የእለት ዜና

ኢራን አንዳንድ ምዕራባዊያን አገራት በኢትዮጵያ የውስጥ ጉዳይ የሚያደርጉትን ጣልቃ ገብነት እንደምትቃወም አስታወቀች

አርብ ጥር 6 ቀን 2014 (አዲስ ማለዳ) ኢራን አንዳንድ የምዕራባዊያን አገራት በሰብዓዊ መብት ስም ኢትዮጵያን ጨምሮ በሌሎች አገራት የውስጥ ጉዳይ የሚያደርጉትን ጣልቃ ገብነት በጽኑ እንደምትቃወም በኢትዮጵያ የኢራን አምባሳደር ሰመድ አሊ ላኪዛዴህ ገለጹ፡፡

አምባሳደሩ ሰብዓዊ እሴቶች ለሁላችንም ዋጋ ያላቸው ሃብቶች በመሆናቸው የምዕራባዊያንን ጣልቃ የመግባት ፍላጎት ለማሟላትና ለእጅ አዙር ቅኝ ግዛት ማስፈጸሚያ ሲባል መሸርሸር የለባቸውም ብለዋል፡፡

በዚህም አንዳንድ ምዕራባዊያን አገራት ሰብዓዊነት የሚሉትን ተረክ በማንሳት በኢትዮጵያ ላይ የሚያደርጉት ጫና ህገ ወጥና ተቀባይነት የሌለው መሆኑን ጠቅሰው ኢራን ይህንን ድርጊት እንደምትቃወም ተናግረዋል፡፡

አገራቱ ጠንካራ፣ ነጻና ሉዓላዊነቷ የተከበረ ኢትዮጵያን ማየት ስለማይፈልጉ ሰብዓዊ ጥሰቶችን በመጥቀስ በኢትዮጵያ ላይ ጫና እያደረጉ ነው ብለዋል፡፡

ኢትዮጵያ ከአፍሪካ አገራት በቅኝ አገዛዝ ስር ያልወደቀች ብቸኛ ሀገር መሆኗን ያስታወሱት አምባሳደሩ የኢትዮጵያ ነጻነት በመላው ዓለም የጸረ-ቅኝ አገዛዝ ንቅናቄን በማነሳሳት ይታወቃል ብለዋል፡፡

የምዕራባዊያን አገራት ላለፉት 42 ዓመታት በኢራን ላይ ሁሉንም አይነት ጫና ሲያደርጉ መቆየታቸውን ገልጸው ከዚህ አኳያ “ሰብዓዊ መብት” በማለት በኢትዮጵያ ላይ እያደረጉት ያለውን ጣልቃ ገብነት ኢራን ትገነዘባለች ሲሉም አክለዋል፡፡

የምዕራባዊያን ጣልቃገብነት ሊቢያ፣ ሶሪያ፣ የመን፣ አፍጋኒስታንና ሌሎች መሰል አገራትን ለከፋ ቀውስ መዳረጉንም ገልጸዋል፡፡

ኢትዮጵያ የምዕራባዊያኑን ጫናና ጣልቃ ገብነት በመቃወም የምታደርገው ትግል በርካታ አፍሪካዊያን የእጅ አዙር ቅኝ አገዛዝን እንዲታገሉ እንደሚያነሳሳ አብራርተዋል፡፡

ኢራን የምዕራባዊያኑን ጫናና ማዕቀብ የተቋቋመችበትን ልምድ ለኢትዮጵያና ሌሎች ወዳጅ አገራት ለማካፈል ፈቃደኛ መሆኗን አረጋግጠዋል፡፡

ኢትዮጵያና ኢራን ረዥም ዘመናትን ያስቆጠረ ግንኙነት እንዳላቸው አስታውሰው፤ ኢራን የአገራቱ ግንኙነት ይበልጥ ማጠናከር እንደምትሻ መናገራቸውን ኢዜአ ዘግቧል፡፡

ኢራን በአዲስ አበባ ኤምባሲዋን ከከፈተች 71 ዓመታት ተቆጥሯል፡፡
_____________
ትክክለኛውን የአዲስ ማለዳ ሶሻል ሚዲያ በመቀላቀል ቤተሰብ ይሁኑ
Telegram ➲ t.ly/SOXU
Facebook ➲ t.ly/flx8
YouTube ➲ t.ly/vSgS
Twitter ➲ t.ly/mxA4n

Comments: 0

Your email address will not be published. Required fields are marked with *

error: Content is protected !!