የመሬት ይዞታ የሚለቀቅበት፣ ካሳ የሚከፈልበትና ተነሺዎች መልሰው የሚቋቋሙበት አዋጅ ጸደቀ

0
290

ማክሰኞ ሰኔ 18 ቀን 2016 (አዲስ ማለዳ) የሕዝብ ተወካዮች ምክር ቤት ዛሬ ባካሄደው 34ኛ መደበኛ ስብሰባው የመሬት ይዞታ የሚለቀቅበት፣ ካሳ የሚከፈልበትና ተነሺዎች መልሰው የሚቋቋሙበትን ሁኔታ ለመወሰን የወጣ አዋጅን መርምሮ አጽድቋል።

ምክር ቤቱ ለሕዝብ ጥቅም ሲባል የመሬት ይዞታ የሚለቀቅበት፣ ካሳ የሚከፈልበትና ተነሺዎች መልሰው የሚቋቋሙበት አዋጅን በአራት ተቃውሞ፣ በስድስት ድምጸ ተዐቅቦና በአብላጫ ድምጽ ነው ማጽደቅ የቻለው።

አዋጁ የመሬት ይዞታ እንዲለቁ ለተደረጉ ባለይዞታዎች ተገቢውንና ተመጣጣኝ ካሳና የተነሺ ድጋፍ ለመክፈል ግምት ውስጥ መግባት የሚገባቸውን መሰረታዊ ጉዳዮች ለይቶ ለመወሰን እንደሚያስችል የከተማ መሰረተ ልማትና ትራንስፖርት ጉዳዮች ቋሚ ኮሚቴ አስረድቷል።

በተሻሻለው አዋጅ በፌዴራል ደረጃ በሚሰሩ ፕሮጀክቶች የካሳ ትመና ክፍያ እንዲሁም ተነሺዎችን መልሶ ለማቋቋም ስልጣንና ኃላፊነት ያለባቸውን አካላት በግልፅ ለይቶ ለመወሰን የሚያስችል ስርአት ስለመዘርጋቱም ተጠቁሟል።

አዋጁን አስመልክቶ የከተማ መሰረተ ልማትና ትራንስፖርት እንዲሁም የህግና ፍትህ ጉዳዮች ቋሚ ኮሚቴዎች ከባለድርሻ አካላት ጋር ይፋዊ የህዝብ ውይይትና አስተያየት መስጫ መድረክ ከዚህ ቀደም አካሄደዋል።

እንዲሁም ተገቢ ባልሆነ የካሳ ይገባኛል ጥያቄ በሚያነሱት የፍርድ ቤት ክርክርና የባንክ አካውንት እገዳ በፕሮጀክቶች ላይ ይደርስ የነበረውን የስራ መስተጓጎል የሚቀንስ አዋጅ እንደሆነም በቀረበው የውሳኔ ሀሳብ ተገልጿል።

የምክር ቤት አባላት በበኩላቸው፤ አዋጁ ከጸናበት ቀን በፊት ውሳኔ አግኝተው ክፍያ በመጠባበቅ ላይ ያሉት ጉዳያቸው ከአሁን በፊት በነበረው አዋጅ እንዲፈጸምላቸው እንደሚጠቅስ ገልጸው ‘ውሳኔ ያገኙ’ የሚለው ቀርቶ ከአሁን በፊት የተጀመሩ ፕሮክጅቶችና ካሳ ያልተከፈላቸው በነባሩ አዋጅ ፍጻሜ እንዲያገኙ ተብሎ ቢስተካከል የሚል አስተያየት ሰጥተዋል።

አዋጁ ልማቶች እንዳይጓተቱ እንደሚረዳም የገለጹ ሲሆን ከዚህ በፊት በክልሎች ያሉ የልማት ተነሺዎች ካሳ እንዳልተከፈላቸው ጠቅሰው፤ ጉዳዩም በአዲሱ አዋጅ በግልጽ መካተት እንደነበረበት ጠቁመዋል።

በተጨማሪም ተነሺዎች ቀድመው የመሰረቱት ማህበራዊ ህይወት ላይ ሲነሱ ከፍተኛ የሆነ የሥነ ልቦና ጉዳት ሊያስከትልባቸው እንደሚችልም በመግለጽ ከዚህ አንጻር አዋጁ በግልጽ ስነልቦናቸው እንዳይጎዳ ምን ይደረጋል? የሚለው በግልጽ ቢቀመጥ አዋጁን የበለጠ ጠንካራ ያደርገዋል ብለዋል።

እንዲሁም የካሳውን የገንዘብ ምንጭ በሚመለከት የፌደራል መንግስት ከሚደጉመው በጀትና ክልሎች ከሚያገኙት የውስጥ ገቢ እንደሚሸፈን በአዋጁ መገለጹን በማንሳት ክልሎች ወቅቱን ያገናዘበና ለካሳ ክፍያ የሚሆን ገቢ እያመነጩ ስለመሆናቸው ጥያቄ ተነስቷል።

የከተማ መሰረተ ልማትና ትራንስፖርት ጉዳዮች ቋሚ ኮሚቴ ሰብሳቢ ወ/ሮ ሸዊት ሻንካ ከምክር ቤት አባላት ለተነሱ ጥያቄዎች በሰጡት ማብራሪያ ማንኛውም ከዚህ በፊት ከካሳ ክፍያ ጋር የሚያያዙ ጉዳዮች በነባሩ አዋጅ ፍጻሜ እንደሚያገኙ መደንገጉን ተናግረዋል።

ከልካይ የአሰራር ስርዓት በአዲሱ አዋጅ የተደነገገ የለም የተባለም ሲሆን በተገቢው መንገድ በቂ ካሳ አላገኘሁም የሚል አካል በየደረጃው ካለው ፍርድ ቤት በተጨማሪ እስከ ፌደራል ሰበር ሰሚ ችሎት ድረስ መከራከርና ፍትሕ ማግኘት ይችላል ተብሏል።

መልስ አስቀምጡ

Please enter your comment!
Please enter your name here