በ158 ወረዳዎች የስንዴ ዋግ በሽታ መከሰቱን ግብርና ሚኒስቴር አስታወቀ

0
1838

በ158 ወረዳዎች በመኸር ስንዴ ሰብል ላይ የዋግ በሽታ መከሰቱን የግብርና ሚኒስቴር ለአዲስ ማለዳ ገለጸ።

የስንዴ ዋግ በሽታው በተለይም ስንዴ አብቃይ በሆኑ ክልሎች በደቡብ፣ በሲዳማ፣ በአማራ፣ በቤንሻጉል ጉምዝ እንዲሁም በኦሮሚያ እና በሶማሌ ክልሎች በአጠቃላይ ከ399 ሺሕ ሄክታር መሬት በላይ በለማ ስንዴ ላይ የተከሰተ መሆኑን ነው ሚኒስቴር መሥሪያ ቤቱ ያሳወቀው።

በግብርና ሚኒስቴር የእፅዋት ጥበቃ መሪ ሥራ አስፈጻሚ በላይነህ ንጉሤ፣ በሽታውን ለመከላከል እስካሁን 308 ሺሕ ሊትር የኬሚካል ርጭት መካሄዱን የገለጹ ሲሆን፣ በዚህም የከፋ ጉዳት እንደማያጋጥም ተናግረዋል። አያይዘውም ከ387 ሺሕ ሄክታር መሬት በላይ በኬሚካል ርጭት የመከላከል ሥራ መሠራቱን የገለጹት ሥራ አስፈጻሚው፣ ሆኖም የኬሚካሉ ዋጋ መወደድ በአርሶ አደሮች ላይ ጫና ሳይፈጥር እንዳልቀረ ጠቁመዋል።

በሽታው በምርት ላይ የሚያደርሰውን የጉዳት መጠን ለመለየት ጥናት እየተደረገ መሆኑን የጠቀሱት በላይነህ፣ ይህም የመስክ ባለሙያዎች ጥናቱን ሲጨርሱ የሚታወቅ ይሆናል ሲሉ ገልጸዋል። ከኬሚካል ርጭቱ ባለፈ በሽታ ሊቋቋሙ የሚችሉ የስንዴ ዝርያዎችን አርሶ አደሩ የተጠቀመበት ሁኔታ በመኖሩም የጉዳት መጠኑን ሊያቀለው እንደቻለ ተመላክቷል።

በሽታው ቀድሞም የነበረ በመሆኑ አርሶ አደሩ ቅድመ ዝግጅት አድርጎ እንደነበር ያነሱት ሥራ አስፈጻሚው፣ በአንዳንድ አካባቢዎች በጸጥታ ችግር ምክንያት ካልደረሰባቸው አካባቢዎች በስተቀር፣ ኬሚካሉ ውድ ቢሆንም በኹሉም ቦታ መዳረሱን ነው የገለጹት።

የኬሚካል ርጭቱ የሚካሄደው የበሽታው ምልክት በታየበት ጊዜ መሆኑን በመጥቀስም፣ በክልሎች ያለው የበሽታው ስርጭት ከቆዳ ስፋታቸውና ከስንዴ አብቃይነታቸው ጋር ይያያዛል ብለዋል።

በዚህም በኦሮሚያ ክልል ከ372 ሺሕ ሄክታር መሬት በላይ በሽታው የተከሰተ ሲሆን፣ በቤንሻንጉል ጉምዝ ክልል በአንጻሩ በጣም ትንሽ ሄክታር መሬት ላይ የተከሰተ መሆኑን አመላክተዋል። የበሽታው ምክንያት በዋናነት የሰብል ድግግሞሽ በመሆኑም፣ በሽታውን ለመከላከል ከኬሚካል ርጭቱ ይልቅ ሰብል ማፈራረቅ ተመራጭ መሆኑ ነው የተገለጸው።

ሌሎች በሽታዎችም ሊኖሩ እንደሚችሉ የተጠቆመ ሲሆን፣ ‹‹ኤርፎዛሬን›› የተባለው በሽታ በቀጣይ ዓመት ሌላው አስጊ የስንዴ በሽታ ሊሆን ይችላል ተብሏል። ይህ በሽታ ቀድሞ የነበረ ቢሆንም፣ ምልክቶቹ በተለያዩ ክልሎች እየታዩ ያሉ እና እጅግ አሳሳቢ መሆኑ ተመላክቷል።

በበጋ መስኖ ስንዴ በሰፊው ለመዝራት መታቀዱን ተከትሎም ከወዲሁ ትኩረት ተሰጥቶት የሚሠራበት መሆኑን ነው ሚኒስቴር መሥሪያ ቤቱ ያስገነዘበው። ለዚህም ኬሚካል በማኀበራት በኩል ለገበሬዎች ተጠናክሮ እንደሚቀርብ ተመላክቷል።

በሌላም በኩል በሰብል ላይ ከፍተኛ ጉዳት በማድረስ የሚታወቀውን የግሪሳ ወፍን የመከላከል ሥራ የተጀመረ መሆኑ ተጠቁሟል።

በተለይም በአሮሚያ (ስምጥ ሸለቆ አካባቢዎች) እና አማራ ክልል (ሸዋሮቢት አካባቢ) ትኩረት ተሰጥቶ ይሠራል የተባለ ሲሆን፣ አካባቢዎች ደረቅ ሲሆኑ፣ የግሪሳ ወፎች ውሃ ወዳለበት ስለሚዘምቱ የሚያደርሱትን ጉዳት ለመከላከል ከምሥራቅ አፍሪካ የበረሃ አንበጣ የመከላከል ድርጅት ጋር በመቀናጀት እየተሠራ እንደሚገኝ ለማወቅ ተችሏል።

በምርት ዘመኑ በመኸር ምርት ከ100 ሚሊዮን ኩንታል በላይ የስንዴ ምርት ይገኛል መባሉ የሚታወስ ነው።


ቅጽ 5 ቁጥር 209 ጥቅምት 26 2015

መልስ አስቀምጡ

Please enter your comment!
Please enter your name here