የእለት ዜና

የድጋፍ ሰጪ አውቶቡሶች ውል ለተጨማሪ ሶስት ወራት ተራዘመ

የአዲስ አበባ ከተማ አስተዳደር ካቢኔ የድጋፍ ሰጪ አውቶቡሶችን ከመስከረም 4/2014 ጀምሮ ለሶስት ወራት እስከ ታህሳስ 3/2014 አራዝሟል፡፡

በመዲናዋ ድጋፍ ሰጪ አውቶቡሶች ወደስራ ከገቡ በኋላ በአማካይ 3 መቶ 92 አውቶቡሶች በየቀኑ አገልግሎት እንዲሰጡ በመደረጉ የትራንስፖርት አገልግሎት አሰጣጡ እንዲሻሻል አስተዋጽኦ ማበርከታቸው ተገልጿል፡፡

በሁሉም አውቶቡሶች ላይ GPS በመግጠም የክትትልና ቁጥጥር እንደሚደረግ የተገለጸ ሲሆን ይህም በቀን በአማካኝ ለ182 ሺህ ተጠቃሚዎች አገልግሎት በመስጠት የተሳፋሪ የጊዜ ቆይታን በአማካይ ከ60 ደቂቃ ወደ 12 ደቂቃ ዝቅ በማድረግ አገልግሎት አሰጣጡም እየተሻሻለ መምጣቱን ከአዲስ አበባ ከተማ ፕሬስ ሴክሬታሪያት ያገኘነው መረጃ ያመላክታል፡፡

ማህበራትም በውሉ መሰረት የተቀመጡ የአሰራር ስርዓቶችን ስራ ላይ በማዋል ከዚህ የተሻለ አገልግሎት እንዲኖር ትኩረት ሰጥተው ሊሰሩ እንደሚገባ የአዲስ አበባ ከተማ ትራንስፖርት ቢሮ አሳስቧል፡፡

የከተማ አስተዳደሩ ከጥቅምት 9/2013 ጀምሮ ሀገር አቋራጭ አውቶቡሶች በኪራይ የትራንስፖርት አገልግሎት እንዲሰጡ መደረጉ ይታወሳል፡፡

Comments: 0

Your email address will not be published. Required fields are marked with *

error: Content is protected !!