የእለት ዜና

2ኛው ዙር የኢንዱስትሪ ፓርኮች የንግድ ትርኢትና ባዛር በአዲስ አበባ ተካሄደ

ኹለተኛው ዙር የኢንዱስትሪ ፓርኮች የንግድ ትርኢትና ባዛር በአዲስ አበባ ተካሂዷል።
የንግድ ትርኢትና ባዛሩ መጋቢት 17 ቀን 2103 በቦሌ ለሚ ኢንዱስትሪ ፓርክ የተካሄደ ሲሆን 31 የሚሆኑ አነስተኛና መካከለኛ ኢንተርፕራይዞች ተሳትፈዋል። የኢንዱስትሪ ፓርኮች ልማት ኮርፖሬሽን ኹነቱን በማስመልከት አስቀድሞ ለጋዜጠኞች ጋዜጣዊ መግለጫ ሰጥቷል።
በኮርፖሬሽኑ የተወዳዳሪነትና ሥራ ፈጠራ ፕሮጀክት ሥራ አስኪያጅ ተሰማ ገዳ በሰጡት መግለጫ፤ የንግድ ትርኢት እና ባዛሩ ዋነኛ ዓላማ የገበያ ትስስር መፍጠር መሆኑን ገልጸዋል። በኢንዱስትሪ ፓርክ የሚገኙ ድርጅቶች ከአገር ውስጥ አቅራቢዎች ጋር ትስስር ይፈጥሩበታልም ብለዋል። በኢንዱስትሪ ፓርኮች ያለውን ምቹ የኢንቨስትመንት ሁኔታ ለማስተዋወቅና የኢንተርፕራይዞችን ተወዳዳሪነት ለመጨመር እንደሚያግዝም ገልጸዋል። የአገር ውስጥ ኢንተርፕራይዞች በኢንዱስተሪ ፓርኮች ከሚሠሩ ግዙፍ ፋብሪካዎች ልምድ እንዲቀስሙ በማድረግ ለእውቀትና ቴክኖሎጂ ሽግግር ምቹ ሁኔታ እንደሚፈጥርም ተናግረዋል።
በንግድ ትርኢትና ባዛሩ ከንግድ እና ኢንዱስትሪ ሚኒስቴር፣ ከኢትዮጵያ ኢንቨስትመንት ኮሚሽን እንዲሁም ከኢንዱስትሪ ፓርኮች የተወጣጡ ተወካዮች ይገኛሉ። የመጀመሪያው ዙር የኢንዱስትሪ ፓርኮች ንግድ ትርኢትና ባዛር የካቲት 3 እና 4 ቀን 2013 በሐዋሳ ኢንዱስትሪ ፓርክ መካሄዱ ይታወሳል።


ቅጽ 3 ቁጥር 125 መጋቢት 18 2013

Comments: 0

Your email address will not be published. Required fields are marked with *

This site is protected by wp-copyrightpro.com