የእለት ዜና

የክቡር ዶክተር አርቲስት ለማ ጉያ ፋውንዴሽን ተመሰረተ

በምስረታው መድረክ አርቲስቱ የጻፏቸው ሶስት መጻህፍትም ተመርቀዋል።

ከልጅነት የሸክላ ቅርጻ ቅርጽ መነሻነት የአየር ሃይል መምህርነትና ታላቅ የአገር ፍቅር በመግለጽ የሚታወቁት እንዲሁም በፍየል ቆዳ ላይ በሚሰሩትና በልዩ ጥበብ እስከ ዓለም ሎሬትነት የደረሱት የክቡር ዶክተር አርቲስት ለማ ጉያን አበርክቶዎች ማስቀጠል የሚያስችል ፋውንዴሽን ዛሬ በይፋ ተመስርቷል።

በፋውንዴሽኑ ምስረታ ላይ የኦሮሚያ ክልላዊ መንግስትን በመወከል የተገኙት የክልሉ ፕሬዝዳንት ጽህፈት ቤት ሃላፊ ጌቱ ወዬሳ የክልሉ መንግስት የታላቁን አርቲስት ለትውልድ የሚያስተላልፉ ሰፊ ተግባራትን ከቤተሰቡና ከስራ ባልደረቦቹ ጋር በመሆን በመስራት ላይ እንደሚገኝ ተናግረዋል።

በዚህም ፋውንዴሽኑን ከማቋቋም ባለፈ በትውልድ ስፍራቸውና በጥበብ ምንጫቸው ቢሾፍቱ ከተማ በመንግስት ወጪ ሀውልታቸውን በማሰራት ላይ ነው፤ በኦሮሞ ባህል ማዕከል ደግሞ በስማቸው ሙዚየም ከፍቶላቸዋል።

እነዚህ ተግባራት ታዲያ ታላቁን የጥበብ ሰው ቢያንስባቸው እንጂ አይበዛባቸውም ነው ያሉት ጌቱ።

የኦሮሚያ ባህልና ቱሪዝም ቢሮ ሃላፊ ከበደ ዴሲሳ በበኩላቸው ክቡር ዶክተር አርቲስት ለማ የአገራችን ብሎም የአፍሪካ ትልቁ የጥበብ ንጉስ ናቸው ብለዋል።

መላው የጥበብ ወዳጅ ሲያስታውሳቸውም በታላቅ የጥበብ አበርክቷቸው ነው ያሉት።
በመድረኩ ተገኝተው ስለ አባታቸው የጥበብ አበርክቶና ቀጣይ ስራዎች የተናገሩት ደግሞ የአርቲስት ለማ ጉያ ልጅ የሆኑት ሰላም ለማ ናቸው።

ሰላም “እኛ የለማ ቅርሶች ነን” በማለት ነው የአባታቸውን ራዕይና ቅርስ ለቀጣዩ ትውልድ ለማስተላለፍ እየተጉ መሆናቸውን አውስተዋል ሲል ኢፕድ ዘግቧል።

አርቲስቱ በተለየ ተሰጥኦ ከ1ሺህ በላይ የቆዳ ላይ የስዕል ጥበብ ማበርከታቸው የተወሳ ሲሆን በእነዚያ አበርክቷቸውም በስማቸው ለማዊነት(Lemmism) የሚል ዓለም አቀፍ የሎሬት ማዕረግ እንደተጎናጸፉም በመድረኩ ተወስቷል።

በዚህም ከእረኝነት እስከ ለማዊነት (From Hearding to Lemmism) የስዕል ጥበብ ማስተማሪያ ያለ አስተማሪ የሚሉትና በአርቲስቱ የተደረሱ ሶስት መጻህፍት ተመርቀዋል።

Comments: 0

Your email address will not be published. Required fields are marked with *

error: Content is protected !!