ፍርድ ቤቱ አምስት ምስክሮች ከመጋረጃ ጀርባ ሆነው ቃላቸውን እንዲሰጡ አዘዘ

0
670

ጠቅላይ ዐቃቤ ሕግ እነ ጃዋር መሐመድ፣ በቀለ ገርባ፣ ሐምዛ አዳነ እና ሌሎች 14 ግለሰቦች በተከፈተባቸው የቅድመ ምርመራ መዝገብ በተጠረጠሩበት ወንጀል ምስክሮች ከመጋረጃ ጀርባ ሆነው ቃላቸውን እንዲሰጡ ይፈቀድልኝ ሲል የፌዴራል የመጀመሪያ ፍርድ ቤት አራዳ ምድብ አንደኛ የወንጀል ችሎትን ጠይቆ ተፈቅዶለታል። ምስክሮችን ለመጠየቅ የወጣውን አዋጅ መነሻ በማድረግም አምስት ምስክሮች ከመጋረጃ ጀርባ ሆነው ቃላቸውን እንዲሰጡ ችሎቱ ትእዛዝ ሰጥቷል።
ፍርድ ቤቱ ጠቅላይ ዐቃቤ ሕግ ለሐምሌ 30 ቀን 2012 በዚሁ ፍርድ ቤት ባስከፈተው የቀዳሚ ምርመራ መዝገብ ጃዋር መሐመድ፣ በቀለ ገርባ፣ የዓለምወርቅ አሰፋ፣ ጌቱ ተረፈ፣ ታምራት ሁሴን፣ በሽር ሁሴን፣ ሰቦቃ ሳሮ፣ ኬኔ ኡመቻ፣ ጋሪ አብደላ፣ ቦጋለ ድሪብሳ፣ ሐምዛ አዳነ፣ ሸምሰዲን ጣፋ፣ መለሰ ድሪብሳ እና ቦና የተሰኙ 14 ተጠርጣሪዎች ተካተውበታል።

ዐቃቤ ሕግ ለፍርድ ቤቱ ባቀረበው አቤቱታ መሠረት 15 ምስክሮች እንዲያስረዱ ጠይቋል። ከ15ቱ መካከል አምስቱ የምስክሮች እና የወንጀል ጠቋሚዎች ጥበቃ አዋጅ 699/2003 በተለያዩ አንቀጾች በተጠቀሰው መሠረት የምስክሮች ማንነት ሳይገለጽ፣ ሥማቸውም ሳይጠቀስ ከመጋረጃ ጀርባ ሆነው የምስክርነት ቃላቸውን እንዲሰጡም ጠይቋል።

የተጠርጣሪ ጠበቆች በበኩላቸው ዐቃቤ ሕግ ለፍርድ ቤት ያቀረበው አቤቱታ ሊደርሰን ይገባል፣ እሱን ሰምተን መልስ እንድንሰጥ ወይም መቃወሚያ እንድናቀርብ የመሰማት ሕገ መንግሥታዊ መብታችን ሊከበር ይገባል ሲሉም አመልክተዋል።

በዚህ ብይን ዐቃቤ ሕግ ከፍተኛ ፍርድ ቤት ክስ እንደሚመሠርት ለማወቅ መቻሉን፣ ይህ የቅድመ ምርመራ ችሎት በተጠርጣሪዎች ላይ ውሳኔ የማያስተላለፍ በመሆኑ አቤቱታው ለተጠርጣሪዎች ሊደርስ አይገባም የሚለውን የዐቃቤ ሕግ መቃወሚያ ተቀብሏል።

ምስክሮች ከመጋረጃ ጀርባ ሆነው ቃላቸውን ይስጡ የሚለውን የዐቃቤ ሕግ አቤቱታ ከሕገ መንግሥቱ ጋር አይጋጭም በማለት አምስቱም ምስክሮች ከመጋረጃ ጀርባ ሆነው ማንነታቸው ሳይታወቅ የምስክርነት ቃላቸውን ሊሰጡ ይገባል ብሏል። በመሆኑም ችሎቱ የሁሉንም ምስክሮች ቃል ለመቀበል ለነሐሴ 04 ቀን 2012 ተለዋጭ ቀጠሮ ሰጥቷል።

ቅጽ 2 ቁጥር 92 ነሐሴ 2 2012

መልስ አስቀምጡ

Please enter your comment!
Please enter your name here