የፕሬዚዳንት ጆ ባይደን መልዕክተኛ ሴናተር ክሪስ ኩንስ በኢትዮጵያ ትልቅ ለውጥ እንደሚኖር አመለከቱ

Views: 115

የአሜሪካው ፕሬዚዳንት ጆ ባይደን መልዕክተኛ ሆነው ኢትዮጵያ መጥተው የነበሩት ሴናተር ክሪስ ኩንስ በኢትዮጵያ ትልቅ ለውጥ እንደሚኖር የሚያመላክቱ ተስፋ ሰጪ ሁኔታዎች መኖራቸውን አመለከቱ።
በኢትዮጵያ ትግራይ ክልል ያለውን ተጨባጭ ሁኔታ በተመለከተ ከኢትዮጵያ መንግሥት ጋር እንዲወያዩ በፕሬዚዳንት ጆ ባይደን የተላኩት ሴናተሩ የጉዟቸውን ውጤት በተመለከተ ለሴኔቱ አቅርበዋል። ሴናተሩ ከጠቅላይ ሚኒስትር ዐቢይ አሕመድና ሌሎች የኢትዮጵያ መንግሥት ባለሥልጣናት ጋር የነበራቸው ቆይታ መልካም እንደነበር በመግለጽ ምስጋና አቅርበዋል። ጉዟቸው በኢትዮጵያ በአጠቃላይ ትልቅ መሻሻል እንዳለ የተመለከቱበት እጅግ ወሳኝ እንደነበርም አስረድተዋል።
በኢትዮጵያ ያሉትን ችግሮች ለመፍታት ዝግጁነት እንዳለ በመግለጽም፤ ጠቅላይ ሚኒስትር ዐቢይ በሕዝብ ተወካዮች ምክር ቤት ሰሞኑን ባደረጉት ንግግር ያሳዩትን የመንግሥት ቁርጠኝነት በአብነት አንስተዋል። የኢትዮጵያ መንግሥት ከሱዳን ጋር ያለውን የድንበር ውዝግብና የታላቁ የኢትዮጵያ ህዳሴ ግድብን ጉዳይ በድርድር ለመፍታት ያለውን ዝግጁነት በተመለከትም አድናቆታቸውን ገልጸዋል።
ቀጣይነት ያለው የሰብዓዊ ድጋፍ ለማድረግ፣ ቀውሱን ለመፍታትና ቀጣዩ አገራዊ ምርጫ ፍትሃዊ እንዲሆን እየተሠራ ያለው ሥራ ተስፋ ሰጪ መሆኑን እንደተገነዘቡ ተናግረዋል።


ቅጽ 3 ቁጥር 125 መጋቢት 18 2013

Comments: 0

Your email address will not be published. Required fields are marked with *

This site is protected by wp-copyrightpro.com