መንግሥት የሲሚንቶ ዋጋን ለማረጋጋት ከ100 ብር በላይ በመቀነስ ለገበያ ማቅረብ ጀመረ

0
879

የኢትዮጵያ ኢንዱስትሪ ግብአቶች ልማት ከንግድ እና ኢንዱስትሪ ሚኒስቴር ጋር በመተባበር በአዲስ አበባ እና በክልል ዋና ዋና ከተሞች የሲሚንቶ ዋጋ ለማረጋጋት ከአንድ መቶ ብር በላይ ቅናሽ በማድረግ ለሸማቾች ማቅረብ ጀመሩ።
በጥቅምት 7/2012 በንግድ ሚኒስቴር በተወሰነው መሰረት ግንባታ ለሚያከናውኑ እና ማስረጃ መቅረብ ለሚችሉ ነዋሪዎች የሚቀርብ ሲሆን፣ ለመንግሥት እንዲሁም ለሃይማኖት ተቋማት የተሰጠ ኮታ መኖሩም ታውቋል።
በገበያ ላይ 330 ብር የሚሸጠው የዳንጎቴ ሲሚንቶ ፋብሪካ ምርት፣ በኢንዱስትሪ ግብአቶች አቅራቢ በኩንታል በ255 ብር እንደሚቀርብ የኢንዱስትሪ ግብአቶች ልማት ድርጅት ኮምዩኒኬሽን ዳይሬክተር እመቤት ሙሉ ለአዲስ ማለዳ ተናግረዋል። በገበያ ላይ 350 ብር የሚሸጠው ደርባ ሲሚንቶ፣ በማከፋፈያዎቹ ግን በ234 ብር ከ59 ሳንቲም ቀርቧል። ፋብሪካዎቹ ለገበያ ከሚያቀርቡበት ዋጋ ቅናሽ በማድረግ ኢንዱስትሪ ግብአቶች ልማት በአዲስ አበባ ለአብነት ኮልፌ እና አቃቂ ቃሊቲ ክፍለ ከተሞች ማቅረብ መጀመሩንም እመቤት ጨምረው ገልፀዋል።
ለግለሰብ ተጠቃሚ ደንበኞች በአንድ ጊዜ 100 ኩንታል ሲሚንቶ መግዛት የሚቻል ሲሆን፣ ይህንንም ለማግኘት የይዞታ ማረጋገጫ ካርታ፣ የፀደቀ የቤት ፕላን፣ ስድስት ወር ወይም የጊዜ ገደብ ያላለፈበት የግንባታ ፈቃድ፣ የነዋሪነት መታወቂያ እና ከወረዳው ጽሕፈት ቤት የሚጻፍ የድጋፍ ደብዳቤ ማሟላት እንደሚያስፈልግ መመሪያው ይደነግጋል። ለአጥርና ለጥገና ሥራዎች በአንድ ጊዜ እስከ 50 ኩንታል መግዛት እንደሚቻልም ተገልጿል።
ምርቱን ማግኘት ለሚፈልጉ አምራች ድርጅቶችም ከፍተኛው ማግኘት የሚችሉት የሲሚንቶ መጠን ከአራት መቶ ኩንታል የማይበልጥ ሲሆን፣ ይህም በየወሩ የሚሰጥ ነው። ድርጅቶቹ ከታደሰ ንግድ ፈቃድ በተጨማሪ ፈቃዱን ከሰጠው አካል የማምረት አቅማቸውን እና ወርሃዊ የሲሚንቶ ፍጆታቸውን የሚገልፅ ደብዳቤ ማቅረብ ይጠበቅባቸዋል።
ለመንግሥት እና ለሃይማኖት ተቋማት እስከ መቶ ኩንታል የሚሰጥ ሲሆን፣ ለግለሰብ ከተቀመጡት መስፈርቶች በተጨማሪ የተቋማቱ ኀላፊዎች የፈረሙበት የግዢ ጥያቄ ደብዳቤ መቅረብ እንዳለበት ተደንግጓል።
በአገሪቱ ዉስጥ በሚታየዉ የሲሚንቶ ዋጋ ንረት ምክንያት ከሥራ የተስተጓጎለ የመንግሥትም ሆነ የግለሰብ ግንባታ ወደ ሥራ እንዲመለስ በማሰብ እና የገበያ ኢኮኖሚ ለማረጋጋት የኢንዱስትሪ ግብአት ልማት እና የንግድ እና ኢንዱስትሪ ሚኒስቴር የበኩላቸዉን እንደሚወጡ ገልፀዋል።
የሲሚንቶው ቅናሽ እስከመቼ እንደሆነ የጊዜ ገደብ አልተወሰነም። ነገር ግን የገበያውን ዋጋ ለማረጋጋት አዲስ አበባ ከሚገኙ የሽያጭ ማእከላት ባሻገር በአማራ፤ በኦሮሚያ እንዲሁም በደቡብ ክልል ለማስፋፋት እንደታሰበ እመቤት ተናግረዋል።

ቅጽ 2 ቁጥር 59 ታኅሣሥ 11 2012

መልስ አስቀምጡ

Please enter your comment!
Please enter your name here