የእለት ዜና

የአገራዊ ምክክር ኮሚሽን እጩ ኮሚሽነሮች አቀራረብ ሥርዓት ተዘረጋ

ሰኞ ታህሳስ 25/2014 (አዲስ ማለዳ) የአገራዊ ምክክር ኮሚሽን እጩ ኮሚሽነሮች አቀራረብ ሥርዓት በኢፌዴሪ የህዝብ ተወካዮች ም/ቤት ስለመዘርጋቱ አፈ-ጉባኤ ታገሰ ጫፎ ተናግረዋል፡፡

የእጩ ኮሚሽነሮችን ጥቆማ የሚቀበልና የሚያደራጅ የጥቆማ ተቀባይ ኮሚቴ መቋቋሙ ታውቋል፡፡

ኮሚቴው የእጩ ኮሚሽነሮችን ጥቆማ ከመቀበል ጀምሮ በም/ቤቱ ቀርበው እስከሚሾሙበት ድረስ የተለያዩ ተግባራትን እንደሚያከናውን ተገልጿል፡፡

የጽ/ቤቱ ሰብሳቢ ሄኖክ ስዩም (ዶ/ር) እና ሌሎች ሁለት አባላትም በኮሚቴው መካተታቸውን አፈ-ጉባኤ ታገሰ ጫፎ አስታውቀዋል፡፡

የምክክር ኮሚሽኑ እጩ ኮሚሽነሮች ጥቆማ አቀባበል አሳታፊ፣ ግልጽ፣ ተዓማኒና ከአድሎ የጸዳ እንዲሆን ለማስቻል የሚያግዝ የአማካሪ ቡድንም ተቋቁሟል፡፡

የአማካሪ ቡድኑ በአፈ ጉባኤ ታገሰ ጫፎ የሚመራ ሲሆን፤ የፌዴሬሽን ም/ቤት አፈ ጉባኤ፣ የፌደራል ጠቅላይ ፍርድ ቤት ፕሬዘዳንት፣ የሀይማኖት ተቋማት ጉባኤ ተወካይ እንዲሁም የሲቪክ ማህበራት ጥምረት ተወካይ በአባልነት ተካተውበታል፡፡

አማካሪ ቡድኑ የተለያዩ ተግባርና ኃላፊነት የተሰጡት ሲሆን፤ ከቀረቡ እጩዎች ውስጥ በአዋጁ ላይ የተቀመጡትን መስፈርቶች በከፍተኛ ደረጃ የሚያሟሉትን እጩዎች በመለየት ረገድ አፈ ጉባኤውን ማማከር ዋነኛው ስለመሆኑ ዛሬ በተደረገው ውይይት ተጠቁሟል፡፡

የጥቆማ መስጫ መርሃ ግብርና ጥቆማ የሚሰጥበት ፎርማት ገና ይፋ ሳይደረግ ጥቆማዎች እየቀረቡ ስለመሆኑ አፈ ጉባኤው ገልጸው፤ ነገር ግን እነዚህ ጥቆማዎች ተቀባይነት እንደማይኖራቸው አስታውቀዋል፡፡

የአገራዊ ምክክር ኮሚሽን እጩ ኮሚሽነሮች ማቅረቢያ ጊዜ፣ ፎርማትና አጠቃላይ የእጩዎች አቀራረብ ስርዓትን በተመለከተ አፈ-ጉባኤው ዛሬ ከሰአት በኋላ ጋዜጣዊ መግለጫ እንደሚሰጡ ከህዝብ ተወካዮች ምክር ቤት ያገኘነው መረጃ ያመለክታል፡፡

Comments: 0

Your email address will not be published. Required fields are marked with *

error: Content is protected !!