ሐሙስ የካቲት 10 ቀን 2014 (አዲስ ማለዳ) በአዲስ አበባ በስድስት ወራት ወስጥ 74 ያህል መኪኖች መሰረቃቸው የአዲስ አበባ ፖሊስ ኮሚሽን አስታወቀ፡፡
በአንድ ወቅት ለአዲስ አበባ ከተማ ፈተና ሆኖ የቆየው የመኪና ሥርቆት ጉዳይ አሁንም መፍትሄ አልተገኘለትም ነው የተባለው፡፡
በመዲናዋ ባለፉት ስድስት ወራቶች ብቻም 74 ያህል ኪኖች መሰረቃቸውን የተናገሩት ኮማንደር ፋሲካው ፋንታ ከባለፈው ተመሳሳይ ወቅት ጋር ሲነጻጸር በሁለት ጭማሪ አሳይቷል ሲሉ ተናግረዋል፡፡
መኪኖቹ አብዛኛዎቹ የሚሰረቁት ለባለቤቱ ቅርብ በሚባሉ ሰዎች አማካኝነት እንደሆነም ነው የተነገረው፤ እንደዚሁም በሰዎቹ እንዝላልነት እና ቸልተኝነት ነው ሥርቆቱ የሚፈጸመው ሲል ፖሊስ ኮሚሽኑ ያስታወቀው፡፡
መኪና አጣቢዎችም ለመኪና ስርቆቱ ከፍተኛ አስተዋጽኦ እንደሚያደርጉ ነው የኮሚሽኑ የህዝብ ግንኙነት ዳይሬክተር ኮማንደር ፋሲካው ፋንታ የተናገሩት፡፡
የመኪና ሥርቆት ከባድ ከሚባሉ የወንጀል አይነቶች እንደሚመደብ የተናገሩት ኮማንደር ፋሲካው አሁን ባለው ነባራዊ ሁኔታ 13 ከመቶ መቀነስ ተችሏል ብለዋል፡፡
የከባድ ወንጀሎች ቁጥር የቀነሰበት ዋነኛ ምክንያት ፖሊስ እና ህብረተሰቡ ተቀናጅተው በመስራታቸው ነው መባሉን ኢትዮ ኤፍ ኤም ዘግቧል፡፡
_____________________
ትክክለኛውን የአዲስ ማለዳ ሶሻል ሚዲያ በመቀላቀል ቤተሰብ ይሁኑ
Telegram ➲ t.ly/SOXU
Facebook ➲ t.ly/flx8
YouTube ➲ t.ly/vSgS
Twitter ➲ t.ly/mxA4n



