የእለት ዜና

ቤተ ክህነት በንፁኃን ዜጎች ላይ የተፈጸመውን ግድያ አወገዘች

Views: 458

የኢትዮጵያ ኦርቶዶክስ ተዋሕዶ ቤተ ክርስቲያን ቤተ ክህነት በምዕራብ ወለጋ ጥቅምት 22 / 2013 በንፁኃን ዜጎች ላይ የተፈጸመውን ግድያ አወገዘች።
ፓትርያርክ ብፁዕ ወቅዱስ አቡነ ማትያስ ለመገናኛ ብዙኃን በሰጡት መግለጫ ምንም ዓይነት የፖለቲካ አመለካከት የሌላቸውን ንፁኃን መግደል ነውር ነው ብለዋል። ቅዱስ ሲኖዶስ 39ነኛ ዓመታዊ ጉባዔውን እያካሄደ ባለበት ወቅት ጭካኔ የተመላበትን ድርጊት መፈጸሙ እንደተሰማ አስታውሰው በደቡብ ክልል ቤንች ሸኮ ዞን ጉራፈርዳ ወረዳና በቤኒሻንጉል ጉሙዝ ክልል በንፁኃን ላይ የተፈጸመው ግድያ ሌላ ሐዘን መጨመሩ ቤተ ክርስቲያኗን እጅግ ያሳዘነ ድርጊት በመሆኑ ሊወገዝ የሚገባው መሆኑን አስታውቀዋል።

እንደ እግዚአብሔር ሐሳብ ሁሉም የዚህ ዓለም እንግዳ መሆኑን በመገንዘብ ተከባብሮ በወንድማማችነትና በአንድነት በፍቅር መኖር እንዳለበትም መልዕክታቸውን አስተላልፈዋል።

በተያያዘ ዜና የቤተ ክርስቲያኒቱ ቅዱስ ሲኖዶስ 39ነኛ ጠቅላላ ምልዓተ ጉባዔ በኦርቶዶክስ እምነት ተከታዮች ከኅዳር አንድ እስከ ሰባት ቀን 2013 ድረስ ለሰባት ቀናት ጸሎተ ምሕላ እንዲደረግ ውሳኔ አስተላለፏል።

ቅዱስ ሲኖዶስ ለ12 ቀናት ያደረገውን ጉባዔ ጥቅምት 23 ቀን ሲያጠናቅቅ ባሳለፈው ውሳኔ በኢትዮጵያ እየታየ ካለው ሰው ሠራሽ እና የተፈጥሮ አደጋ እግዚአብሔር ምሕረቱን እንዲያወርድ ምዕመናኑ ጸሎተ ምሕላ እንዲያደርጉ መልዕክቱን አስተላልፏል።

ቅዱስ ሲኖዶስ በጉባዔው የተለያዩ ውሳኔዎችን ያስተላለፈ ሲሆን በነባሩ ድንጋጌ ‹‹የቅዱስ ፓትርያርኩ ልዩ አገረ ስብከት›› የነበረችውና በረዳት ሊቀ ጳጳስ ትመራ የነበረችውን አዲስ አበባ ጉዳይ ተመልክቶ ውሳኔ አስተላልፏል። በአዲሱ ድንጋጌ መሠረት አዲስ አበባ ከተማ በሊቀ ጳጳስ የሚመራ አገረ ስብከት እንዲኖራት ስምምነት ላይ መደረሱን የቅዱስ ሲኖዶስ ዋና ጸሐፊና የምሥራቅ ጎጃም አገረ ስብከት ሊቀ ጳጳስ አቡነ ዮሴፍ አስታውቀዋል።

የከተማዋ አገረ ስብከትን ለማዋቀርም ከሕግ ባለሙያዎች ጋር በመመካከርና ሕጉን አሻሽለው በግንቦት ወር ለሚካሄደው ረክበ ካህናት እንዲያቀርቡ ሦስት ብፁዓን አባቶችን መመደቡንም ገልጸዋል።

በቤተ ክርስቲያኒቱና በክርስቲያን ወገኖች ላይ የደረሰው ግፍ እና መከራ እንዲቆም በየምክንያቱ በክርስቲያንነታቸው ምክንያት የታሰሩ ካህናትና ምዕመናን ጉዳያቸው እየታየ ከታሰሩበት እንዲፈቱ የመንግሥት የበታች ባለሥልጣናትም ለጥፋተኞች ከሚያደርጉት ድጋፍ እጃቸውን እንዲሰበስቡ ጉባዔው አጥብቆ አሳስቧል።

ቅጽ 2 ቁጥር 105 ጥቅምት 28 2013

Comments: 0

Your email address will not be published. Required fields are marked with *

This site is protected by wp-copyrightpro.com