ይህ መረጃ ከየጤና ወግ በጎ አድራጎት ድርጅት ጋር በመተባበር የቀረበ ነው
በኢትዮጵያ ተላላፊ ያልሆኑ በሽታዎች አስጊነት ከጊዜ ወደጊዜ እየጨመረ ይገኛል፡፡ ከእነዚህ ህመሞች መካከልም የስኳር ህመም ይጠቀሳል፡፡ በሀገራችን ከ1 ነጥብ 9 ሚሊዮን በላይ ሰዎች ከስኳር ህመም ጋር እንደሚኖሩ ሲገመት ከእነዚህም 50 በመቶ የሚሆኑት ህሙማን ምንም አይነት የስኳር ምርመራ ያላደረጉ በመሆናቸው የህክምና እርዳታ እያገኙ አይደለም፡፡በየአመቱ የሚከበረውን የአለም የስኳር ህመም ቀንን አስመልክቶም ከየጤና ወግ በጎ አድራጎት ድርጅት ጋር በመተባበር የተለያዩ መረጃዎችን ወደእናንተ እናደርሳለን፡፡ በዚህ ጽሁፍ ስለስኳር ህመም ምንነት እና ከነርቭ ጤንነት ጋር በተያያዘ ሊደረግ ስለሚገባው ጥንቃቄ ተጽፏል፡፡
የስኳር በሽታ አንድ ሰው በደሙ ውስጥ ያለው የስኳር (ግሉኮስ) መጠን እንዲበዛና እንደ ዓይን፣ ኩላሊት፣ ልብ፣ የደም ስርና ነርቭ ላይ ጉዳት እንዲያደርስ የሚያደርግ የበሽታ ዓይነት ነው፡፡ ለበሽታው እንደ ዋና መንስኤ የሚጠቀሱት በሰውነታችን የሚመረተው የኢንሱሊን መጠን በቂ አለመሆንና ሰውነታችን የተመረተውን ኢንሱሊን በአግባቡ መጠቀም አለመቻል ናቸው።
ኢንሱሊን ምን እንደሆነ በአጭሩ ለመግለፅ ያህል እንደ ስንዴ ዳቦ፣ ድንች፣ ስኳርነት ያላቸው መጠጦችንና ሌሎች ምግቦች በምንመገብበት ጊዜ ሰውነታችን ምግቡን ወደ ስኳር (ግሉኮስ) ይቀይረዋል፤ ይህ ስኳርም ወደ ደም ውስጥ በመግባት ወደተለያዩ የሰውነት ህዋሳት ለመድረስ ይዘጋጃል፡፡ በዚህ ጊዜ የሰውነታችን ቆሽት (pancreas) ኢንሱሊን የሚባለውን ንጥረ ነገር ያመነጫል፤ ይህ ኢንሱሊን የሰውነታችን ህዋሳት እንዲከፈቱ በመርዳት የተመረተው ግሉኮስ (ስኳር) ወደ ውስጥ እንዲገባ በማድረግ ለሀይል ምንጭ እንድንጠቀምበት ይረዳል።
ታዲያ የስኳር ታማሚዎች ከላይ በገለፅናቸው ከኢንሱሊን ጋር የተያያዙ ችግሮች በደማቸው ውስጥ ከመጠን በላይ ስኳር ይከማችና ሰውነታቸው ላይ ጉዳት ያደርሳል፡፡
የተለያዩ የስኳር በሽታ ዓይነቶች ሲኖሩ ዋነኞቹ
- አይነት አንድ
- አይነት ሁለት እና
- በእርግዝና ወቅት የሚከሰት የስኳር በሽታዎች ናቸው፡፡
አይነት አንድ የስኳር በሽታ የሚከሰተው ሰውነታችን በተለያዩ ምክንያቶች ቆሽታችንን በተለይም ኢንሱሊን የሚያመርቱ ቤታ የተሰሠኙ ህዋሳትን በሚያጠቃበት ጊዜ ነው። አብዛኛውን ጊዜ የሚከሰተው በሕጻንነትና በጉርምስና ጊዜ ሲሆን ሆኖም ግን በሌላ የእድሜ ክልል ውስጥ አይከሰትም ማለት አይደለም።
አይነት ሁለት የስኳር በሽታ በአብዛኛው የተለመደው የስኳር በሽታ አይነት ሲሆን ከቆሽት የሚመነጨው ኢንሱሊን ስራውን በሚገባ ሊሰራ ባለመቻሉ ወይም መጠኑ እጅግ በማነሱ የሚመጣ ህመም ነው፡፡
በእርግዝና ወቅት የሚከሰተው የስኳር በሽታ ደግሞ ከማርገዛቸው በፊት የስኳር በሽታ በሌለባቸው ነፍሰጡሮች ላይ የሚከሰት የስኳር በሽታ ዓይነት ነው፡፡ በእርግዝና ወቅት የሚከሰት የስኳር በሽታ ከሚያመጣቸው ችግሮች ውስጥ የተረገዘው ህፃን ኪሎ ከመጠን በላይ መሆን፣ ያለ ጊዜው መወለድና ለእናትየው ደግሞ ከእርግዝና በኋላ የአይነት ሁለት የስኳር በሽታ የመያዝ እድል መጨመር ይገኙበታል፡፡
የስኳር በሽታ ምልክቶች
የአይነት አንድና የአይነት ሁለት የስኳር በሽታ ምልክቶች በሁለቱም ላይ የሚታዩ ቢሆንም በብዛት በሚስተዋሉበት የስኳር በሽታ አይነት በሚከተለው መልኩ ሊከፈሉ ይችላሉ፡፡
የአይነት አንድ ስኳር በሽታ ምልክቶች
- ቶሎ ቶሎ የውሃ ጥማት መሰማት
- ቶሎ ቶሎ መራብ
- ቶሎ ቶሎ መሽናት (በተለይ በማታ ጊዜ)
- የክብደት መቀነስ
- የድካም ስሜት ና ሌሎችም ሲሆኑ
የአይነት ሁለት ስኳር በሽታ ምልክቶች
- የአፍና የቆዳ መድረቅ
- የቁስል ቶሎ አለመዳን
- እግርና እጅ የማቃጠልና የመደንዘዝ ስሜት ይገኙበታል፡፡
ለስኳር በሽታ አጋላጭ ሁኔታዎች
የአይነት አንድ የስኳር በሽታ በግልፅ የታወቁ አጋላጭ ሁኔታዎች ባይኖሩትም የልጅነት እድሜና በቤተሰብ የአይነት አንድ ስኳር በሽታ መኖር ለህመሙ የመጋለጥ እድልን ከፍ እንደሚያደርግ ይታመናል፡፡ የአይነት ሁለት ስኳር በሽታ አጋላጭ ሁኔታዎች የሚባሉት ደግሞ ከመጠን በላይ ውፍረት፣ የሰውነት እንቅስቃሴ አለማድረግ፣ 45 አመትና ከዚያ በላይ እድሜ እና በቤተሰብ የአይነት ሁለት ስኳር በሽታ መኖር ናቸው፡፡
ታዲያ ከላይ የጠቀስናቸውን አጋላጭ ሁኔታዎች በቀላሉ የአኗኗር ዘይቤ ለውጥ በማድረግ፣ የሰውነት ክብደትን በማስተካከልና እንቅስቃሴ በማድረግ በበሽታው የመያዝ እድላችንን መቀነስ ይቻላል፡፡ ይህ ሳይሆን ቀርቶ በበሽታው የተያዝን እንደሆነም በህክምና ባለሙያ ከታዘዙልን መድኃኒቶች በተጨማሪ የሰውነት ክብደትን በማስተካከል፣ አዘውትሮ የሰውነት እንቅስቃሴ በማድረግ፣ ትንባሆ እና አልኮል ነክ ነገሮችን ባለመጠቀም እንዲሁም እንደ መጀመሪያው ባለታሪካችን የስኳር መጠናቸው ከፍ ያሉ ምግቦችን በመቀነስና ጤናማ አመጋገብ በማዘውተር በሽታው ከሚያመጣብን አስከፊ ጉዳቶች ራስን መከላከል ይቻላል፡፡
የስኳር በሽታ ተላላፊ ካልሆኑ በሽታዎች ውስጥ የሚመደብ በሰውነታችን ውስጥ ያለው የስኳር(glucose) መጠን ከሚፈለገው በላይ ሲጨምር የሚፈጠር በሽታ ነው።
ሀገራችን ኢትዮጵያን ጨምሮ ከሰሀራ በታች ባሉ ሀገራት በስኳር ምክንያት የሚመጡ የጎንዮሽ ጉዳቶች በዋናነት ቶሎ ችግሩን ካለማወቅና መፍትሄ ካለመውሰድ የሚመጡ ናቸው።አብዛኛው ታካሚ ወደ ህክምና ተቋም የሚመጣው ከረፈደ በኋላ ነው።ይህም ከግንዛቤ እጥረት አልያም ችላ ከማለት የሚመጣ ነው።
የስኳር በሽታ ከሚያስከትላቸው ጉዳቶች ውስጥ አንዱ የእግር ቁስለት (diabetic foot ulcer) ነው። የእንድ የስኳር በሽተኛ ለዚህ ችግር የእድሜ ልክ ተጋላጭነት 25% ነው።
ይህ በሽታ ከአደጋ ውጪ ለሚፈጠር የእግር መቆረጥ ቀዳሚ ምክንያት ነው።እንዲሁም ለረጅም ግዜ በሆስፒታል መቆየትን ያስከትላል።
በስኳር ህመም ምክንያት የሚመጣ የእግር ቁስለት በሰውነታችን ያለው የስኳር መጠን ያለአግባብ በመብዛቱ ምክንያት በተለያዩ የሰውነታችን አካላት ላይ በሚያደርሰው ጉዳት የሚመጣ ለረጅም ግዜ የሚቆይ እግርን የሚያጠቃ ቁስለት ነው። እነዚህ አጋላጭ መንስኤዎችም፤
የነርቭ መጎዳት(Diabetic Neuropathy) – ይህ የነርቭ መጎዳት ችግር እንደተፈጠረ የሚያመለክቱንን ስሜቶች ማጣት ሲሆን በእኩል ደረጃ ከታችኛው የእግር ጣቶች ተነስቶ ወደ ላይ የሚሄድ በጊዜ ሂደትም እጅን የሚያጠቃ ችግር ነው።
- ከዚህ ቀደም በተመሳሳይ ችግር መጠቃት ወይም የእግር መቆረጥ
- በእግር ላይ አደጋ ማጋጠም
- ወደ እግር የሚሄድ የደም ቱቦ መጥበብን ተከትሎ የሚመጣ በቂ ደም ያለመሄድ (Peripheral arterial disease)
- የእግር ትክክለኛውን ቅርፅ ማጣት (Foot deformity)
አንድ የስኳር በሽተኛ ለዚህ በሽታ ተጋላጭ መሆኑን እንዴት ሊያውቅ ይችላል?
- ለረጅም ግዜ ከቆየ ጫና ወይም ሀይል የሚመጣ የወፈረ ቆዳ ፤ ይህ ቦታ በመሰንጠቅ ምክንያት የተለያዩ ህዋሳት በመግባት የመበከል እድል አለው።
- የእግር ትልቁ ጣት መጋጠሚያ አጥንት ቦታውን ለቆ መገፋት እና ቅርፅ ማጣት (Bunion)
- ከውጫዊ ሀይል መብዛት የሚመጣ የጣት ቅርፅ መበላሸት (Hammer toe)
- የእግር ትልቁ ጣት ጥፍር ወደ ውስጥ ማደግ
አንድ የስኳር በሽተኛ ምን አይነት ምልክቶች ሲያይ ወደ ህክምና ቦታ በአስቸኳይ መሄድ ይኖርበታል?
- እግሩ ላይ ትንሽም ሆነ ትልቅ አደጋ ሲደርስበት፦ የመቆረጥ፣ የመሰንጠቅ፣ የመመታት፣ የመጋጨት
- የህመም ስሜት ሲሰማው፦ የመጠዝጠዝ፣ የማቃጠል፣ የመደንዘዝ፣የመውጋት
በተጨማሪም ከታካሚው የሚጠበቁ እርምጃዎች
- መድሀኒትን በአግባቡ በመውሰድ የስኳር መጠንን መቆጣጠር እና የተመጣጠነ ምግብ መመገብ
- በየቀኑ የእግር ሁኔታን መከታተል፦ አለመድረቁን፣ ያልታወቀ ጉዳት አለመድረሱን
- ጠባብ ጫማዎችን ከማድረግ መቆጠብ
- በባዶ እግር አለመራመድ
- ካልሲን በንህፅና መጠቀም እና በየቀኑ መቀየር
- ሲጋራ አለማጨስ
- የእግር ጥፍሮችን በአግባቡ መቆረጥ
- ለብ ባለ ውሀ እግርን በየቀኑ መታጠብ ከዚያም በቅባት ማለስለስ
- አንዴ ከተፈጠረ ድጋሚ እንዳይፈጠር ቁስሉን በሚገባ መሸፈን ፣በየወሩ ወደ ጤና ተቋም በመሄድ ክትትል በማድረግ
በሀገራችን ኢትዮጵያ ያለው ስርጭት ቢለያይም ከ1.5% – 30% ይደርሳል። በስኳር በሽታ ምክንያት የሚመጣ የእግር ቁስለት አንዴ ከተፈጠረ ድጋሚ የመፈጠር እድሉ
- በአንድ አመት ውስጥ 40%
- በሶስት አመት 60%
- በአምስት አመት 75% ነው።
ይህ አሃዝ ልዩ ጥንቃቄ ማድረግ እንዳለብን ያሳስበናል።
ወንዝ ሲወስድ እያሳሳቀ ነው እንደሚባለው የስኳር በሽታም ሆነ በሱ ምክንያት የሚመጣው የእግር ቁስለት ያለ ሳይመስል ጉዳቱ ስር የሚሰድ ችግር ነውና ትኩረት ሊሰጠው ይገባል።



