የእለት ዜና

ደቡብ አፍሪካዊው የማህበረሰብ ንቅናቄ መሪ ሎታታ ላክስ አዲስ አበባ ገባ

ሰኞ ታህሳስ 25/2014 (አዲስ ማለዳ) ደቡብ አፍሪካዊው የማህበረሰብ ንቅናቄ መሪ ሎታታ ላክስ አዲስ አበባ ገብቷል።
በጠቅላይ ሚኒስትር ፅ/ቤት ተወካይ ረ/ፕሮፌሰር ነብዩ ባዬ እና የወጣቶች ፌዴሬሽን ም/ ኘሬዝዳንት ፅጌረዳ ዘውዱ በቦሌ አለምአቀፍ አውሮኘላን ማረፊያ አቀባበል አድርገውለታል።
ላክስ በሰጠው ጋዜጣዊ መግለጫ ኢትዮጵያ ያለችበትን ሁኔታ ጠንቅቄ አውቃለሁ ብሏል። የመምጣቱንም ምክንያት ሲያስረዳ “የኢትዮጵያ መሪ መደገፍ አለብኝ፤ የመጣሁበት አንዱ ምክንያትም እርሱን ለመደገፍ ነው” ሲል ተናግሯል።
“ከውስጥና ከውጭ ሃይሎች አህጉሪቱ የሚገጥማትን ፈተና ወጣት አፍሪካውያን በጋራ መታገል አለብን” ብሏል።
ኢትዮጵያ የመላው ጥቁር ህዝቦች የነፃነት አርማ መሆኗን ያስታወሰ ሲሆን ለአፍሪካ በተለይም ለአገሩ ደቡብ አፍሪካ የነፃነት እና የፀረ አፓርታይድ ትግል ያደረገችው ድጋፍ በታሪክ ልዩ ሥፍራ እንደሚሰጠው ተናግሯል።
የ34 ዓመቱ ወጣት ሎታታ ላክስ በደቡብ አፍሪካ ከጊዜ ወደ ጊዜ ተሰሚነቱ እየጨመረ የመጣ የማህበረሰብ መሪ ነው።
ላክስ በሚኖርበት ሱዌቶ “ሶዌቶ ፓርላማ” የተሰኘ የወጣቶች ህብረት በመፍጠር ማህበራዊ ፍትህን ለማስፈን ሰፊ ዘመቻ እያደረገ ይገኛል። ወጣቱ የመሰረተውና የሚመራው የሶዌቶ ፓርላመንት ከፓለቲካ፣ ሃይማኖትና ዘር ነፃ የሆነ ህብረት ነው።
ለፍትህና እኩል ተጠቃሚነት በሚያደርጋቸው ትግሎች በርካቶችን እያሰከተለ አሁን ላይ ተፅዕኖ ፈጣሪ ከሆኑ ደቡብ አፍሪካውያን መካከል አንዱ መሆኑን ከውጭ ገዳይ ሚኒስቴር ቃል አቀባይ ጽ/ቤት ያገኘነው መረጃ ያመለክታል።
በደቡብ አፍሪካ ተካሂዶ በነበረው #nomore ተቃውሞ ሰልፍ ላይ በመገኘት አፍሪካውያን ኢትዮጵያን እንዲደግፉ ጥሪ አቅርቦ እንደነበር ይታወቃል።
Comments: 0

Your email address will not be published. Required fields are marked with *

error: Content is protected !!