የእለት ዜና

“እንግዶች ሰላማቸውና ደህንነታቸው የተጠበቀ እንዲሆን ሁሉም የበኩሉን ሃላፊነት ሊወጣ ይገባል”፦ አ.አ ፖሊስ

የጥበቃ ሥራውም በደህንነት ካሜራዎች ጭምር የታገዘ መሆኑም ተገልጿል።

ማክሠኞ ታህሳስ 19/ 2014 (አዲስ ማለዳ) ወደ ኢትዮጵያ የሚመጡ ዳያስፖራዎች እና ሌሎች እንግዶች ደህንነታቸው የተጠበቀ እንዲሆን በሆቴል እና በመዝናኛ ሥራ ላይ ከተሰማሩ የተቋማት ሃላፊዎች እና የጥበቃ ባለሙያዎች ጋር ውይይት ተካሄደ።

በውይይቱ የአዲስ አበባ ፖሊስ የወንጀልና ትራፊክ አደጋ መከላከል ዘርፍ ምክትል ኮሚሽነር መንገሻ ሞላ እና የአዲስ አበባ ፖሊስ የማህበረሰብ አቀፍ የፖሊስ አገልግሎት ዳይሬክተር ኮማንደር ሰለሞን ፋንታሁን ተሳትፈዋል፡፡

ምክትል ኮሚሽነር መንገሻ ሞላ በውይይቱ ባደረጉት የመክፈቻ ንግግር፥ ውድቀታችንን የሚመኙ ታሪካዊ ጠላቶቻችን ዛሬም ሆነ ወደ ፊትም አርፈው እንደማይተኙ አንስተዋል፡፡

የአገራችንን መልካም ገጽታ ለአለም ለማሳየት የሚመጡ እንግዶች ሰላማቸውና ደህንነታቸው የተጠበቀ እንዲሆን ሁሉም የበኩሉን ኃላፊነት መወጣት እንዳለበት ነው የተናገሩት፡፡

በጉዳዩ ላይ ጥናታዊ ጽሁፍ ያቀረቡት ኮማንደር ሰለሞን ፋንታሁን በበኩላቸው፥ በሆቴሎች እና መዝናኛ ስፍራዎች አካባቢ የሚታዩ ክፍተቶችን መነሻ በማድረግ የመፍትሄ ሃሳቦችን አመላክተዋል፡፡

የእንግዶችን ደህንነት በማስጠበቅ ነጻነት እንዲሰማቸው ማድረግ እና ተግባራዊ እንቅስቃሴዎች ላይ ትኩረት መስጠት እንደሚገባም ጠቁመዋል፡፡

የውይይቱ ተሳታፊዎችም የሚመጡ እንግዶችን ደህንንታቸው በተጠበቀ መልኩ አገልግሎት ለመስጠት ከመቼውም ጊዜ በበለጠ የተሻሉ የጥበቃ ባለሙያዎች መመደባቸውን ገልጸዋል፡፡

የጥበቃ ሥራው በደህንነት ካሜራዎች ጭምር የታገዘ መሆኑንም ነው ያብራሩት፡፡

በመድረኩ በመረጃ ልውውጥ፣ በስልጠናና ተዛማጅ በሆኑ ጉዳዮች ዙሪያ ከተሳታፊዎች ለተነሱ ጥያቄዎች በሃላፊዎቹ ምላሽ የተሰጠባቸው መሆኑን ከአዲስ አበባ ፖሊስ ኮሚሽን ያገኘነው መረጃ ያመላክታል፡፡

 

Comments: 0

Your email address will not be published. Required fields are marked with *

error: Content is protected !!