“የእጩዎች መታሰር የመራጮች ምዝገባን አቀዛቅዞታል” ብርቱካን ሚደቅሳ

Views: 930

በተለያዩ የአገሪቱ አካባቢዎች በእጩ ተወዳዳሪዎች ላይ እየተፈጸመ ያለው እስር የመራጮች ምዝገባ ሂደት ላይ መቀዛቀዝን ፈጥሯል የሚል ስጋት እንዳላቸው የብሔራዊ ምርጫ ቦርድ ሰብሳቢ ብርቱካን ሚደቅሳ ገለጹ።
በሳምንቱ አጋማሽ ከፖለቲካ ፓርቲ አመራሮች ጋር በምርጫ ቁሳቁስ አቅርቦት እና በምርጫ ጣቢያ እንዲሁም በመራጮች ምዝገባ ጉዳዮች ላይ በተደረገው የውይይት መድረክ ሰብሳቢዋ ብርቱካን ሚደቅሳ እንዳሉት በተፎካካሪ ፓርቲ እጩዎች ላይ እየደረሱ ያሉ እስሮች የመራጮችን ምዝገባ ሂደት እንዲቀዛቀዝ አድርጎታል የሚል እምነት እንዳላቸው ተናግረዋል።

እስካሁን በነበረው የምርጫ ሂደት ብቻ የቤንሻንጉል ጉምዝ ክልል ብዙ እጪዎችን ከህግ አግባብ ውጪ በማሰር ግንባር ቀደም ክልል መሆኑንም አንስተው፣ በዚህም 8 የአብን እና 1 የኢዜማ እጩ ተወዳዳሪዎች መታሰራቸውን ገልጸዋል።
እጩዎችን ያለ አግባብ በማሰር የአማራ ክልል በሁለተኛ ደረጃ ሲቀመጥ ሶስት የእናት ፓርቲ እና አንድ ኢዜማ ፓርቲ እጩዎችን ታስረው እንደነበር ተገልጿል። እጩዎቹ ከግማሽ ቀን እስከ ሦስት ቀናት ድረስ ታስረው መቆየታቸውንም የቦርዱ ሰብሳቢ ብርቱካን በእለቱ አንስተዋል።

“እንኩዋን እጩዎች አባላትም እንደዚህ አይነት ነገር ሊገጥማቸው አይገባም ነበር ያሉት ሰብሳቢዋ ፣እነደዚህ ዓይነት ድርጊቶች ያሳስቡናል ” ሲሉ ተደምጠዋል። ይሁን እንጂ ቦርዱ ከፌደራል ፖሊስ ኮሚሽን ጋር በመነጋገር የታሰሩ እጩዎች በአስቸኳይ እንዲፈቱ ጥረት ማድረጉን ተናግረዋል። እግረ-መንገዳቸውንም የፌደራል ፖሊስን እያሳየ ላለው ቁርጠኝነት አመስግነዋል።

ምንም እንኩዋን ሰብሳቢዋ ስለ እጩዎች መታሰር ብቻ ይናገሩ እንጂ፣ በኦሮሚያ እና በአማራ ክልል የኢዜማ እና የአብን እጩዎች መገደላቸውም ያታወቃል።
የእጩ፣የአባላትን እና ደጋፊዎቻችን ግድያ፣እስር እና እንግልት ያስስበናል በማለት የአብን የፓለቲካ ጉዳዮች ኃላፊ ክርስቲያን ታደለ የገለጹ ሲሆን፣ በተለይም ገዢው ፓርቲ ብልጽግና በታችኛው የመንግሥት እርከን ላሉ አባላቶቹ ጠንከር ያለ ማሳሰቢያ መስጠት እንደሚገባው ተናግረዋል።

የኢዜማ የፖለቲካ ጉዳዮች ኃላፊ ዋሲሁን ተስፋዬ በበኩላቸው፣ ፓርቲውን ወክለው በጋምቤላ ክልል የሚወዳደሩ ሶስት መምህራን ከሥራ ገበታቸው መባረራቸውን አንስተዋል።
እንደ ክርስቲያን ሃሳብ ፣ምርጫ ቦርድም ቢሆን በምርጫ ስነምግባር ደንቡ መሰረት እንዲህ አይነት አስነዋሪ እና ህገወጥ ድርጊት በሚፈጽሙ ፓርቲዎች ላይ እጩ እስከመሰረዝ የሚደርስ እርምጃ እንዲወስድ አበክረው አሳስበዋል።
እንደነዚህ ያሉ ድርጊቶች ፣ መራጩ ሕዝብ የምርጫ ካርድ እንዳያወጣ የራሳቸው አሉታዊ ተጽእኖ እንዳላቸው እና ለመምረጥ የተመዘገቡ ዜጎች ቁጥርም ለመቀነሱ በምክንያትነት ተነስተዋል።

በእለቱ ምርጫ ቦርድ እንዳቀረበው መረጃም የመራጮች ምዝገባ ሊጠናቀቅ 10 ቀናት ብቻ እየቀሩት በአገር አቀፍ ደረጃ ለመምረጥ ካርድ ያወጡ ዜጎች ቁጥር ከ 50 በመቶ በታች እንደሆነ እና ይህ ቁጥር በክልሎች ሲወርድ ደግሞ የበለጠ አንደሚቀንስ ተናግረዋል።
የመራጮች ምዝገባ ሊጠናቀቅ 10 ቀናት ብቻ በቀሩት የምርጫ ካርድ ያወጣው የመራጪ ቁጥር ከግማሽ በታች መሆኑ አሳሳቢ እንደሆነ ገልጸው፣ ከጸጥታ ችግር ባሻገር በየቦታው የሚደረጉ የእጩዎች እስር በቀሩት ቀናት ህብረተሰቡ ምርጫ ካርድ እንዳይወስድ እንዳያደረገው ፓርቲዎች ያላቸውን ስጋት ተጋርተዋል።

በመዲናይቱ አዲስ አበባ እንኳን እየተከናወነ ባለው የመራጮች ምዝገባ በርካታ ሰው ተመዝግቦ የምርጫ ካርድ አለመውሰዱን የኢትዮጵያ ብሔራዊ ምርጫ ቦርድ አስታውቋል። እስከአሁን ባለው ጊዜ ውስጥም በአዲስ አበባ የተመዘገበው ሰው ብዛት 200,903 ብቻ እንደሆነ የቦርዱ ሰብሳቢ ብርቱካን ሚደቅሳ ተናግረዋል።

“በከተማው እስካሁን የተመዘገበው የመራጮች ቁጥር አነስተኛ እንደሆነ እና በነበሩት ቀናት የተመዘገቡት መረጮች ቁጥር ይሄ ብቻ መሆን አልነበረበትም” ሲሉ ሰብሳቢዋ ለፖለቲካ ፓርቲ ተወካዮች ባደረጉት ገለጻ ላይ አስረድተዋል።
በአዲስ አበባ ከተማ 1,848 የምርጫ ጣቢያዎች ተከፍተው አገልግሎት ይሰጣሉ ተብሎ የነበረ ቢሆንም እስካሁን ድረስ 186ቱ አለመከፈታቸውን ቦርዱ ገልጿል።

Comments: 0

Your email address will not be published. Required fields are marked with *

This site is protected by wp-copyrightpro.com