በአማራ ክልል ምሁራንን ጨምሮ በመቶዎች የሚቆጠሩ ሰዎች መታሰራቸውን አምነስቲ ኢንተርናሽናል አስታወቀ

0
433

ረቡዕ መስከረም 22 ቀን 2017(አዲስ ማለዳ) በአማራ ክልል በሚገኙ ዋና ዋና ከተሞች በመቶዎች የሚቆጠሩ ሰዎች በዘፈቀደ በጅምላ መታሰራቸውን ዓለም አቀፉ የሰብአዊ መብት ተሟጋች አምነስቲ አስታወቀ።

ከመስከረም 18 ቀን 2017 ዓ. ም ጀመሮ ምሁራንና ሲቪል ሠራተኞችን ጨምሮ በመቶዎች የሚቆጠሩ ሰዎች በጅምላ መያዛቸውን የሚጠቁሙ ሪፖርቶች እንደደረሱት አምነስቲ ገልጿል።

አምነስቲ መስከረም 21 ቀን 2017 ዓ. ም. ባወጣው ጋዜጣዊ መግለጫ እንዳለው ይህ የዘፈቀደ የጅምላ እስር “የሕግ የበላይነት ማጣትን የሚያባብስ” ነው።

የአምነስቲ ኢንተርናሽናል የምሥራቅና ደቡብ አፍሪካ ቀጠናዊ ኃላፊ ቲጌሬ ቻጉታ፣ “የኢትዮጵያ ወታደሮችና ፖሊሶች በአማራ ክልል የከፈቱት የዘፈቀደ እስር ዘመቻ፣ መንግሥት የሕግ የበላይነትን ሙሉ በሙሉ ችላ ማለቱን ያሳያል” ማለታቸው በመግለጫው ተጠቅሷል።

የመንግሥት ባለሥልጣናት “የስም ዝርዝር” ይዘው በአማራ ክልል በመቶዎች የሚቆጠሩ ሲቪሎችን ማሰራቸውን የዓይን እማኞች መናገራቸውን አምነስቲ ገልጿል።

ቲጌሬ ቻጉታ እንዳሉት የመንግሥት ባለሥልጣናቱ ሰዎቹን ከመያዛቸው አስቀድሞ “የእስር ማዘዣም ይሁን ፍተሻ ለማድረግ ፈቃድ አላቀረቡም”።

“የታሰሩት ሰዎች በ48 ሰዓታት ውስጥም ፍርድ ቤት አልቀረቡም” ብለዋል።
የዓይን እማኞች ለአምነስቲ እንደገለጹት፣ በአማራ ክልል በሚገኙ ዩኒቨርስቲዎች ያሉ ምሁራን ከታገቱት መካከል ይጠቀሳሉ።

“አንዳንድ እገታዎች የተፈጸሙት በወታደሮች፣ ምሽት ላይ ነው” ሲልም ሁኔታውን ገልጿል።

“የኢትዮጵያ መንግሥት ይህንን የዘፈቀደ የጅምላ እስር በአፋጣኝ ማቆም አለበት። በታሰሩት ሰዎች ላይ ሕግን ተከትሎ ክስ መመሥረትና የሕግ ሥርዓትን መከተል ይገባዋል። ካልሆነም ሰዎቹን መልቀቅ አለበት። መንግሥት የዘፈቀደ እስርን ለጭቆና ማዋል ማቆም አለበት” ሲሉም የአምነስቲ ኢንተርናሽናል የምሥራቅና ደቡብ አፍሪካ ቀጠናዊ ኃላፊ ተናግረዋል።

መልስ አስቀምጡ

Please enter your comment!
Please enter your name here