ቅዳሜ ህዳር 07 ቀን 2017(አዲስ ማለዳ) የኢትዮጵያ ሕዝቦች አብዮታዊ ፓርቲ (ኢሕአፓ)ን ጨምሮ ስድስት የሚሆኑ ፓርቲዎች ሕገ-ወጥ ያሉትን የኢትዮጵያ የፓለቲካ ፓርቲዎች የጋራ ምክር ቤት ጠቅላላ ጉባኤ እንደማይሳተፉ መግለጻቸው ተጠቁሟል።
ፓርቲዎቹ የጋራ ምክር ቤቱ ዛሬ ቅዳሜ ህዳር 7 እና እሁድ ህዳር 8 ቀን 2017 ለማድረግ የጠራውን ጠቅላላ ጉባኤ እንዲሁም ሰብሳቢ፣ ምክትል ሰብሳቢ እና ሥራ አስፈፃሚ ለመመርጥ ማሰቡን በመቃወም በጉባኤው እንደማይሳተፉ ገልጸዋል::
ግዜው የተጠናቀቀው የጋራ ምክር ቤቱ ምርጫ እና ጠቅላላ ጉባኤ እንዲያደርግ ከዚህ ቀደም መጠየቃቸውን ያስታወሱት ፓርቲዎቹ፤ ስብሰባ መጥራት አይችልም ብለዋል።
በዚህም መሰረት የኢትዮጵያ ሕዝቦች አብዮታዊ ፓርቲ (ኢሕአፓ)፣ የኦሮሞ ፌደራሊስት ኮንግረስ (ኦፌኮ)፣ የዎላይታ ብሔራዊ ንቅናቄ (ዎብን)፣ ህብር ኢትዮጵያ እና የኦሮሞ ነፃነት ግንባር (ህብር- ኢትዮጵያ) ሕገ-ወጥ ነው ባሉት ጠቅላላ ጉባኤ ላይ እንደማይሳተፉ መገለጻቸውን አሀዱ ዘግቧል።
በጉባኤው የሚወሰኑ ማንኛውም ውሳኔዎችንም እንደማይቀበሉም ፓርቲዎቹ ያስታወቁ ሲሆን ምክር ቤቱ ጠቅላላ ጉባኤውን ያለፈው ነሐሴ ማድረግ ቢኖርበትም፤ በበርካታ ተቃውሞ ዛሬ ቅዳሜ እና እሁድ ያደርጋል ተብሏል።



