ሕወሓት በራያ በኩል ከ23 ተሳቢ መኪና በላይ የታጠቀ ኃይሉን እያስጠጋ መሆኑ ተነገረ

0
896

ሐሙስ ሰኔ 1 ቀን 2015 (አዲስ ማለዳ) ሕወሓት በዋናነት ከባለፈው ሰኞ ዕለት ጀምሮ በራያ በኩል በኩኩስቶ እና መሆኒ ተብለው በሚጠሩ ሥፍራዎች ከፍተኛ ቁጥር ያለው የታጠቀ ኃይል እያስጠጋ መሆኑ ተገለጸ፡፡

ከሰኞ ግንቦት 28 ጀምሮ እስከ ትናንት ጠዋት ግንቦት 30 ድረስ በ23 ተሳቢ መኪና ዲሽቃ፣ ስናይፐር፣ መትረጊስ እና ክላሽ የታጠቀ ከፍተኛ ቁጥር ያለው የሕወሓት ታጣቂ ኃይል እየተጠጋ መሆኑን አዲስ ማለዳ በአካባቢው ከሚገኙ የመንግሥት የሥራ ኃላፊዎች ሰምታለች፡፡

የሕወሓት ኃይሎች በተደጋጋሚ ወደ ድንበር መጠጋት ለምን ዓላማ እንደሆነ በግልጽ የታወቀ ነገር የለም የተባለ ሲሆን፤ የሕወሓት ኃይሎች ትንኮሳ የሚያደርጉ ከሆነ የአላማጣ እና አካባቢው ሕዝብ የአፀፋ ምላሽ ለመስጠት ዝግጁ ነው ተብሏል።

የሕወሓት ታጣቂዎች በተጠጉበት አካባቢ የአገር መከላከያ ሠራዊት በመኖሩ ወደ ድንበር እየተጠጋ የነበረውን የአላማጣ እና አካባቢውን ሕዝብ የሕወሓት ኃይሎች ከድንበር አልፈው እንደማይመጡ በማሳወቅ ወጣት እና ሚሊሻዎች እንዲመለሱ መደረጉም ተጠቁሟል፡፡

የአላማጣ ከተማ ከንቲባ ኃይሉ አበራ፤ “እኛ የፕሪቶሪያውን ስምምነት ተቀብለን ተግባራዊ እያደረግን ነው፤ ከዚያ ባሻገር ችግር እንፈጥራለን ካሉ የማንታገስ መሆናችን ልናረጋግጥ እንወዳለን።” ሲሉ ለአዲስ ማለዳ ተናግረዋል፡፡

በፌዴራል መንግሥት እና ሕወሓት መካከል በፕሪቶሪያ በተደረገው የሰላም ስምምነት መሰረት የሕወሓት ኃይሎች ትጥቅ መፍታትና ወደ ማኅበረሰቡ መቀላቀል ያለባቸው ሲሆን፤ ይኼው ስምምነት ሙሉ በሙሉ ተግባራዊ አለመደረጉን ተከትሎ ታጣቂዎቹ በተለያዩ የአማራ ክልል አዋሳኝ ቦታዎች ትንኮሳ እየፈጸሙ እንዲሚገኙ ቅሬታዎች ሲቀርቡ ይስተዋላል፡፡

በቅርቡ በራያ አላማጣ የሚገኙ ስድስት ወረዳዎች የአካባቢው በጀት ወደ አማራ ክልል እንዲዞር እና ለወረዳዎች እንዲለቀቅ ፊርማ ማሰባሰብ ዘመቻ በማድረግ ለፌዴሬሽን ምክር ቤት ሊያስገቡ መሆኑን አዲስ ማለዳ መዘገቧ ይታወሳል። ሕወሓት በበኩሉ አካባቢው የትግራይ ግዛት አካል ነው በማለት በጀቱ እንዲለቀቅለት እየጠየቀ መሆኑ ተመላክቷል፡፡

የትግራይ ክልል ጊዜያዊ አስተዳደር ምክትል ፕሬዘዳንት ሌትናል ጄኔራል ጻድቃን ገብረ ትንሳኤ እንዲሁ፤ በወራሪዎች ሥር የሚገኙትን የትግራይ ህገ መንግስታዊ ግዛቶች በአጭር ጊዜ ወደ ትግራይ ክልል ለመመለሰ እየተረባረብን ነው ማለታቸው ተሰምቷል፡፡

መልስ አስቀምጡ

Please enter your comment!
Please enter your name here