የእለት ዜና

ፋብሪካዎችን ሥራ ለማስጀመር 9 ነጥብ 6 ቢሊዮን ብር ተበጀተ

በአማራ ክልል ደብረ ብርሃን ከተማ አስተዳደር ግንባታቸው ተጠናቅቆ በኤሌክትሪክ ኃይል ችግር ምክንያት ሥራ ያልጀመሩ 24 ፋብሪካዎች መኖራቸውን የከተማ አስተዳደሩ ኢንዱስትሪና ኢንቨስትመት ጽሕፈት ቤት አስታውቋል።
ከፍተኛ የሥራ ዕድል መፍጠር የሚያስችሉ ኢንዱስትሪዎች ሙሉ ግንባታቸው ቢጠናቀቅም ወደ ምርት አልገቡም። 24 ፋብሪካዎች ግንባታቸው ሙሉ በሙሉ ተጠናቅቆ ማሽን ቢገጥሙም ፈጥነው ወደ ሥራ አልገቡም። ከ10 ሺሕ በላይ የሥራ እድል መፍጠር የሚችሉት ፋብሪካዎች ሥራ ያልጀመሩት ከሰብስቴሽን ወደ ኢንዱስትሪ መንደሮች የኤሌክትሪክ ኃይል ማስተላለፊያ መሥመር ባለመዘርጋቱ መሆኑንም ገልጸዋል።
ችግሩን ለመፍታት የክልሉ መንግሥት 9 ነጥብ 6 ቢሊዮን ብር በመመደቡ ችግሩ በአጭር ጊዜ እንደሚፈታም አስታውቀዋል። በኢንቨስትመንት የተሠማሩ ባለሃብቶች በዘርፉ የሚስተዋሉ የመሠረተ ልማት ችግሮችን በመፍታት መንግሥት የሚያደርገውን ጥረት እያገዙ መሆኑም ተመላክቷል። ወደ ከተማ አስተዳደሩ የሚቀርቡ የኢንቨስትመንት ጥያቄዎችን በቀላሉ ለማስተናገድ እየተሠራ መሆኑን የገለጹት ኀላፊው ፈጣን አገልግሎት ለመስጠት በሁሉም ኢንዱስትሪ ክላስተሮች 5 ሺሕ 503 ሄክታር መሬት መለየቱን አመላክተዋል፡
በአሁኑ ወቅት የደብረብርሃን ከተማ የኢንቨስትመንት እንቅስቃሴ እየጨመረ ይገኛል። አካባቢው ያለው ምቹ የሰላም ሁኔታ፣ የአየር ፀባይ፣ በመንግሥት ተቋማት ፈጣን አገልግሎት አሰጣጥ፣ ሰፊ የኢንቨስመንት አማራጭ እንዲሁም በቂ የሰው ኃይል መኖር ለደብረብርሃን ከተማ ኢንቨስትመንት መነቃቃት ምክንያት ናቸው።
የከተማዋ ኢንዱስትሪና ኢንቨስትመንት ጽሕፈት ቤት እንዳስታወቀው በከተማዋ የሚገኙት አብዛኛዎቹ ኢንዱስትሪዎች በአምራች ዘርፉ የተሠማሩና ዕርስ በዕርሳቸው ተመጋጋቢ ናቸው። ይህም ከውጪ አገር የሚገቡ ምርቶችን በመተካት የምንዛሬ እጥረትን ይቀንሳሉ። በ2013 በጀት ዓመት የመጀመሪያ ስድስት ወራት ለቀረቡ 136 የተለያዩ የኢንቨስትመንት ጥያቄዎች ፈቃድ ተሰጥቷል። ከነዚህ ውስጥ 90 በመቶ የሚሆኑት በአምራች ዘርፉ ለመሰማራት ጥያቄ ያቀረቡ መሆናቸው ተመላክቷል።

ቅጽ 2 ቁጥር 118 ጥር 29 2013

Comments: 0

Your email address will not be published. Required fields are marked with *

This site is protected by wp-copyrightpro.com