጸባርቋል። እርግጥ ነው! የጸጥታ አስከባሪዎች በአዲስ አበባ አውራ ጎዳናዎች ላይ ሊፈጠር ይችላል ለተባለ ምላሽ በተጠንቀቅ ነበሩ፤ አሁንም አሉ። የተለየ የተፈጠረ ግን እስካሁን ምንም ነገር አልታየም።

በርግጥ መስከረም 26 የፈዴሬሽን ምክር ቤት አንድ ውሳኔ ማሳለፉ ተሰምቷል፤ የፌደራል መንግሥቱ ከትግራይ ክልል መንግሥት ጋር ምንም ዓይንት ግንኙነት እንዳያደርግ አስተላልፏል የሚል። ውሳኔው ነሐሴ 30/2012 ምክር ቤቱ በትግራይ የሚካሄደው ምርጫ እንዳልተደረገ፣ እንዳልተፈጸመና እንደማይጸና ያሳለፈውን ውሳኔ ተከትሎ መሆኑም አብሮ ገልጿል። በዚህ መሰረት የፌደራል መንግሥት ከትግራይ መንግሥት ምክር ቤት እና ከፍተኛ የሕግ አስፈፃሚ አካላት ጋር ግንኙነት አይኖረውም። ይሁንና የትግራይ ሕዝብን መሰረታዊ ፍላጎቶችን መሰረት በማድረግ የከተማና የቀበሌ አስተዳደሮችን ጨምሮ ሕጋዊ ተቋማት ጋር ብቻ ግንኙነት እንደሚኖረውም ውሳኔው ያትታል።

ይሁንና አንዳንዶች የምክር ቤቱ ውሳኔ ቁርጠኝነት የሚጎድለው፣ ፈራ ተባ ያለ ነው ሲሉ ተችተዋል። ሕወሓትን አቅም ለማሳጣት ወይም ለማዳከም ስለድርጅቱ ሕገ ወጥነት ቀጥተኛ መልዕክት ለሕዝቡ ማስተላለፍን ቅድሚያ ሊሰጠው ይገባ ነበር ሲሉም አክለዋል።

ይህ በእንዲህ እንዳለ መቀመጫውን አዲስ አበባ ላይ ያደረገውና ራሱን የፌደራሊስት ኀይሎች በሚል የሚጠራው ቡድን የትግራይ ክልል መንግሥንና ሕወሓት እንዳወገዘ ተሰምቷል። በሌላ በኩል ደግሞ ኢዜማ “ከመስከረም 25/2013 በኋላ መንግሥት የለም፣ ሕዝብና የመንግሥት መዋቅር ለፌደራል እና የክልል መንግሥታት ሊታዘዙ አይገባም” በማለት ቅስቀሳ እያደረጉ ያሉ አካላት ላይ መንግሥት በንቃት እየተከታተለ አደጋ ከመድረሱ በፊት ሕጋዊ እርምጃ እንዲወስድ በመግለጫው አሳስቧል።

የሆነው ሆኖ መስከረም 25 አፏል፣ መስከረም 26ም እንዲሁ። አንዳንዶች በኢትዮጵያ ውስጥ ብቸኛ ሕጋዊ መንግሥት የትግራይ ክልል መንግሥት ነው ሲሉም ተደምጠዋል። በትግራይና በፌደራል መንግሥታት መካከል ያለው ግብግብ አገራዊ አደጋ ለማንዣበቡ ማሳያ አድርገው የወሰዱት ሌሎች፥ ስጋታቸስን ከመግለጽ አልተቆጠቡም።

እስካሁን የተፈራው አልደረሰም በማለት የመንግሥትን ቅድመ ጥንቃቄ ማድረጉን በማድነቅ የሕዝብን ደህንነትና ሰላም ቅድሚያ በመስጠት የትግራይንም ጉዳይ በማያዳግም መልኩ መፍታት ይገባዋል የሚሉ ወገኖችም ድምጽ በመካከል ላይ ተደምጧል። ይህ የማይሆን ከሆነ ግን ለኢትዮጵያ ሰላምና ደህንነት ስጋት በመደቀን የአገሪቱን ህልውና ፈተና ላይ መጣሉ አይቀርም ሲሉ ደምድመዋል።

Comments: 0

Your email address will not be published. Required fields are marked with *

This site is protected by wp-copyrightpro.com