የእለት ዜና

ከመጠቅለል እስከ መገንጠል

Views: 216

የኢትዮጵያ መከላከያ ሠራዊት ትግራይን ለቆ መውጣቱን ተከትሎ ከተሰሙ አሳዛኝና አስደንጋጭ ጉዳዮች በተጨማሪ ዘና ያደረጉ ክስተቶችም ነበሩ። የሕገ መንግስቱን አንቀፅ 39 “…እስከመገንጠል” የሚለውን መብታችን ነው ብለው ጠየቁ የሚል ወሬ በማሕበረሰብ አንቂዎች መሰራጨቱን ተከትሎ ለበርካታ ፌዞችና አሽሙሮች በር ከፍቶ ነበር።

ይህ “…አለበለዚያ እንገነጠላለን” የሚል ማስፈራሪያ ለበርካታ አመታት የኢትዮጲያን መገነጣጠል ለማይፈልጉ ዜጎች እንደማስፈራሪያ ሆኖ አገልግሏቸዋል። ያለች ብቸኛ እንቁላልን በሁለት ጣቱ አንጠልጥሎ ሲጠጉት፣ “ዋ እንዳልጥላት” እያለ የሚያስፈራራ ሰው “በል እሺ ጣላትና እናነሳታለን፣ በርታ” ሲባል አማራጭ እንደሚያጣው አሁን እየሆነ ያለውን የሚያመሳስሉት አሉ።

በፖለቲካው ዓለም ስልጣን ለመያዝ ሕዝብን ማነሳሳት የፈለገ አካል “ተበድለሀል” እያለ እያነፃጸረ መቀስቀሱ የተለመደ ነው። ይህ አልበቃ ሲለው ወገኑን ሊያማልል ሌላን አሳይቶ በማስጎምጀት፣ “ነፃ አውጪ ነን” በማለት እንገንጠል ብሎ ያሳምናል። የኤርትራው ሻዕቢያም ይህን ሂደት አልፎ በወደቡ እጅግ የሚበለፅግ መስሎት ሐሳቡን ተቀብሎና አስርፆ ሲያበቃ፣ ሁሉን መጠቅለል እንደሚችል ሲያውቀው እምቢ ማስፈራሪያ ነው ቢልም፣ አጋሩ የነበረውና ተቀናቃኙ ትሕነግ አጋጣሚውን ተጠቅሞ በግድ እንዳስገነጠለው ይነገራል። በዚያም ሳቢያ ሻዕቢም ሕወሓቶች ላይ የያዘው ቂም አሁንም እንዳልበረደ የሚናገሩ አሉ።

ከአበራሽ ጠባሳ ያልተማሩ የዘመኑ ቀስቃሾችም ተመሳሳይ ማስፈራሪያን ቢሰነዝሩም ሰሚ ሳያገኙ ከርመዋል። ኃይልና አቅም እያላቸው ያላደረጉትን አሁን ትኩሳታቸውን እንለካ በሚል መልክ ከሰሞኑ እንዳዲስ ካርዱን መዘውታል። የኤርትራውያኑን አበሳ እንዳላዩ አሁንም እሳቱን ካልነካነው እያሉ ሲፈራገጡ ያዟቸው የሚል አጥተዋል። ዞር ዞር ብለው ቢያዩም እንኳን የሚያስቆማቸው የሚመክር የለም። ይባሱን አብዛኛው “ጥርግ በሉ፣ መንገዱን ጨርቅ ያርግላችሁ፣ በረሃብ እንዳታልቁ” የሚሉ ሀሳቦችን በማህበራዊ ሚዲያ ሲያሰማ ነበር።

ከመገንጠሉ የተለመደ ማስፈራሪያ የአሁኑን ለየት የሚያደርገው፣ “ስንገነጠል ኢትዮጵያ የሚለውን ስም ይዘን ነው” የሚለው የማስፈቀጃ ይሁን የማሳሰቢያ መልዕክት ነው። የቀረው የኢትዮጵያ ግዛት ደቡብ ኢትዮጵያ መባል ትችላላችሁ የሚል ፈቃድም ታክሎበታል። መገንጠል ፈላጊው እነሱ ይሁኑ የተቀረው ክፍል ግራ በሚያጋባ መልኩ አዲስ ሀገር የምንሆነው ነባሩን ስም ይዘን እንቀጥላለን በሚል፣ በስም ለሌለ ሀገር መንግስት ሊያመለክቱ ይሁን ባይታወቅም ግራ ገብቷቸው የሚጠሉትን እንወስዳለን እስከማስባል አድርሷቸዋል።

በሳምንቱ ብዙ ትኩረት የሳቡ ክንውኖች ቢኖሩም የሰውን ሀሳብ ከነበረበት ትካዜና ቁዘማ ያላቀቀው ይህ ነበር። ሀገሪቱን ጠቅልለው ይዘው የነበሩ አሁን ባዷአችንን እንገንጠል ሲሉ ለብዙዎች መቀለጃ ምንጭ ሆኗል። ሀገር ገንጥሎ ተደላድሎ መኖር እንደዶሮ ግንጠላ ቀላል የሚመስላቸው ሀገር ሳይሆኑ ባመፁበት ግዛት ተነጠለው ሊገነጣጠሉ ነው እያሉ ምኞታቸው ይስመርላቸው ብለው አስተያየታቸውን የሰነዘሩ አሉ። ያም ተባለ ይህ “ገንጣይ አስገንጣይ ወንበዴ” ብሎ የቀደመውን ዘመን ዘፈን የሚጋብዝ አልጠፋም።


ቅጽ 3 ቁጥር 139 ሠኔ 26 2013

Comments: 0

Your email address will not be published. Required fields are marked with *

This site is protected by wp-copyrightpro.com