የእለት ዜና

በመዲናዋ በነገው ዕለት በሚካሄደው ሰልፍ ዝግ የሚሆኑ መንገዶች ይፋ ሆኑ

Views: 112

በነገው ዕለት በአዲስ አበባ መስቀል አደባባይ ነዋሪዎች ከመከላከያ ሰራዊት ጎን መቆማቸውን ለማረጋገጥ በሚያካሂዱት ሰልፍ ዝግ የሚሆኑ መንገዶች ይፋ ሆነዋል፡፡

የከተማዋ ነዋሪዎች ከመከላከያ ሰራዊት ጎን መቆማቸውን ለማረጋገጥ በነገው ዕለት በመስቀል አደባባይ የድጋፍ ሰልፍ ያደርጋሉ፡፡

ሰልፉ ስኬታማ እንዲሆን የፀጥታ አካላት አስፈላጊውን ዝግጅት ማድረጋቸውን እና በእለቱ ለትራፊክ ዝግ የሚሆኑ መንገዶችን የአዲስ አበባ ፖሊስ አስታውቋል፡፡

አሸባሪው የህወሃት ቡድን ኢትዮጵያን ለማፈራረስ የሚያደርገውን እንቅስቃሴ በመቃወም እና ለመከላከያ ሰራዊት እና ለሌሎች የሃገርን ህልውና ለማስጠበቅ ለተሰማሩ የፀጥታ አካላት ያላቸውን ድጋፍ ለመግለፅ ነዋሪዎቹ የድጋፍ ሰልፍ ያደርጋሉ ፡፡

የድጋፍ ሰልፉ በሰላም እንዲጠናቀቅ ከሌሎች ባለድርሻ አካላት ጋር ተቀናጅቶ ወደ ስራ መግባቱን የአዲስ አበባ ፖሊስ ገልጿል፡፡

ህብረተሰቡ ከዚህ በፊት የተደረጉ ልዩ ልዩ የአደባባይ ኩነቶች በሰላም እንዲጠናቀቁ በትዕግስት፣ በኢትዮጵያዊ ጨዋነትና በመደጋገፍ ላሳየው ቀና ትብብር የአዲስ አበባ ፖሊስ ምስጋናውን እያቀረበ ለጋራ ደህንነት ሲባል ፍተሻ እንደሚኖር የፕሮግሙ ታዳሚዎች ተገንዝበው ለፍተሻ እንዲተባበሩ ጥሪውን አስተላልፏል፡፡

በመስቀል አደባባይ የሚደረገው ፕሮግራም ተጀምሮ እስከሚጠናቀቅ ከለሊቱ 11 ሰዓት ጀምሮ የተወሰኑ መንገዶች ለትራፊክ ዝግ ይሆናሉ ማለቱን ከኮሚሽኑ ያገኘነው መረጃ ያመለክታል ፡፡

በዚህም መሰረት

  • ከቦሌ አየር መንገድ በሚሊኒየም አዳራሽ ወደ መስቀል አደባባይ የሚወስደው መንገድ ደንበል ሲቲ ሴንተር ኦሎፒያ አደባባይ
  • ከመገናኛ ፣ በሃያ ሁለት ወደ መስቀል አደባባይ እንዲሁም ከቦሌ መድሃኒያለም፣ በአትላስ ሆቴል ወደ መስቀል አደባባይ የሚወስደው መንገድ ኡራኤል ቤተ-ክርስቲያ አካባቢ
  • ከአራት ኪሎ ወደ መስቀል አደባባይ የሚወስደው መንገድ ባሻወልዴ ችሎት ወይም ፓርላማ መብራት
  • ከቸርችር ጎዳና ወደ መስቀል አደባባይ የሚወስደው መንገድ ቴዎድሮስ አደባባይ እና አገር አስተዳደር መብራት ወይሚ ኢሚግሬሽን
  • ከተክለ ሀይማኖት በሜትሮሎጂ መስቀል አደባባይ የሚወስደው መንገድ ሜትሮሎጂ መስሪያ ቤት አካባቢ
  • ከተክለ ሀይማኖት ፣ በጥቁር አንበሳ ሆስፒታል፣ ኢሚግሬሽን ጥቁር አንበሳ የኋላ በር
  • ከጌጃ ሰፈር ፣ ጤና ጥበቃ፣ ብሄራዊ ቲያትር የሚወስደው መንገድ ጎማ ቁጠባ
  • ከሳሪስ በጎተራ አጎና ሲኒማ እና አራተኛ ክፍለ ጦር
  • ከጦር ኃይሎች ፣ ልደታ ፣ ፖሊስ ሆስፒታል ሜክሲኮ አደባባይ
  • ከጦር ኃይሎች ፣ ልደታ ፣ ፖሊስ ሆስፒታል ፣ ሜክሲኮ ለገሀር መብራት የሚወስደው ለገሃር መብራት አካባቢ ለተሽከርካሪ ዝግ ይሆናሉ፡፡

በተጨማሪም በዋዜማው ከምሽት ጀምሮ ስነ ስርዓቱ በሚከናወንበት እና ዝግ በሚሆኑ መንገዶች አካባቢ ለአጭርም ሆነ ለረጅም ሰዓት ተሽከርካሪ አቁሞ መሄድ የተከለከለ መሆኑን አሽከርካሪዎች ተገንዝበው አማራጭ መንገዶችን እንዲጠቀሙ ፖሊስ አሳስቦ ህብረተሰቡ ጥቆማ ለመስጠት ወይም የፖሊስ አገልግሎትን ማግኘት ሲፈልግ በ011-1-11-01-11 ወይም በነፃ ስልክ መስመር 991 መጠቀም እንደሚችል የአዲስ አበባ ፖሊስ አስታውቋል፡፡

 

Comments: 0

Your email address will not be published. Required fields are marked with *

This site is protected by wp-copyrightpro.com