ቅዳሜ ህዳር 07 ቀን 2017(አዲስ ማለዳ) በደቡብ ኢትዮጵያ ክልል፣ ጌዲዮ ዞን፣ ይርጋጨፌ ከተማ የሙስሊም መካነ መቃብር የተወሰነ ክፍሉ ለኮሪደር ልማት ይፈርሳል መባሉ ቅሬታ መፍጠሩን ነዋሪዎች ለቢቢሲ አስታውቀዋል፡፡
ቢላል የተባለው ይህ መካነ መቃብር የመንገድ ማስፋፊያን ጨምሮ ለሕዝብ መዝናኛ ግንባታ 15 ሜትሩ እንደሚፈልግ መነገሩም በተለይም በእስልምና እምነት ተከታዮች ዘነድ ቅሬታ መፍጠሩ ነው የተጠቆመው፡፡
መንገድ ዳር የሚገኘው ይህ መካነ መቃብር ላለፉት 50 ዓመታት አገልግሎት ሲሰጥ መቆየቱን የገለጹት ቅርታ አቅራቢዎቹ አሁን ላይ ይፈርሳል የተባለበት መንገድ አግባብነት የሌለው ነው ሲሉ ቅሬታቸውን አሰምተዋል፡፡
የይርጋጨፌ ከተማ ከንቲባ አቶ ታደለ ጥላሁን ለአምስት ጊዜ ያህል ስብሰባ አድርገው መቃብሩን ለማንሳት ስምምነት ተደርሶ እንደነበር ጠቅሰው፤ በ10 ቀናት ውስጥ አጽም ወደ ዘላቂ ማረፊያ እንዲዘዋወር መስማማታቸውን በማስታወስ አሁን እየተነሳ ያለው ቅሬታም ከምን የመጣ እንደሆነ እንደማያውቁ ገልጸዋል፡፡
የከተማው አስተዳደር እስከ እሁድ ኅዳር 8 ድረስ የመካነ መቃብር ቦታውን ለማፍረስ ዝግጅት ማጠናቀቁን መግለጹ ይታወሳል፡፡



