በጋምቤላ የዘረፋና ውንብድና ወንጅሎች እየተበራከቱ ነው ተባለ

0
426

ሐሙስ ሰኔ 1 ቀን 2015 (አዲስ ማለዳ) በጋምቤላ ከተማ እና አካባቢው በስለት በማስፈራራት የንብረት መዝረፍ ወንጀል እየተበራከተ መምጣቱን ነዋሪዎች ለአዲስ ማለዳ ተናግረዋል።

በተለይ በከተማው መውጫ እና መግቢያ አካባቢዎች ነዋሪዎቹ በጩቤ እየተወጉ ንብረታቸውን እየተቀሙ ነው የተባለ ሲሆን፤ የዘረፋ ወንጀል ከመስፋፋቱ ጋር በተያያዘ የመንግሥት ሠራተኞች ከቤታቸው እንዳይወጡ ሆነዋል ተብሏል።

“በከተማው ቀንም ይሁን ማታ ሰው ብቻውን ለመንቀሳቀስ የማይችልበት ደረጃ ላይ ደርሷል።” ያሉት ነዋሪዎቹ፤ ከዋናው አስፓልት መንገድ ከወጡ ንብረታቸውን እንደሚነጠቁ ገልጸዋል።

ወንጀለኞች የሰዎችን ንብረት በኃይል ከመቀማት በተጨማሪ፤ ስልክ እያወራ የሚሄድን ሰው ተንቀሳቃሽ ስልክ ቀምተው በሞተር ሳይክል ከአካባቢው እንደሚሰወሩም ተመላክቷል።

የጋምቤላ ክልል በከተማዋ በተሽከርካሪ የሚፈፀም ስርቆትና ወንጀልን ለመከላከል፤ ከግንቦት 20/2015 ጀምሮ ከምሽቱ ሦስት ሰዓት እስከ ጠዋት 12 ሰዓት ድረስ ባለኹለት እግር ተሽከርካሪ ሞተር ሳይክሎች ላይ እገዳ መጣሉ ይታወሳል።

ሆኖም በሞተር ሳይክሎች ላይ የሰዓት እገዳ ከመጣል ባለፈ የሚመለከታቸው አካላት በዘራፊዎች ላይ ተገቢውን ቅጣት እና ክትትል ባለማድረጋቸው ችግሩ ሊቀረፍ አልቻለም ነው የተባለው፡፡

የጋምቤላ ክልል ፖሊስ ኮሚሽን በክልሉ እየተስፋፋ በመጣው የዝርፊያና መሰል ወንጀሎች በዋናነት ተጠቂዎቹ ሴቶችና አቅመ ደካሞች መሆናቸው በመግለፅ፤ ወንጀለኞቹ ተንቀሳቃሽ የእጅ ስልክ፣ ቦርሳ እና መሰል ንብረቶችን እየነጠቁ እና እየዘረፉ መሆናቸውን ከቀናት በፊት ባወጣው መግለጫ ጠቅሷል፡፡

የተጠቀሱት ችግሮች በጋምቤላ ከተማ እየተባባሱ በመምጣታቸው ነዋሪዎች ከቦታ ቦታ ለመንቀሳቀስ መቸገራቸውን ነው የተናገሩት።

አዲስ ማለዳ ከነዋሪዎች የቀረቡትን ቅሬታዎች አስመልክቶ ምላሽ ለማግኘት ከጋምቤላ ክልል ፖሊስ ኮሚሽን ኮሚሽነር ሰናይ አኩዎር በተደጋጋሚ ብትደውልም ስልክ ባለማንሳታቸው በቶሎ ምላሽ ለማግኘት የተደረገው ጥረት ሳይሳካ ቀርቷል፡፡

መልስ አስቀምጡ

Please enter your comment!
Please enter your name here