የካፒታል ገበያ አዋጅ በቅርቡ ፀድቆ ወደ ሥራ እንደሚገባ ተገለፀ

Views: 173

ካፒታል በመሰበሰብ የገንዘብ ስርዓትን፣ አዳዲስ የስራ ፈጠራዎችን እና ኢንቨስትመንትን እንደሚያበረታታ የተነገረለት የካፒታል ገበያ አዋጅ የባለድርሻ አካላት አስተያየት ካጸካተተበት በኋላ ጸድቆ ወደ ስራ ሊገባ መሆኑ ታውቋል።
በቀደሙት የመንግስት ሥርዓት የካፒታል ገበያ ጀምሮ የነበረ ሲሆን ተቋርጦ ቆይቶ አሁን ባለው አሰራር፣ የሰው ሐይል እና የቴክኖሎጂ አቅም፣ የባለሃብቶች ፍላጎት እና አቅም እዲሁም የአገሪቱ ኢኮኖሚ ሁኔታ ታይቶ ለ25 ዓመታት ጥናት ከተካሄደበት በኋላ ወደ ስራ ለመግባት በዝግጅት ላይ እንደሚገኝ አቶ አሰፋ ሱሞሮ በብሔራዊ ባንክ የካፒታል ገበያ አማካሪ ለአዲስ ማለዳ ተናግረዋል።

የኢትዮጵያ ንግድ ዘርፍ ማህበራት፣ የኢትዮጵያ ንግድ ባንክ እና የኢኮኖሚክስ ምሁራን አማካይነት ጥናት ሲደረግ መቆየቱን አቶ አሰፋ ተናግረዋል።
የካፒታል ገበያ ባለሀብቶች በተለያየ ፈጠራ በኢንቨስትመንት ዘርፉ ላይ በንቃት እንዲሳተፉ ከመጋበዙም በላይ የአክሲዮን እና ቦንድ ሽያጮችን በመፍጠር ምቹ የኢንቨስትመንት አማራጭ እንደሚሆን እና የግለሰቦችን የቁጠባ አቅምንመ እንደሚያሳድግ አቶ አሰፋ ገልፀዋል።
የዓለም አቀፍ ተሞክሮዎች እንደሚያሳዩት የካፒታል ገበያው የኢኮኖሚ ቀውስ ውስጥ የሚከት ሳይሆን፣ ይልቁንም ኢንቬስተሮች እና ተቋማት የሚፈልጉትን ያህል ገንዘብ ያለምንም ማስያዣ ማግኘት የሚችሉበት ዘመናዊ አማራጭ ነው፤ በማለት አቶ አሰፋ ለአዲስ ማለዳ አብራርተዋል።

በካፒታል ገበያው ተጠቃሚ ከሚሆኑት መሀከል መንግስት አንደኛው ሲሆን፣ የረጅም ጊዜ ዕድሜ ያላቸውን የግምጃ ቤት ሰነዶች በመሸጥ የመሰረተ ልማት ፕሮጀክቶችን ፋይናንስ ማድረግ ስለሚችል ከብሔራዊ ባንክ ባለመበደር ለኢኮኖሚው መረጋጋት አስተዋጽኦ እንደሚያበረክት አቶ አሰፋ ተናግረዋል።

በኢትዮጵያ የተደረገውን የኢኮኖሚ ማሻሻያ ተከትሎ የካፒታል ገበያው ተጠሪነቱ ለጠቅላይሚኒስትሩ ሆኖ ብሔራዊ ባንክ ባለአደራ በመሆን እየተቆጠጣረው እንደሚገኝ አቶ አሰፋ ተናግረዋል።
መጋቢት 23 ቀን 2013 ዓ.ም በህዝብ ተወካዮች ምክር ቤት ገቢ፣ በጀትና ፋይናንስ እና የንግድና ኢንዱስትሪ ጉዳዮች ቋሚ ኮሚቴዎች በጋራ በተመራላቸው የኢትዮጵያ ፌዴራላዊ ዲሞክራሲ ሪፐብሊክ የካፒታል ገበያ አዋጅ ላይ ይፋዊ የህዝብ ውይይት አካሂደዋል።
በውይይቱም የአዋጁ አስፈላጊነትና ፋይዳ ምንድን ነው? አዋጁ ለኑሮ ውድነትና ለዋጋ ግሽበት ተጋላጭ አያደርግም ወይ? ኢኮኖሚውን የውጭ ባለሃብቶች እንዳይቆጣጠሩትና አገሪቱ ወደ ማትወጣው የኢኮኖሚ ቀውስ ውስጥ እንዳትገባ ምን ታስቧል? የሚሉ ማብራሪያ የሚሹ ጥያቄዎች በቋሚ ኮሚቴ አባላት ተነስተው በተጠሪ ተቋማት ምላሽና ማብራሪያ ተሰጥቶባቸዋል።

የብሔራዊ ባንክ ገዥው ይናገር ደሴ (ዶ/ር) በምላሻቸው እንዳሉት ቀደም ሲል የነበረው አሰራርም ሆነ አዋጅ ትውልደ ኢትዮጵያዊያንን ብቻ የሚያሳትፍና የውጪ አገር ዜጎችን ተጠቃሚ የማያደርግ ስለነበር ይህን አሰራር ለማሻሻልና የውጪ አገር ዜጎችን በካፒታል ገበያው ተሳታፊ ለማድረግ እንዲሁም የአገሪቱን ኢኮኖሚ ለማሳደግ አዋጁ አስፈላጊ ነው ብለዋል።

የውጪ ባለሀብቶች በኢንቨስትመንት ዘርፉ በንቃት እንዲሳታፉ ከመጋበዙም በላይ አክሲዮን እና ቦንድ የመሳሰሉ የሰነድ ገበያን በመፍጠር የህብረተሰቡን የቁጠባ ልምድ እና አቅምን በማሳደግ የተጀመረውን የኢኮኖሚ ለውጥ ማሳደግ የካፒታል ገበያ አዋጅ ተቀዳሚ ተግባር እንደሆነም ነው የባንኩ ገዥ የተናገሩት።

የባንኩ ገዥ ይናገር ደሴ (ዶ/ር) አክለውም ለካፒታል ገበያው ውጤታማነት ከፍተኛ የባለሃብት ተሳትፎ፣ የካፒታል መሰረተ ልማት መሟላት እና ከፍተኛ ክትትልና ቁጥጥር የሚያደርግ ጠንካራ አመራር የሚያስፈልግ በመሆኑ ለጊዜው እውቀቱ ካላቸው ከአገር ውስጥና ከውጪ አገር ተወላጆች ጋር በጋራ እየሰሩ መሆናቸውን ለቋሚ ኮሚቴው አብራርተዋል።

በብሔራዊ ባንክ ከፍተኛ አማካሪ የሆኑት አቶ መለሰ ምንአለ በበኩላቸው፣ የውጭ ባለሃብቶችን በካፒታል ገበያ ተሳታፊ በሚደረግበት ጊዜ፣ ከዚህ ቀደም በባንኩ የወጣው ክልከላ እንደተጠበቀ ሆኖ፣ በፋይናንስ ዘርፍ በማማከር፣ በማገናኘትና መሰል አገልግሎቶች ላይ ተሳታፊ የሚያደርግ በመሆኑ ኢኮኖሚውን ከመደገፉም በላይ ካፒታል ገበያ በርካታ ኢንቨስትመንት ለረጅም ዓመታት እንዲኖር የሚያድርግና የረጅም ዓመት የብድር አቅምና እድልን የሚፈጥር በመሆኑ ጥቅሙ የጎላ ነው በማለት አብራርተዋል።

አማካሪው አክለውም አዋጁ አገራት ከፍተኛ በሆነ የኢኮኖሚ ቀውስ ውስጥ በሚገቡበት ወቅትም መንግስት ከካፒታል ገበያው ተጠቃሚ እንዲሆን በማስቻል ኢኮኖሚያቸውን የሚደግፉበት ሁኔታ እንዳለ ጠቅሰው። ለአዋጁ ተግባራዊነት የሌሎች አገራት ተሞክሮ የተወሰደበትና ጥናት የተደረገበት መሆኑን አስረድተዋል።


ቅጽ 3 ቁጥር 126 መጋቢት 25 2013

Comments: 0

Your email address will not be published. Required fields are marked with *

This site is protected by wp-copyrightpro.com