የእለት ዜና

ኢትዮጵያ ኮቪድ 19 ካሳደረው ተፅዕኖ ለመላቀቅ ከተለያዩ ሀገራትና ድርጅቶች ጋር በትብብር እየሰራች መሆኑን አስታወቀች

“የዲጂታል ትብብር የኮቪድ 19 ተፅዕኖ ለመቋቋምና በዘላቂነት ለማገገም” በሚል አለም አቀፉ የቴሌኮሙኒኬሽን ህብረት ያዘጋጀው የበይነ መረብ መድረክ ተካሂዷል።

መድረኩ በዓለም አቀፍ ደረጃ ከተከሰተው የኮቪድ 19 ወረርሽኝ ተቋቁሞ ለማገገምና ለመጠናከር ኢንፎርሜሽን ቴክኖሎጂ ስለሚጫወተው ሚና ለህበረተሰቡ ግንዛቤ ለማስጨበጥና ትርጉም ያለው የዲጂታል ቴክኖሎጂ ለውጥ ለማምጣት የተዘጋጀ መሆኑም ታውቋል።

የኢኖቬሽንና ቴክኖሎጂ ሚኒስትር ዴኤታ አህመዲን መሐመድ (ፒ ኤች ዲ) በኮቪድ 19 ወረርሽኝ ምክንያት የተጎዳውን የዓለም ኢኮኖሚ ለመጠገን የዲጂታል ትብብር እና ጠንካራ የበይነ መረብ ግንኙነት ወሳኝ መሆኑን አብራርተዋል።

ኢትዮጵያ በዲጂታል ትብብር መስክ ከአለም ባንክ፣ ከአውሮፓ ህብረት፣ ከኢስቶኒያና ከሌሎች ሀገራትና ድርጅቶች ጋርም በትብብት እየሰራች እንደሆነም ገልፀዋል።

ኢትዮጵያ እየሰራቻቸው ያሉ የማሻሻያ ስራዎች በበይነ-መረብ ግንኙነት ችግር ተፈትነዋል ያሉት ሚኒስትር ዴኤታው ይህንን ለመቅረፍ የማሻሻያ ስራዎች እየተሰሩ ስለመሆናቸው ጠቁመዋል።

የዩኒሴፍ ምክትል ስራ አስፈፃሚ ፋያዝ ኪንግ የኮቪድ 19 ወረርሽኝ በዓለም ላይ 1.6 ቢሊየንን ተማሪዎችን ከትምህርት ገበታ ውጭ እንዳደረገና ይህንን ችግር ለመቅረፍ ትምህርት ቤቶችን ከበይነ መረብ ጋር በማገናኘት ዲጂታል ትምህርት መስጠት ላይ ሲሰራ መቆየቱን ገልፀዋል።

በመድረኩ የተባበሩት መንግስታትና የልዩ ልዩ ሀገራት ከፍተኛ ኃላፊዎች የተሳተፉ ሲሆን የኮቪዲ 19 ወረርሽኝ ያሳደረው ተፅዕኖና ከተፅዕኖው ለመውጣት የተወሰዱ እርምጃዎች ላይ ውይይት ማድረጋቸውን የኢኖቬሽንና ቴክኖሎጂ ሚኒስቴር አስታውቋል።

Comments: 0

Your email address will not be published. Required fields are marked with *

error: Content is protected !!