የእለት ዜና

የኢትዮጵያ አየር መንገድ አደጋ ሲታወስ

157 ሰዎች የተቀጠፉበት ET-302 አውሮፕላን አደጋ ሁለተኛ ዓመት ሞልቶታል። በቦይንግ 737 ማክስ አውሮፕላን የደረሰው አደጋ አየር መንገዱ ከገጠሙት አደጋዎች ታሪክ በግንባር ቀደምትነቱ የሚታይ ነው ። መጋቢት 1/2011 ረፋድ ላይ መነሻውን ቦሌ ዓለም አቀፍ አውሮፕላን ጣቢያ መዳረሻውን ወደ ኬንያ ናይሮቢ ጆሞ ኬንያታ አየር ማረፊያ አድርጎ በረራ-6 ቢሾፍቱ ልዩ ስፍራው ቱሉ ፋራ በተባለ ቦታ ነበር የተከሰከሰው።

የትራንስፖርት ሚኒስቴር በአውሮፕላን አደጋ ህይወታቸውን ያጡ ሰዎች 2ኛ ዓመት መታሰቢያ አስመልክቶ መግለጫ አውጥቷል።በመግለጫው በአለም አቀፍ ሲቪል አቪዬሽን ድርጅት (CAO) ተቀፅላ 13 ንዑስ አንቀፅ 6.6 እና የአውሮፕላን አደጋ ምርመራ ቢሮ ደንብ ክፍል 6.1 መሰረት አንድ የአይሮፕላን አደጋ የምርመራ ሪፖርት በ12 ወራት ውስጥ ለህዝብ የማይገለፅ ከሆነ አደጋው የሚዘከርበት ዓመት የምርመራ ሂደቱ የደረሰበትን ደረጃ አደጋውን ለመርመር ኃላፊነት ያለበት አገር ማሳወቅ እንዳለበት እንደሚደነግግ አስታውሷል።

በዚሁ መሠረት በበረራ ቁጥር ኢቲ-802 ከአዲስ አበባ ወደ ናይሮቢ ኬንያ ለመብረር መጋቢት 1/2011 ከተነሳ ከጥቂት ደቂቃዎች በኃላ ከአዲስ አበባ ቦሌ ደቡብ ምስራቅ አቅጣጫ 28 ኖቲካል ማይልስ በኦሮሚያ ብሄራዊ ክልላዊ መንግስት በጊምቢቹ ወረዳ ልዩ ስሙ ኤጄሬ በተባለ ቀበሌ ወድቆ መከስከሱና አሳዛኝ አደጋ መድረሱን መግለጫው አመልክቷል።

በትራንስፖርት ሚኒስቴር ስር ባለው የኢትዮጵያ አውሮፕላን አደጋ ምርመራ ቢሮ በICAO ተቀፅላ 13 መሰረት እና በአውሮፕላን አደጋ ምርመራ አዋጅ ቁጥር 957/2008 በተሰጠው ስልጣንና ኃላፊነት መሰረት የምርመራ ሂደቱ የደረሰበትን ደረጃ በየጊዜው ወቅቱን በመጠበቅ የቅድመ አደጋ የምርመራ ሪፖርትና ቀጣይ ሂደቱ ያለበትን ደረጃ የሚገልፅ ሪፖርት ሲያሳውቅ መቆየቱን ሚኒስቴሩ ገልጿል።

የምርመራ ሂደቱ የደረሰበትን የመረጃ ሪፖርት የማሳወቅ ስራ ከተሰራ በኃላ በዓለም አቀፍና በአገሪቱ በተከሰተው የኮቪድ-19 ወረርሽኝ ምክንያት የምርመራ ሂደቱ የዘገየ ቢሆንም ቢሮው ተገቢውን የጥንቃቄ እርምጃዎች እየወሰደ የምርመራ ሥራውን በማስቀጠሉ የምርመራ ሂደቱን ወደ መጨረሻው ምዕራፍ ለማድረስ ተችሏል ብሏል።

በመሆኑም የትራንስፖርት ሚኒስቴር የበረራ ቁጥር ኢቲ -302 አስመልክቶ የመጨረሻውን ሪፖርት እና በቀጣይ መወሰድ ስላለባቸው እርምጃዎች በይፋ በቅርብ ጊዜ የሚያሳወቅ መሆኑን ገልጿል።
በሌላ በኩል ግን ከስድስት ወራት በፊት የአሜሪካ ኮንግረስ ባወጣው ሪፖርት፣ በኢትዮጵያና በኢንዶኔዥያ የመንገደኞች አውሮፕላኖች ላይ የደረሰው አደጋ በአውሮፕላኖቹ አምራች ኩባንያ ቦይንግ እና በአቪዬሽን አስተዳደር ባለስልጣኑ ጥፋት ያጋጠሙ መሆናቸውን አስታውቆ ነበር።

አደጋዎቹ በምህንድስና እንከኖች፣ በደካማ አመራርና ክትትል ማነስ ያጋጠሙ ናቸው ያለው ኮንግረሱ በአደጋዎቹ ምክንያት የቦይንግ 737 ማክስ 8 አውሮፕላኖች በመላው ዓለም ከበረራ ውጭ እንዲሆኑ መደረጉን ገልጿል።
ላለፉት 18 ወራት የአደጋዎቹን መንስዔዎች ሲመረምር የነበረው የኮንግረሱ የትራንስፖርት እና መሰረተ ልማት ኮሚቴ እንዳስታወቀው፣ የአውሮፕላኑ ዲዛይን፣ፍብረካ እና ማረጋገጫ የመስጠት ሂደቱን ለአደጋዎቹ መንስኤነት በግንባር ቀደምትነት አስቀምጧል።
በኢንዶኒዢያና በኢትዮጵያ አየር መንገዶች አውሮፕላኖች ላይ የደረሱ አደጋዎችን ተከትሎ በድምሩ 346 ተሳፋሪዎችም ከሞቱ በኋላ በቦይንግ ታሪክ ከፍተኛ የገበያ ድርሻ ማሽቆልቆሉ ያታወሳል።


ቅጽ 2 ቁጥር 123 መጋቢት 3 2013

Comments: 0

Your email address will not be published. Required fields are marked with *

This site is protected by wp-copyrightpro.com