የእለት ዜና

በደብረ ብርሃን ሆስፒታል የታካሚዎች ቀጥር በከፍተኛ ኹኔታ እየጨመረ መሆኑ ተገለጸ

በደብረ ብርሃን ሆስፒታል የታካሚዎች ቀጥር በከፍተኛ ኹኔታ እየጨመረ መሆኑ ተገለጸ

በህወሓት ተወረው የነበሩ የአማራ ክልል አካባቢዎች አሁን ላይ ነጻ መውጣታቸውን ተከትሎ መንገዶች ሲከፈቱ፣ በደብረ ብርሃን ኮምፕርሄንሲቭ ስፔሻላይዝድ ሆስፒታል የታካሚዎች ቁጥር ከጊዜ ወደ ጊዜ በከፍተኛ ኹኔታ እየጨመረ እንደመጣ የሆስፒታሉ ሥራ አስኪያጅ ለአዲስ ማለዳ ገለጹ፡፡

በዚህም የሆስፒታሉ አልጋዎች በሙሉ የተያዙ ቢሆንም፣ ከጊዜ ወደ ጊዜ በርካታ ታማሚዎች እየመጡ መሆኑ ተመላክቷል፡፡ የወሊድ አገልግሎት የሚፈልጉ ሴቶች፣ የውስጥ ደዌ ታካሚዎች፣ እንዲሁም ሕክምና ፈላጊ ሕፃናት ቁጥር በከፍተኛ ኹኔታ እየጨመረ ይገኛል ተብሏል፡፡
የሆስፒታሉ ሥራ አስኪያጅ አስማረ ሳሙኤል የታካሚዎች ቁጥር በመጨመሩ በሆስፒታሉ ውስጥ የቦታ ጥበት ማጋጠሙን ጠቅሰው፣ እንደ አማራጭም ድንኳን በመትከል፣ የቦታ ማስፋፋያ በማድረግ እና ሌሎች የሆስፒታሉ ክፍሎችን ለሕክምና መስጫ በመጠቀም ችግሩን ለማቃለል እየተሞከረ ነው ብለዋል፡፡

ከዚህ ጋር ተያይዞም በሆስፒታሉ የመድኃኒት ዕጥረት ማጋጠሙን አመላክተዋል፡፡ እስካሁን በጤና ሚኒስቴር እና በመድኃኒት አቅራቢ ኤጀንሲ በኩል የሚቀርብልን መድኃኒት አለ የሚሉት ሥራ አስኪያጁ፣ ሆስፒታሉ በግዥ ከሚያገኛቸው መድኃኒቶች በተጨማሪ ባለሀብቶች ዕገዛ እንደሚያደርጉላቸው ተናግረዋል፡፡፣ ያም ሆኖ ግን አሁንም ድረስ ዕጥረት ያለባቸው የመድኃኒት ዓይነቶች አንዳሉ እና አንዳንድ መድኃኒቶችም ገበያ ላይ በቀላሉ የማይገኙ መሆናቸውን ሥራ አስኪያጁ አመላክተዋል፡፡

በዚህም እጥረት ያጋጠመው የሽንት ችግር ላለባቸው ህክምና የሚያገለግሉ ከቲተር ( Catheter no 18 or 16) እና ዩሪን ባግ ( Urine bag 2000ml)፣ ለቀዶ ህክምና የሚውሉ ፖሊግላይኮሊክ አሲድ ( Polyglycolic acid 3/0 cutting) እና ትራማዶል ( Tramadol 50 mg injection & Tramadol 50 capsul)፣ ጭንቀት ላለባቸው የሚሰጥ ፌኖባርቢተን ( Phenobarbitone 100 mg tablet) ፣ ድብርት ላለባቸው የሚሰጥ አሚትራይፒታይሊን ( Amtryptyline 25 mg tablet)፣ እንዲሁም የባክቴሪያ ብክለት ላደረባቸው የሚሆን ክሎክሳሊን ( cloxacillin 500 mg capsule)፣ ለሆድ ህመም የሚያገለግለው ሲሜቲዳይን ( Cimetidine 200 mg injection)፣ በሰውነታቸው ውሃ ወይም ፈሳሽ እጥረት ላለባቸው ታካሚዎች የሚሆነው ዴክትሮዝ ( Dextrose 40 percent) መድሀኒቶች መሆናቸውን አብራርተዋል፡፡

በተያያዘም፣ በቀን ለሚሰጠው የሕክምና አገልግሎት የባለሙያ ዕጥረት ባይኖርም፣ ሌሊት ለሚሰጠው የሕክምና አገልግሎት ግን ከቀዶ ጥገናና ማደንዘዣ ጋር የተገናኙ ባለሙያዎች እንደሚያስፈልጓቸው ሥራ አስኪያጁ ገልጸዋል፡፡
አክለውም፣ ሆስፒታሉ አሁን ላይ ሙሉ በሙሉ ለቁስለኛ ወታደሮች የሕክምና አገልግሎት እየሰጠ መሆኑን ጠቁመው፣ ነገር ግን ቆየት ያለ ሕመም (Chronic Disease) ያለባቸው ታማሚዎች አሁንም በሆስፒታሉ ሕክምና እንደሚሰጣቸው ገልጸዋል፡፡ በዚህም ከስኳር፣ ከደም ግፊት፣ ከሥነ-አዕምሮና ከጥርስ ታካሚዎች፣ እንዲሁም ከፊዚዮቴራፒ አገልግሎት ውጭ ያሉ የሕክምና አገልግሎቶች በከተማዋ ውስጥ ወደሚገኙ ሌሎች የጤና ተቋማት መዛወራቸውን ተናግረዋል፡፡

የተዛወሩት የሕክምና አገልግሎቶች በሦስት የተከፈሉ ሲሆን፣ በከተማዋ ቀበሌ 04 በሚገኘው ጤና ጣቢያ የእናቶች የወሊድ አገልግሎት፣ 07 በሚገኘው ጤና ጣቢያ የውስጥ ደዌ ሕክምና፣ እንዲሁም 08 ቀበሌ በሚገኘው ጤና ጣቢያ የሕፃናት ሕክምና አገልግሎት እየተሠጠ እንደሚገኝ አሳውቀዋል፡፡

አሁን ላይ አዳዲስ ቁስለኞ ወታደሮችን በመጠኑ የምንቀበል ቢሆንም፣ አልጋዎችቻን በሙሉ በመያዛቸው ወደ ሌሎች ቀጠናዎች (አዲስ አበባ) እየላክን ነው ሲሉም ነው የተናገሩት፡፡

በጦርነቱ ጾታዊ ጥቃት የተፈጸመባቸው ሴቶችም እንዲሁ በግብረ ሠናይ ድርጅቶች፣ በአካባቢው ተወላጆችና ባለሀብቶች ደረጃውን የጠበቀ ማረፊያ ተዘጋጅቶላቸው እየታከሙ ነው ሲሉም ገልጸዋል፡፡ በሕክምና ላይ ከሚገኙት ውጭ፣ ታክመው ወደ መጡበት የሔዱ መኖራቸውን ያመላከቱት ሥራ አስኪያጁ፣ ቅስቀሳ እየተደረገ በመሆኑም በቀጣይ በርከት ያሉ ሴቶች ለሕክምና እንደሚመጡ ጠቁመዋል፡፡

ጥቃት ከደረሰባቸው ሴቶች ሕክምና ጋር በተገናኘም እንዲዝናኑ ይፈለጋል፤ ይህም የሕክምናው አንዱ አካል ነው የሚሉት ሥራ አስኪያጁ፣ ለዚህ አገልግሎት የሚሆኑ ቴሌቪዥኖች አለመኖራቸውን አንስተዋል፡፡

ህወሓት በወረራቸው አጎራባች አካባቢዎች የነበሩ ጤና ተቋማት መውደማቸውን ተከትሎ ሆስፒታሉ በሙሉ አቅሙ አገልግሎት እየሰጠ በመሆኑ፣ ተመላላሽ ሕክምናቸውን አቋርጠው ቤታቸው የቆዩ እንዲሁም፣ ራሳቸውን ለመግለጥ ባለመፈለግ በአሸባሪው ህወሓት ጥቃት ተፈጽሞባቸው ቤታቸው የተቀመጡ ሴቶች ለተወሳሰበ የጤና ችግር ሳይጋለጡ በፊት በአፋጣኝ መጥተው የሕክምና አገልግሎት እንዲያገኙ አሳስበዋል፡፡

በደብረ ብርሃን ኮምፕርሄንሲቭ ስፔሻላይዝድ ሆስፒታል የተፈጠረው የታካሚዎች ቁጥር መብዛት የሚያስከትለውን የሕክምና መስተጓጎል ለመቅረፍ፣ በክልሉ በህወሓት የወደሙ ጤና ተቋማትን ማስጀመር ዋና መፍትሔ እንደሆን ተመላክቷል፡፡


ቅጽ 4 ቁጥር 165 ታኅሣሥ 23 2014

Comments: 0

Your email address will not be published. Required fields are marked with *

error: Content is protected !!