የእለት ዜና

ባለፉት ሶስት ወራት በመንግስት ገቢና ወጪ ረገድ ጤናማ የፊሲካል አስተዳደር ተግባራዊ መደረጉ ተገለጸ

አርብ ታህሳስ 22/2014 (አዲስ ማለዳ) ባለፉት ሶስት ወራት በመንግስት ገቢና ወጪ ረገድ ጤናማ የፊሲካል አስተዳደር ተግባራዊ መደረጉን የገንዘብ ሚኒስቴር አስታወቀ።

በ2014 በጀት አመት 2ኛ ሩብ ዓመት (ከጥቅምት-ታህሳስ) የ100 ቀን እቅድ አፈጻጸም በገንዘብ ሚኒስቴር በተገመገመበት ወቅት እንደተገለጸው በፌዴራል መንግስት ከአገር ውስጥና ከልማት አጋሮች ለመሰብሰብ የታቀደውን የመንግስት ገቢ ለማሳካት ከፍተኛ ጥረት የተደረገ ሲሆን፣ አፈጻጸሙም መልካም እንደነበር ተመልክቷል፡፡

በዚህም መሰረት ፌደራል መንግስት ከጥቅምት እስከ ህዳር 2014 ባለው ሁለት ወራት ውስጥ ብቻ ከአገር ውስጥ ገቢ ማለትም ታክስና ታክስ ካልሆኑ ገቢዎች 70 ነጥብ 6 ቢሊዮን ብር መሰብሰብ የቻለ ሲሆን ይህም የእቅዱ 89 ነጥብ 3 በመቶ መሆኑ ታውቋል፡፡

ከጥቅምት እስከ ታህሳስ 2014 ባለው ወቅት ከበይነ-መንግሥታዊ ተቋማት እና ከመንግሥታት ትብብር የልማት አጋሮች በእርዳታና በብድር በድምሩ 364 ሚሊዮን ዶላር የተገኘ ሲሆን 255 ነጥብ 6 ሚሊዮን ዶላር ደግሞ ወደ አገር ውስጥ ፈሷል ተብሏል፡፡

በተመሳሳይ መልኩ ባለፉት ሶስት ወራት ከመንግሥት የልማት ድርጅቶች ትርፍ ድርሻ 3 ነጥብ 8 ቢሊዮን ብር ለማስብሳብ መቻሉም ታውቋል፡፡

የመንግስት ወጪን በተመለከተም በዚሁ ወቅት ለፌዴራል መንግስት 73 ነጥብ 3 ቢሊዮን ብር ወጪ የተደረገ ሲሆን ለብሔራዊ ክልላዊ መንግሥታት 33 ነጥብ 6 ቢሊዮን ብር ወጪ ተደርጓል፡፡ ስለዚህም በድምሩ 106 ነጥብ 9 ቢሊዮን ብር ለፌደራልና ለክልል መንግስታት ክፍያ መተላለፉን ከገንዘብ ሚኒስቴር ያገኘነው መረጃ ያመላክታል፡፡

ስለዚህም ትኩረት ለሚሰጣቸው የመንግስት ወጪ ፍላጎቶች ቅድሚያ በመስጠት የተገኘውን ጥሬ ገንዘብ በአግባቡ ማስተዳደር መቻሉም ተመላክቷል ሲል ሚኒስቴር መስሪያ ቤቱ አስታውቋል፡፡

በመቶ ቀኑ እቅድ አፈጻጸም ግምገማ ላይ ከጠቅላይ ሚኒስቴር ጽ/ቤት፣ ከፕላንና ልማት ሚኒስቴር እንዲሁም ከገንዘብ ሚኒስቴርና ተጠሪ ተቋማት የተውጣጡ ሚኒስትሮች፣ ከፍተኛ አመራሮችና ባለሙያዎች የተገኙ ሲሆን፤ በእቅድ አፈጻጸሙ ላይ የታዩ ጠንካራ ጎኖች ተጠናክረው እንዲቀጥሉ ደካማ ጎኖች ደግሞ የእርምት እርምጃ እንዲወሰድባቸው አስተያየትና አመራር ተሰጥቷል፡፡

Comments: 0

Your email address will not be published. Required fields are marked with *

error: Content is protected !!