የእለት ዜና

በሱማሌ ክልል ዕድሜያቸው ለምርጫ ያልደረሰ ሕፃናት ድምጽ ሰጥተዋል ተባለ

የኢትዮጵያ ብሔራዊ ምርጫ ቦርድ ባለፈው መስከረም 20/2014 ባካሄደው ኹለተኛው ዙር ምርጫ በተለይ በሱማሌ ክልል ዕድሜያቸው ለምርጫ ያልደረሰ ሕፃናት ድምጽ መስጠታቸውን የኢትዮጵያ ሰብዓዊ መብቶች ጉባኤ (ኢሰመጉ) አስታወቀ።
መስከረም 20 በክልሉ በተካሄደው ምርጫ በታዛቢነት የተሳተፈው ኢሰመጉ፣ በክልሉ በተለያዩ ምርጫ ጣቢያዎች ዕድሜያቸው ለመምረጥ ያልደረሰ ሕፃናት የኢትዮጵያ ብሔራዊ ምርጫ ቦርድ ያዘጋጀውን የድምጽ መስጫ ወረቀት ይዘው ድምጽ ሲሰጡ ታዛቢዎች መመልከታቸውን ገልጿል።

የኢሰመጉ የምርጫ ባለሙያ ገላውዲዎስ ግሩም ለአዲስ ማለዳ እንደገለጹት፣ በኹለተኛው ዙር ምርጫ ሕፃናት ካርድ ወስደው ድምጽ በመስጠት ሒደቱ መሳተፋቸውን የኢሰመጉ ታዛቢዎች መመልከታቸውን ተናግረዋል። ድርጊቱ በሌሎች ምርጫ በተካሄደባቸው አካባቢዎች አልፎ አልፎ ቢኖርም፣ በዋናነት ችግሩ የታየው በሱማሌ ክልል መሆኑን ነው ገላውዲዎስ ለአዲስ ማለዳ የገለጹት።

የኢትዮጵያ ብሔራዊ ምርጫ ቦርድ ከዚህ በፊት በሚያወጣቸው መረጃዎች እና ለመራጮች በሚሰጣቸው ትምህርቶች ድምጽ መስጠት ወይም በምርጫ መሳተፍ የሚችሉት ዕድሜያቸው ከ18 ዓመት በላይ የሆናቸው ብቻ መሆኑን መግለጹ የሚታወስ ነው። ኢሰመጉ እንደሚለው ከሆነ ችግሩ የተከሰተው በቅድመ ምርጫ ወቅት ሲሆን፣ በምርጫው ለመሳተፍ ምርጫ ካርድ ለመራጮች በሚሰጥበት ጊዜ ያለ አግባብ ዕድሜያቸው ለምርጫ ላልደረሱ ሕጻናት ተላልፎ መሰጠቱ ነው ብሏል።

ኢሰመጉ ምርጫ በተካሄደባቸው ክልሎች በተሳተፈባቸው ምርጫ ጣቢያዎች የታዘባቸው መልካም እና ደካማ ጎኖችን ለምርጫ ቦርድ ሪፖርት ማድረጉን ገልጿል። ኢሰመጉ ታዛቢዎች ባሰማራባቸው ምርጫ ጣቢያዎች፣ ዕድሜያቸው ለምርጫ ያልደረሰ ሕፃናት በምርጫ መሳተፋቸውን የሚረጋግጡ የምስል ማስረጃዎችን አቅርቧል።

የሱማሌ ክልል ምርጫ ጉዳይ ገና ከጅምሩ አወዛጋቢ እንደነበር የሚታወስ ሲሆን፣ የክልሉ ምርጫ ከሰኔ 14/2013 ወደ መስከረም 20/2014 የተሻገረው በክልሉ በቅድመ ምርጫ ወቅት በተለይ ከመራጮች ካርድ አሰጣጥ ጋር በተገናኘ አጋጥሟል በተባለው ችግር ነበር። ምርጫ ቦርድ በክልሉ ያሰራጨው የመራጮች ካርድ በክልሉ ብልጽግና ፓርቲ በኩል ያለ አግባብ መሰራጨቱን በክልሉ ምርጫ የሚሳተፉ ተፎካካሪ የፖለቲካ ፓርቲዎች ቅሬታ በማቅረባቸው ነበር።

በክልሉ አጋጥሟል የተባለውን ችግር ምርጫ ቦርድ አጣርቶ ማስተካከያ ማድረጉን መግለጹ የሚታወስ ነው። ይሁን እንጂ፣ በክልሉ በተካሄደው ምርጫ ተፎካካሪ የፖለቲካ ፓርቲዎች አልተሳተፉም። የፖለቲካ ፓርቲዎቹ በክልሉ ምርጫ ያልተሳተፉት በመጀመሪያ ዙር ምርጫ ዝግጅት ላይ አጋጥመዋል ብለው ያቀርቧቸው ችግሮች ባለመስተካከላቸው መሆኑን መግለፃቸው የሚታወስ ነው።

ምርጫ ቦርድ በክልሉ መስከረም 20 ያካሄደውን ምርጫ መሠረት አድርጎ የክልሉን ምርጫ አሸናፊ ይፋ ማድረጉ የሚታወስ ነው። የክልሉ ብልጽግና ፓርቲ ያለ ተፎካካሪ የፖለቲካ ፓርቲዎች ተሳትፎ ብቻውን ቢወዳደርም፣ አሸናፊ መሆኑን ተከትሎ ባሳለፍነው ሳምንት የክልሉን መንግሥት መስርቷል። በዚህም መስጠፌ ሙሐመድን የክልሉ ርዕሠ መስተዳድር አድርጎ መርጧል።

አዲስ የተመሰረተው የክልሉ መንግሥት፣ ከምርጫው ራሱን ያገለለውን የኦጋዴን ብሔራዊ ነፃ አውጭ ግንባር(ኦብነግ) ኹለት አባላትን በካቢኔው ውስጥ ማካተቱን ገልጿል። ይሁን እንጂ በክልሉ ካቢኔ ውስጥ የተካተቱትን የኦብነግ አባላት ፓርቲው እንደማይወክሉት በይፋዊ ማኅበራዊ ገጹ ባወጣው መረጃ ገልጿል።


ቅጽ 3 ቁጥር 155 ጥቅምት 13 2014
______________________________
ትክክለኛውን የአዲስ ማለዳ ሶሻል ሚዲያ በመቀላቀል ቤተሰብ ይሁኑ
Telegram ➲ t.ly/SOXU
Facebook ➲ t.ly/flx8
YouTube ➲ t.ly/vSgS
Twitter ➲ t.ly/mxA4n

Comments: 0

Your email address will not be published. Required fields are marked with *

This site is protected by wp-copyrightpro.com