“ወደ ትግራይ ክልል መድኃኒትና የሕክምና ግብዓቶች መድረሳቸው ተረጋግጧል”:- የአደጋ ስጋት ሥራ አመራር ኮሚሽን

0
730

አርብ የካቲት 11 ቀን 2014 (አዲስ ማለዳ) መድኃኒትና የሕክምና ግብዓቶች ወደ ትግራይ ክልል መድረሳቸው ተረጋግጧል ሲል የአደጋ ስጋት ሥራ አመራር ኮሚሽን አስታወቀ።

ወደ ክልሉ 107 ሜትሪክ ቶን ተጨማሪ መድኃኒት ለማድረስ ዝግጅት መደረጉንና የካርጎ በረራ እየተጠበቀ መሆኑም ገልጿል።

የአደጋ ስጋት ሥራ አመራር ኮሚሽን የሕዝብ ግንኙነት ዳይሬክተር ደበበ ዘውዴ እንደገለፁት፤ በሽብርተኝነት የተፈረጀው የህወሃት ቡድን በኢትዮጵያ በከፈተው ጦርነት በርካታ ወገኖች ከተለያዩ አካባቢዎች ተፈናቅለዋል። በትግራይ ክልል ያሉ ወገኖችም ድጋፍ ፈላጊ በመሆናቸው ፍቃድ ባገኙ ሰብዓዊ ድርጅቶች አማካኝነት ከጥር ወር ጀምሮ መድኃኒትና የሕክምና ቁሳቁሶች እየደረሳቸው ይገኛል።

እስካሁን ባለው ሂደት በረድዔት ሥራ የተሰማሩ ድጋፍ ሰጪ ድርጅቶች ማለትም “ኢንተርናሽናል ኮሙኒቲ ኦፍ ሬድ ክሮስ”፣ “ዎርልድ ቪዥን ኢትዮጵያ”፣ “ፕላን ኢንተርናሽናል”፣ የዓለም ጤና ድርጅት፤ “ሴቭ ዘ ቺልድረን” እና “ዩኒሴፍን” ጨምሮ ስምንት ያህል ተቋማት ወደ ትግራይ ክልል መድኃኒት ማስገባታቸው ተረጋግጧል ብለዋል።

እንደ ደበበ ገለፃ ከሆነ፤ ባለፈው ሳምንት ብቻ በ“ኢንተርናሽናል ኮሙኒቲ ኦፍ ሬድ ክሮስ”፣ “ዎርልድ ሄልዝ ኦርጋናይዜሽን”፣ “ዎርልድ ቪዥን ኢትዮጵያ” አማካኝነት 41 ሜትሪክ ቶን መድኃኒትና የሕክምና ግብዓቶች መቀሌ ደርሰዋል።

በድጋፉም ክትባትን ጨምሮ የተለያዩ መድኃኒትና ሌሎች የሕክምና ግብዓቶች ወደ ትግራይ መድረሱ ተረጋግጧል ያሉት ዳይሬክተሩ፤ ከዚህም ባሻገር የክትባትና ሌሎች የሕክምና ግብዓቶችን ጨምሮ 107 ሜትሪክ ቶን መድኃኒት ለማድረስ የካርጎ በረራ እየተጠበቀ ነው ብለዋል።

ድጋፍ አቅራቢ አካላቱ በጀትም ሆነ ሌሎች አስተዳደራዊ ነክ ነገሮችን ሲሠሩና በሥፍራው ሲንቀሳቀሱ የኢትዮጵያ መንግሥት አስፈላጊውን የጉዞና ተያያዥ ፍቃዶችን እንደሚያረጋግጥላቸው ገልጸዋል።

በዚህ ሂደት የኢትዮጵያ የአደጋ ስጋት ሥራ አመራር ኮሚሽን ከድርጅቹ ጋር በመቀናጀት ማረጋገጫ እንዲያገኙ እየሠራ መሆኑን አስረድተዋል።

አክለውም፤ የትግራይ ሕዝብ ድጋፉን እንዲያገኝ በማድረግ ረገድ በመንግሥት ደረጃ የኢትዮጵያ አደጋ ስጋት ሥራ አመራር ኮሚሽን እንዲሁም ሌሎች ሴክተር መሥሪያ ቤቶች ተቀናጅተው እየሠሩ መሆኑን አስታውቀዋል።

እንደ እርሳቸው ገለጻ፤ የኢትዮጵያ መንግሥት የየቀኑን በረራ በመፍቀድ ጭምር ኃላፊነቱን እየተወጣ ይገኛል። በዚህም 50 አጋር ድርጅቶች እስካሁን ትራንስፖርት አድርገው 509 ሚሊዮን ብር የሚያወጡ የተለያዩ ድጋፎችን እያጓጓዙ ይገኛሉ።

በተጨማሪም ምግብና ምግብ ነክ ያልሆኑ ቁሳቁሶችም በየብስ ትራንስፖርት አማካኝነት ደርሰዋል፤ ከዚህ ውጭ ምክንያቶችን በመደርደር ሥርጭት አልተደረገም የሚለው ቅሬታ ተቀባይነት እንደሌለው አስታውቀዋል ሲል ኢፕድ ዘግቧል።

መድኃኒቱ አቅርቦቱ እንዳለ ሆኖ መቀሌ ከገባ በኋላ ደግሞ ያስገባው አጋር አካል መድኃኒቱን የሚያጓጉዙበት ነዳጅ ያጣል ተብሎ አይታሰብም ያሉት ደበበ፤ ህወሃት ከኮምቦልቻ የዘረፈው ነዳጅ በእራሱ ብዙ ነው። በመሆኑም ድጋፉን ለማጓጓዝ የነዳጅ ችግር ገጥሞናል እየተባለ የሚነሳው ጉዳይ በምክንያትነት ማቅረቡ ውሃ የሚቋጥር አይደለም ብለዋል።
_____________________
ትክክለኛውን የአዲስ ማለዳ ሶሻል ሚዲያ በመቀላቀል ቤተሰብ ይሁኑ
Telegram ➲ t.ly/SOXU
Facebook ➲ t.ly/flx8
YouTube ➲ t.ly/vSgS
Twitter ➲ t.ly/mxA4n

መልስ አስቀምጡ

Please enter your comment!
Please enter your name here