ሀሙስ ጥቅምት 28 ቀን 2017 (አዲስ ማለዳ) በአንድ ዓመት ብቻ 163 ጋዜጠኞች ከስራቸው ጋር በተያያዘ ለህልፈት መዳረጋቸውን ዩኔስኮ ነው የገለጸው፡፡
ከተገደሉት ጋዜጠኞች በተጨማሪም ከሥራቸው ጋር በተያያዘ የሚታሰሩ ጋዜጠኞች ቁጥርም እምብዛም አለመቀነሱን አስታውቋል።
በዚህ መሰረት የዛሬ አስር ዓመት 95 በመቶ የነበረው የተገደሉ ጋዜጠኞች ፍትህ ያለማግኘ ሁኔታ ከአስር ዓመት በኋላም ቢሆን በ10 በመቶ ብቻ ቀንሶ 85 በመቶ ላይ እንደሚገኝ አሳውቋል።
በጋዜጠኞች ላይ የሚደርሱ ግድያዎች፣ እስሮች እና መንገላታቶች ባለሙያዎችን ለራሳቸውና ለቤተሰቦቻቸው ደህንነት ሲሉ ከሙያው እራሳቸውን እንዲያገሉ እያደረገ መሆኑን የገለጸው ተቋሙ በዚህም ምክንያት ሙያው አስጊ ከሚባሉ የስራ መስኮች በቀዳሚነት የሚመደብ እንደሆነ አስታውቋል።
ዩኔስኮ እነዚህን ነጥቦች ያነሳው በመዲናችን አዲስ አበባ ለመጀመሪያ ጊዜ እየተካሄደ በሚገኘው ጋዜጠኞች በግጭት ቦታዎች ላይ እየገጠማቸው ያለውን የደህንነት ችግር ለመፍታት በሚመክረው 10ኛው ጉባዔው ላይ ነው፡፡



