የመኖርያ ቤት ኪራይ ጭማሪ በመንግስት ተቆጣጣሪ በየዓመቱ እንዲሰላ የሚያደርገው አዋጅ ጸደቀ 

0
1942

የኢፌዴሪ የሕዝብ ተወካዮች ምክር ቤት ዛሬ ባካሄደው 3ኛ የሥራ ዘመን 19ኛ መደበኛ ስብሰባ የመኖሪያ ቤት ኪራይ ቁጥጥር እና አስተዳደር አዋጅን አጸደቀ። 

በዛሬው ዕለት በሦስት ድምጽ ተአቅቦ ያለተቃውሞ በአብላጫ ድምጽ የጸደቀው አዋጅ ቁጥር 1320/2016 በምክር ቤቱ የመንግስት ዋና ተጠሪ ተስፋዬ በልጂጌ ማብራሪያ ሰጥተውበታል። 

አዲስ ማለዳ ከምክር ቤቱ ባገኘችው መረጃ የመንግስት ዋና ተጠሪው በኢትዮጵያ ነባራዊ ሁኔታ የመኖሪያ ቤት አቅርቦት እና ፍላጎት የተጣጣመ እንዳልሆነ ገልጸው በዚህ ሳቢያ ምክንያታዊ እና ፍትሃዊ ያልሆነ የቤት ኪራይ ዋጋ ጭማሪዎች በአገሪቱ ይስተዋላል ብለዋል።

አዲስ ማለዳም ከሰሞኑን በዋና ከተማዋ አዲስ አበባ ያለውን ወቅታዊ የቤት ኪራይ ዋጋ መናር የተመለከቱ ቅሬታዎች ደርሷት የከተማ አስተዳደሩን ባነጋገረችበት ወቅት የኪራይ ዋጋ መጨመር እና ተከራይ ማስወጣት የሚከለክለው ደንብ ስለመቀጠሉ ውሳኔ ላይ እንዳልተደረሰ መዘገባችን አይዘነጋም። 

ተስፋዬ በልጂጌ ለምክር ቤት አባላቱ እንዳስረዱት ነባራዊ ሁኔታው እና የዜጎች እሮሮ በመኖሪያ ቤት ኪራይ ላይ የመንግስት አስተዳደራዊ ጣልቃ ገብነት አስፈላጊ በመሆኑ ይህ አዋጅ ተዘጋጅቷል። የአዋጁ ዋና ዓላማ ግልጽና ተገማች የሆነ የመኖሪያ ቤት ኪራይ አስተዳደር መዘርጋት እንዲሁም የአከራይ እና ተከራይ መብትን ሚዛናዊ ለማድረግ እንደሆነ ተገልጿል። 

ስድስት ክፍሎችና 32 አንቀጾች አሉት። በውስጡ የመኖሪያ ቤት ኪራይ ውል እና ዋጋ፣ የአስፈጻሚ አካላት ስልጣን እና ሌሎች ድንጋጌዎች እንደተካተቱበት አዲስ ማለዳ ሰምታለች። 

የመኖሪያ ቤት ኪራይ ቁጥጥር እና አስተዳደር አዋጅ ክፍል 2 አንቀጽ 8 ላይ የዋጋ ጭማሪን በተመለከተ ከዚህ በፊት አከራዮች በፍላጎታቸው የሚጨምሩትን ገንዘብ ተከራዮች በግዴታ መቀበል ቢኖርባቸውም፤ አሁን በመንግስት ተቆጣጣሪ አካል ጣልቃ ገብነት በዓመት አንድ ጊዜ የአገሪቱን ነባራዊ ሁኔታና የኢኮኖሚ ሁኔታ ታይቶ በመቶ በሚሰላ ጭማሪ ፈቃድ ብቻ የቤት ኪራይ እንደሚጨምር ተገልጿል። 

በተጨማሪም የቤት አከራዮች ቅድመ ክፍያ መጠየቅ የሚችሉት የሁለት ወር ብቻ እንዲሆን የሚደነግግ ሲሆን ተከራዮችን ለማስለቀቅም የሁለት ወራት የዝግጅት ጊዜ እንዲሰጥ ያስገድዳል። ከዚህ ባለፈም መንግስት ማግኘት ያለበትን ግብር እንዲያገኝ እንደሚያስችል የምክር አባላት ተናግረዋል። 

በአዋጁ ላያ አስተያየት የሰጡ የምክር ቤቱ አባላት አዋጁን ደግፈው ለብልሹ አሰራር ክፍት እንዳይሆን ጥብቅ ክትትል እንዲደረግ አሳስበዋል። አዋጁ በተለምዶ ለአከራዮች ሰፊ እድልና መብት የሚሰጠውን ስርዓት ለማመጣጠን ያግዛልም ተብሏል።  

አዲስ ማለዳ ከዚህ ቀደም ነዋሪዎችን እና ባለሞያዎችን በማነጋገር የመኖሪያ ቤት ኪራይ ዝቅተኛ ገቢ ያላቸው ዜጎችን በእጅጉ እያስጨነቀ የሚገኝ እና ከኑሮ ውድነት ጋር ተዳምሮ ኑሯቸውን አስከፊ እንዳደረገው በተደጋጋሚ መዘገቧ አይዘነጋም። 

ነምቤኦ (NUMBEO) የተባለ በሰርቢያ አገር መቀመጫውን ያደረገ የአገራትን የኑሮ ደረጃ የሚመዝኑ መረጃዎችን የሚያጋራ ድረ ገጽ የአገራቱን ዜጎች ገቢ እና የመኖሪያ ቤት ዋጋ ጥምርታን በማነጻጸር ባወጣው ሪፖርት ኢትዮጵያውያን ለመኖሪያ ቤት የሚያወጡት ዋጋ ከገቢያቸው ላይ 43 ነጥብ 1 በመቶ እንደሆነ ተመላክቷል። 

መልስ አስቀምጡ

Please enter your comment!
Please enter your name here