አርብ ጥቅምት 29 ቀን 2017 (አዲስ ማለዳ) በቤኒሻንጉል ጉሙዝ ክልል የሚንቀሳቀሰው የቦሮ ዴሞክራሲያዊ ፓርቲ (ቦዴፓ) በሰኔ ወር አጋማሽ በክልሉ ከተደረገው ቀሪ እና ድጋሚ ምርጫ በኋላ በአባላቱ፣ በደጋፊዎቹ እና አመራሮቹ ላይ የሚደርስባቸው እስር፣ ዛቻ እና ማስፈራሪያ ቀጥሏል ብሏል።
ከክልሉ መንግስት ጋር ችግሩን ለመፍታት ያለመ ውይይት ተደርጎ የነበረ ቢሆንም በፓርቲው አባላት አና ደጋፊዎች ላይ የሚፈጸመው እስርና ወከባ ሊቆም አንዳልቻለ የፓርቲው የውጪና አለም ዓቀፍ ዘርፍ ኃላፊና የፓርላማ አባሉ መብራቱ አለሙ(ዶ/ር) ለአዲስ ማለዳ ተናግረዋል።
ለበርካታ ጊዜያት እስር ላይ የነበሩ ወደ ሃያ የሚደርሱ የፓርቲው አባላትና ደጋፊዎች ጥቅምት 28/2017 መፈታታቸውንም አያይዘው ገልጸዋል።
በአጠቃላይ በክልሉ ያለው የፖለቲካ ሁኔታ ጥሩ የሚባል እንዳልኾነ በመግለጽ ጉዳዩ አሳሳቢ ነው ብለዋል።
በዚህ ምክንያት ከመንግስት ጋር አብረን እንስራ ወይስ አንስራ የሚለውን ጉዳይ ለመወሰን የፓርቲው ማእከላዊ ኮሚቴ በቅርቡ ስብሰባ አድርጎ ውሳኔ አንደሚያሳልፍም መብራቱ (ዶ/ር) ጠቁመዋል።



