ከኦሮሚያ ክልል ምሥራቅ እና ምዕራብ ወለጋ ዞኖች ተፈናቅለው፣ በአማራ ክልል ምዕራብ ጎጃም ዞን ቡሬ ከተማ የተጠለሉ ከ4500 በላይ አባወራ ተፈናቃዮች፣ የክልሉ መንግሥት ምንም ዓይነት ዕውቅናም ሆነ ድጋፍ ስላላደረገላቸው ለከፍተኛ ችግር መጋለጣቸውን ተናገሩ።
ተፈናቃዮቹ ቀደም ሲል በምሥራቅ እና በምዕራብ ወለጋ ኑሮ መሥርተው ሲኖሩ የቆዩ ቢሆኑም፣ ኦነግ ሸኔ ማንነትን መሠረት ያደረገ ተደጋጋሚ ጥቃት ስለፈጸመባቸው ቀያቸውን በመተው ወደ ቡሬ ከተማ መፈናቀላቸው ተመላክቷል። በተለይ ካለፉት 15 ቀናት ወዲህ፣ በምሥራቅ ወለጋ ሲኖሩ የነበሩ ነዋሪዎች የሸኔን ግድያ በመሸሽና በእግር ለ5 ቀን በመጓዝ ወደ ቡሬ ከተማ ለመግባት እንደቻሉ ለአዲስ ማለዳ ገልጸዋል።
ተፈናቃዮቹ ነፍሰ ጡር እናት፣ እመጫት፣ ሕፃናትና አዛውንትን በጣውላ ርብራብ በመሸክም ረጅም በረሀ አቋርጠው፣ ረሀቡንና ጥማቱን በመቋቋም ቡሬ ከተማ እንደገቡ ተናግረዋል። በኦነግ ሸኔ ጉዳት የደረሰባቸው 10 የአማራ ተወላጆችም በሰው ሸክም መጥተው በከተማው የሕክምና መስጫ ማዕከል ዕየተረዱ እንደሚገኙ ተመላክቷል።
ከነቀምት እስከ ቡሬ ያለው መንገድ ከተዘጋ ከስምንት ወራት በላይ በመሆኑ፣ በወለጋ የሚኖሩ የአማራ ተወላጆች በከፍተኛ ሥጋት ውስጥ እንደሚገኙ አዲስ ማለዳ ከዚህ ቀደም በተደጋጋሚ መዘገቧ ይታወሳል። በቡሬ ከተማ የምትገኘው የአምስት ልጆች እናት አዲሴ አለሙ፣ የተወለደችው ምስራቅ ወለጋ ሊሙ ወረዳ፣ ልዩ ስሙ መንደር ስድስት በሚባል ቦታ ሲሆን፣ 10 የቤተሰብ አባላት ይዛ ለከፋ ችግር መጋለጧን ትናገራለች። የመጀመሪያ ልጇ 16 ዓመቱ ሲሆን፣ ወደ ግንባር ልሂድ ብሎ ከወጣ ሰባት ቀን እንደሆነው ትገልጻለች። “የሚላስ የሚቀመስ አጥተን፣ ሕፃን ልጆቼን እና ደካማ ወላጆቼን ታቅፌ ሜዳ ወድቄያለሁ” በማለት መንግሥት አስቸኳይ መፍትሔ እንዲሰጣቸው አዲሴ ተማጽናለች።
ሌላው ተፈናቃይ ቸኮል እርገጤ ይባላሉ፤ ከኪረሙ ወረዳ ከባሊ ቀበሌ ከኅዳር 12 አስከ 16 /2014 ድረሽ በእግሩ ተጉዞ ቡሬ ከተማ መግባት እንደቻሉ ይናገራሉ። ከአራት ሺሕ በላይ የሚሆኑ አባወራዎች ከወለጋ ተፈናቀለው በዚሁ ከተማ ላለፉት አምስት ወራት እየተንከራተቱ የስቃይ ኑሮ እያሳለፉ መሆኑን ጠቁመዋል።
አያይዘውም፣ ማደሪያ ቦታ በማጣታቸው ወደ መናኸሪያ በማምራት ሸራ ወጥረው ጊዜያዊ ማረፊያ ለማድረግ እንደቻሉ ተናግረዋል። በቀጣዩ ቀናት የከተማ አስተዳደሩ ስብሰባ ከጠራቸው በኋላ “ዘመድ አዝማድ ፈልጋችሁ ወደ ቀድሞው ቄያችሁ ተመለሱ፤ መንግሥት ከህወሓት ጋር የሚያደርገው ጦርነት ላይ ሙሉ ትኩረቱን በማድረጉ ምንም ልንረዳችሁ አንችልም” በማለት ሜዳ ላይ እንደበተኗቸው በሐዘን ስሜት ገልጸዋል።
ተፈናቃዮቹ ወደ ፍኖተ-ሠላም ዞን በማቅናት ችግሩን ለመናገር ቢሞክሩም፣ “ከ40 ዓመት በታች የሆናችሁ ወደ ጦር ሜዳ ሒዱ” እንደተባሉና፣ ችግራቸው ሊደመጥ እንኳን አለመቻሉ እንዳሳዘናቸው ለአዲስ ማለዳ ገልጸዋል።
ማንም ተፈናቃይ በየመንገዱ ሸራ ሠርቶ ለመኖር ቢሞክር በሕግ እንደሚጠየቅ የመንግሥት አመራሮች አስረግጠው ነግረውናል ብለዋል አስተያየት ሰጭዎቹ። መንግሥት ባለበት አገር ይሄ ኹሉ ግፍ በዜጎች ላይ መፈጸሙ እንዳሳዘናቸው የተናገሩት ተፈናቃዮቹ፣ አሁንም ተሰደው የመጡት ተፈናቃዮችንም ሆነ በወለጋ የሚኖሩ የአማራ ተወላጆችን፣ ከረሀብ እና ከሞት መንግሥት እንዲታደጋቸው ጥሪ አቅርበዋል።
አዲስ ማለዳ የተፈናቃዩችን ጥያቄ ይዛ የምዕራብ ጎጃም ዞን ዋና አሥተዳዳሪ መልካሙ ተሾመን ለማነጋገር በተደጋጋሚ ስልክ ብትደውልም፣ ስልክ ባለማንሳታቸው ምላሻቸውን ማካተት አልቻለችም።
ቅጽ 4 ቁጥር 161 ሕዳር 25 2014



