አርብ ጥቅምት 29 ቀን 2017 (አዲስ ማለዳ) ባለፈው ሳምንት የኢትዮጵያ ብሄራዊ ባንክ በአገር አቀፍ ደረጃ ባንኮች
የገንዘብ ፍሰታቸውን በአግባቡ እንዲያስተዳድሩ ለማድረግ ይረዳ ዘንድ ባንኮች እርስ በእርሳቸው መበዳደር የሚችሉበትን የብድር አማራጭ ይፋ ማድረጉ ይታወሳል፡፡
በዚህም ተግባራዊ የሚሆነው አገልግሎትም የወለድ ተመን በብሔራዊ ባንኩ ፖሊሲ መሰረት የሚደረግ ሲሆን ብድሩን በአንድ ቀን ወይንም የሰባት ቀናት የመክፈያ ጊዜ መኖሩን አስታውቋል፡፡
ይሁን እንጂ ይህ ስርዓት ከወለድ ነጻ የባንክ ተቋማትን የሚያሳትፍ ግልጽ የሆነ መመሪያ አለመኖሩ በአገልግሎቱ ተጠቃሚ እንዳይሆኑ ያደርጋቸዋል የሚል ሀሳብ እየተዘዋወረ ይገኛል፡፡
ብሔራዊ ባንክ ያወጣው ባለ ሁለት ገጽ መመሪያ የብድሩን ዋና ዋና ጉዳዮችን ማለትም የመመለሻ ቀናትን፣ የወለድ መጠንን ፣ለተበዳሪ የሚያስፈልጉትን መስፈርቶች እና ሌሎች ጉዳዮችን የሚገልጽ ቢሆንም ከወለድ ነጻ አገልግሎት የሚሰጡ ባንኮች በምን መልኩ እንደሚሳተፉ እና ከመመሪያው ጋር እንደሚዋሀዱ አይገልጽም፡፡
ይህ ክፍተት በብሔራዊ ባንክ የማህበራዊ ሚዲያ ላይ እና በተለያዩ ቦታዎች ላይ ከፍተኛ ውይይት የፈጠረ ሲሆን በርካታ አስተያየት ሰጪዎች በቀረበው ጉድለት ቅር መሰኘታቸውን ገልጸዋል።
ቅሬታቸውን ካጋሩት መካከልም በኢትዮጵያ ልማት ባንክ ከወለድ ነፃ የባንክ ዳይሬክቶሬት ዳይሬክተር የሆኑት ኤሊያስ አደም “የአሁኑ መመሪያ የኢትዮጵያን ከወለድ ነፃ የሆኑ ባንኮችን ያገለለ ሲሆን ይህም በዚህ ወሳኝ የፋይናንስ ገበያ ውስጥ ያላቸውን ተሳትፎ የሚገድብ ነው” ብለዋል።
ከወለድ ነጻ ገበያ ኢስላማዊ መርሆዎችን በመከተል የሸሪዓን ህግ በጠበቀ መልኩ እና ለኢስላሚክ የፋይናንስ ተቋማት የገንዘብ አቅርቦትን በማቅረብ ረገድ ወሳኝ ሚና እንደሚጫወት አስታውሰዋል።
በመሆኑም ዳይሬክተሩ የኢትዮጵያ ብሔራዊ ባንክና የኢትዮጵያ ካፒታል ገበያ ባለሥልጣን ከወለድ ነፃ ባንኮች በገንዘብ ገበያ ላይ ውጤታማ ሥራ እንዲሠሩ የሚያስችል የቁጥጥር ማዕቀፍ ማዘጋጀት አስፈላጊ ነው ሲሉ ገልጸዋል፡፡
እንዲሁም ብሔራዊ ባንክ ጥናቱን አጠናክሮ በመቀጠል ከወለድ ነፃ ባንኮች በገንዘብ ገበያ ውስጥ እና በተፈቀደው የባንኮች የእርስ በእርስ ብድር ላይ እንዲሳተፉ የሚያመቻች መመሪያ በማውጣት የበለጠ አሳታፊ የፋይናንስ ሁኔታን መፍጠር አለበት ሲሉ አጽንኦት ሰጥተዋል።
በተጨማሪም ኢስላማዊ የገንዘብ ገበያ መመስረት በኢትዮጵያ ከወለድ ነፃ የባንክ አገልግሎት እንዲያድግ ወሳኝ በመሆኑ የኢትዮጵያ ብሔራዊ ባንክ ከወለድ ነፃ ባንኮች በወጣው መመሪያ ማለትም በባንኮች የእርስበእርስ የብድር አገልግሎት ውስጥ ሙሉ በሙሉ እንዲሳተፉ የሚያስችል መመሪያ ማውጣት አለበት ብለዋል፡፡



