የእለት ዜና

ከ7 ሺህ በላይ ህጻናት የልብ ቀዶ ጥገና ለማድረግ ወረፋ በመጠባበቅ ላይ እንደሚገኙ ተገለፀ

በኢትዮጵያ የልብ ቀዶ ህክምና ለማድረግ ከ7ሺህ በላይ ህጻናት ወረፋ በመጠባበቅ ላይ መሆናቸውን የልብ ህሙማን ህጻናት መርጃ ማእከል አስታውቋል፡፡

የኢትዮጵያ የልብ ህሙማን ህጻናት መርጃ ማእከል ዋና ሥራ አስፈጻሚ ህሩይ አሊ በየአመቱ እስከ 500 የሚደርሱ ህጻናት የልብ ቀዶ ህክምና እየተደረገላቸው እንደሚገኝ እና ቀዶ ህክምና የሚፈልጉ ህጻናት ቁጥር በየቀኑ እንደሚጨምር ገልፀዋል፡፡

ይህ ቁጥር ግን ካለው ወረፋ አንጻር ሲታይ በቂ አይደለም ሲሉም ተናግረዋል፡፡

በማእከሉ አላቂ እቃዎች በበቂ ሁኔታ ባለመኖራቸው የተነሳ ወረፋ የሚጠብቁ ህጻናት ህክምና እያገኙ አለመሆናቸውን እና መድሀኒትም ቢሆን በሚፈለገው መጠን አለመገኝቱ በሥራው ላይ እንቅፋት እንደሆነበት ነው ሥራ አስፈጻሚው ያስረዱት፡፡

እንደ አላቂ እቃዎች እና መድሀኒቶች በበቂ መጠን ቢሟሉ ኖሮ ግን በአመት እስከ 1 ሺህ 500 ያህል ቀዶ ጥገና ማድረግ ይቻል እንደነበርም አንስተዋል፡፡

“ወረፋ አስይዘው ቀዶ ህክምና ሊደረግላቸው ከማእከሉ ሲደወልላቸው ህይወታቸው እንዳለፈ የሚነገረን ጊዜ አለ” ፣ ይህ ሁኔታ ልብ የሚሰብር ነው” ሲሉ ህሩይ አሊ ተናግረዋል፡፡

ወረፋ በመጠባበቅ ላይ የሚገኙትን ህጻናት ለመታደግ ሁሉም ኢትዮጵያዊ የበኩሉ ሀላፊነት መወጣት እንዳለበት አሳስበዋል ሲል ኢትዮ ኤፍ ኤም ዘግቧል፡፡

ድጋፍ ማድረግ የሚፈልግ ማንኛውም ሰው 6710 ላይ ከአንድ ብር አንስቶ እስከ መቶ ብር ድረስ እገዛ ማድረግ ይችላል፡፡

የልብ ህመም አሁን ላይ በአለም ዋነኛ ገዳይ በሽታ እየሆነ መምጣቱን አለም አቀፍ ጥናቶች እንደሚያለመክቱ ሥራ አስፈጻሚው ጨምረው ገልጸዋል፡፡

Comments: 0

Your email address will not be published. Required fields are marked with *

error: Content is protected !!