በትግራይ ክልል በሚገኙ ዩኒቨርስቲዎች ሲማሩ የነበሩ ተማሪዎች የተገባልን ቃል ይፈጸምልን ሲሉ ጠየቁ

0
1138

በትግራይ ክልል ዩኒቨርስቲዎች ሲማሩ የነበሩ ተማሪዎች “መፍትሔ እንሻለን፤ የሳይንስና ከፍተኛ ትምህርት ሚኒስቴር የገባልንን ቃል ሊፈጽምልን ይገባል” ሲሉ ለአዲስ ማለዳ ገለጹ።
በጦርነቱ ምክንያት በትግራይ ክልል ከሚገኙ ዩኒቨርስቲዎች ትምህርታችንን አቋርጠን ጦርነቱ ከተጀመረበት ጊዜ ጀምሮ እስከ ሐምሌ 6/2013 ድረስ በሰመራ በኩል ነው የወጣነው የሚሉት ቅሬታ አቅራቢዎቹ፣ የሳይንስና ከፍተኛ ትምህርት ሚኒስቴር ‹በትግራይ ክልል በሚገኙ ዩኒቨርስቲዎች ይማሩ የነበሩ ተማሪዎች ትምህርታቸውን የሚያጠናቅቁበትን ሁኔታ በአጭር ጊዜ አመቻቻለሁ› ብሎ ቃል ቢገባልንም፣ እስካሁን ምንም አይነት መፍትሔ አላገኘንም ሲሉ ነው የገለጹት።

ተማሪዎቹ እንደተናገሩት ከሆነ፣ በሰመራ አድርገው አፋር ክልል እንደደረሱ በሳይንስና ከፍተኛ ትምህርት ሚኒስቴር ዘንድ ወደየቤተሰቦቻቸው መሔድ እንዳለባቸው፣ በአጭር ጊዜ ውስጥ ጥሪ እንደሚደረግላቸውና ተመራቂዎች በአንድ ቦታ ሁነው ምረቃ እንደሚያከናወኑ ቢነገራቸውም፣ ሦስት ወር እንዳስቆጠሩና ይህ ዘገባ እስከተዘጋጀበት ጊዜ ድረስ ትምህርታቸውን መቀጠል አንዳልቻሉ ነው የተናገሩት።

ቅሬታ አቅራቢዎቹ አያይዘውም፣ በሌሎች ዩኒቨርስቲዎች ያሉ የ2013 ተመራቂ ተማሪዎች መመረቃቸውና ገና ለምረቃ ያልደረሱት ደግሞ ትምህርታውን ለመማር እንደተጠሩ የገለጹ ሲሆን፣ በትግራይ ክልል በአራቱም ዩኒቨርስቲዎች የነበሩ ተማሪዎች ግን ይህ ዘገባ እስከተዘጋጀበት ጊዜ ድረስ የሳይንስና ከፍተኛ ሚኒስቴር ውሳኔውን ያላሳወቃቸው መሆኑን ነው።

በትግራይ ክልል በሚገኙ አራቱም ዩኒቨርስቲዎች በተመረጡ የተመራቂ ኮሚቴ ሰብሳቢ ተማሪዎች አማካይነት፣ በጉዳዩ ላይ የወላጅ ኮሚቴዎች ከሳይንስና ከፍተኛ ትምህርት ሚኒስቴር ጋር በመተባባር ተሰባስበው እንዲወያዩበት ከአዲስ አበባ ፖሊስ ኮሚሽን ባገኙት የፍቃድ ደብዳቤ መሰረት ጳጉሜ 2/2013 ውይይት እንዲካሄድ ቢያደሩጉም፣ አጥጋቢ ምላሽ አለማግኘታቸውን ነው ምንጮቻችን ያመላከቱት።

የተማሪ መማክርቶቹ በመጨረሻም ወደ ሳይንስና ከፍተኛ ትምህርት ሚኒስቴር ቢሮ ቢሔዱም፣ ለጥያቄያቸው ምላሽ ለመስጠት ፍቃደኛ የሆነ አካል እንዳላገኙ ነው መረዳት የተቻለው።
የወላጅ ኮሚቴዎች ባደረጉት ስብሰባም ሆነ በአካል ሔደን ለጥያቄያችን መልስ ማግኘት አልቻልንም የሚሉት ተማሪዎቹ፣ ጉዳዩን ለሚዲያ ለማሳወቅና ሠላማዊ ሠልፍ ለማድረግ እንደሞከሩ የገለጹ ሲሆን፣ የአዲስ አበባ ፖሊስ ኮሚሽን ሠላማዊ ሠልፉን ለማካሄድ ከልክሎናል ሲሉም ነው የጠቆሙት።

10 ሺሕ 164 ተማሪዎች ከትግራይ ክልል ከአራቱም ዩኒቨርስቲዎች ትምህርታቸውን ያቋረጡ መሆናቸውን የሳይንስና ከፍተኛ ትምህርት ሚኒስቴር ራሱ አሳውቋል የሚሉት ቅሬታ አቅራቢዎቹ፣ የእስካሁኑ የልፋት ውጤታችንን በተመለከተ ሊነገረን ሲገባ በአካል እየሔድን ስንጠይቅ እንኳን “ምን አድርጉ ነው የምትሉን፤ ዩኒቨርስቲው ይዘጋ ነው የምትሉት?” የሚል ምላሽ እንደሚሰጣቸው ነው የገለጹት።

ከትምህርት ሚኒስቴር እየተረዳነው ያለው ዝምታና ስለጉዳዩ ያለው አዝማሚያ ወደ ትግራይ ክልል እንድንመለስ መፈለግ ይመስላል የሚሉት ተማሪዎቹ፣ “ትግራይ ክልል የደረሰብንን ችግር እኛ ነን የምናውቀው፤ ታላቅ የሥነ-ልቦና ችግር ደርሶብናል፤ ተመልሰን ሔደን የመማር ሞራል የለንም” ሲሉ ነው አስተያየታቸውን ያቀረቡት።

ተማሪዎቹ አክለውም፣ ቀኑንና ዓመተ ምህረቱን ማስታወስ ባንችልም በኢትዮ-ኤርትራ ጦርነት እንዲሁም በሌሎች መሰል ችግሮች ጊዜ ለተማሪዎች ሲሰጥ እንደነበረው አይነት ትብብር ለእኛም ሠላም ባለበት ዩኒቨርስቲ በየዲፓርትመንታችን ተመድበን ትምህርታችንን የመጨረስ ዕድል ሊሰጠን ይገባል ሲሉ አሳስበዋል።

በሕይወታችን ውስጥ ድጋሚ ልናገኘው የማንችለውን ጊዜያችንን መስዋዕት እያደረግን ነው የሚሉት ተማሪዎቹ፣ እስከ መቼ ነው ጠብቁ የምንባለው? ሲሉ ነው ጥያቄያቸውን ያቀረቡት።
በወልድያ ዩኒቨርስቲ የሚገኙ በጦርነቱ ምክንያት ትምህርታቸውን ያቋረጡ ተማሪዎች በበኩላቸው፣ ሠላም ወዳለባቸው ዩኒቨርስቲዎች ገብተን እንማር ዘንድ የሚመለከተው አካል መፍትሔ ሊሰጠን ይገባል ሲሉ አሳስበዋል።
አዲስ ማለዳ ለችግሩ ማብራሪያ ለመጠየቅ ከሳይንስና ከፍተኛ ትምህርት ሚኒስቴር ሳሙኤል ኡርቃቶ (ዶ/ር) ጋር ቆይታ ያደረገች ሲሆን፣ ለጉዳዩ ማብራሪያ ለመስጠት ቀጠሮ ቢሰጡንም በወቅቱ ስልክ ባለማንሳታቸው ሐሳባቸውን ማካተት አልተቻለም።


ቅጽ 3 ቁጥር 153 መስከረም 29 2014
______________________________
ትክክለኛውን የአዲስ ማለዳ ሶሻል ሚዲያ በመቀላቀል ቤተሰብ ይሁኑ
Telegram ➲ t.ly/SOXU
Facebook ➲ t.ly/flx8
YouTube ➲ t.ly/vSgS
Twitter ➲ t.ly/mxA4n

መልስ አስቀምጡ

Please enter your comment!
Please enter your name here