የኤሌክትሪክ ኃይል አቅርቦት የሚያሳድግ ፍኖተ ካርታ ተዘጋጀ

Views: 1193

የውሃ መስኖ እና ኢነርጅ ሚኒስቴር የኃይል አቅርቦቱን በአራት እጥፍ ማሳደግ የሚያስችል ፍኖተ ካርታ ማዘጋጀቱን ገለፀ።

ፍኖተ ካርታው አቅምን ያገናዘበ ፍትሐዊ የአገልግሎት ተጠቃሚነትና ተደራሽነትን ማረጋገጥ፣ የዜጎችን የኑሮ ደረጃ ማሻሻል እንዲሁም አጠቃላይ ማኅበራዊ እና ኢኮኖሚያዊ እድገትን ማፋጠን የሚያስችሉ አላማዎችን የያዘ ነው። ከዚህ ባለፈም የኃይል ምርትን በአግባቡ ማምረትና ያለምንም የመሸረተ ልማት ችግር ለኅብረተሰቡ ማዳረስ የሚያስችል መሆኑም ተገልጿል።

ኢትዮጵያ በውሃ ሀብቷ ከ40 እስከ 50 ሺሕ ሜጋ ዋት የኤሌክትሪክ ኃይል የማመንጨት እና የማምረት አቅም እንዳላት ይታመናል። ይሁን እንጅ ከውሃም ይሁን ከሌሎች ታዳሽ የኃይል ምንጮች የሚመረተው የኃይል መጠን ከ4 ሺሕ 400 ሜጋ ዋት መሻገር አልቻለም።

ይህን ተከትሎም እየጨመረ የመጣውን የኃይል ፍላጎት ጥያቄ በአግባቡ ለመመለስ እና የሚሰጠውን አገልግሎት ቀልጣፋ ለማድረግ የሚያስችሉ ምክረ ሐሳቦችን ያካተተ የ10 ዓመታት ፍኖተ ካርታ መዘጋጀቱን የውሃ መስኖ እና ኢነርጅ ሚኒስቴር አስታውቋል። የትራንስፎርመሮችን እና የቆጣሪ አቅርቦት ችግሮችን ለመፍታት እንደሚያስችልም የውሃ መስኖ እና ኢነርጂ ሚኒስቴር ገልጿል።

የኃይል አማራጮችን ከማስፋት ባለፈም የመንግሥትና የግሉ ዘርፍ ተቀናጅቶ የመሥራት ባህልን እንደሚያዳብርም ጠቁመዋል። በፍኖተ ካርታው አሁን ያለው የኤሌክትሪክ መስመር ከ20 ሺሕ ወደ 34 ሺሕ ኪሎ ሜትር የሚያድግ መሆኑም ተጠቅሷል።

እንዲሁም የኤሌክትሪክ ማከፋፈያ ጣቢያዎችን ከ204 ወደ 256 የሚያሳድግ እና የሚመረተውንም የኃይል መጠን ወደ 20 ሺሕ ሜጋ ዋት የሚያሳድግ ሲሆን፤ ከውሃ 14 ሺሕ፣ ከፀሐይ ኃይል 1 ሺሕ 700፣ ከእንፋሎት 900 ሜጋ እንዲሁም ከነፋስ እስከ 2 ሺሕ ሜጋ ዋት የሚደርስ ኃይል እንደሚመረት ሚኒስቴር መሥሪያ ቤቱ ገልጿል።

ቅጽ 2 ቁጥር 62 ጥር 2 2012

Comments: 0

Your email address will not be published. Required fields are marked with *

This site is protected by wp-copyrightpro.com