ከህወሓት ወረራ ነጻ በወጡ የአማራ ክልል አካባቢዎች የወደሙ የጤና ተቋማትን አገልግሎት ለማስጀመር ጥናት እየተካሄደ መሆኑን የአማራ ክልል ጤና ጥበቃ ቢሮ ለአዲስ ማለዳ ገለጸ።
በዚህም በኹሉም አካባቢዎች ባሉ የጤና ተቋማት ምን መሣሪያ እንደወደመ እና እንደተዘረፈ፣ ተቋማቱ ምን ምን እንደሚያስፈልጋቸው አጠቃላይ ጥናት የሚያደርግ ቡድን ተሰማርቶ፣ ቡድኑ የሚያቀርበው ሪፖርት እየተጠበቀ መሆኑን ቢሮው አታውቋል።
ቡድኑ የተላከው በክልሉ ሲሆን፣ ፌዴራል መንግሥትም በክልሉ ያሉ የጤና ተቋማቱን መልሶ ለመገንባት ለሚያበረክተው ድርሻ ይህን ጥናት እየጠበቀ መሆኑ ነው የተመላከተው።
ከዚያ በፊት ግን በክልሉ በመቄት እና በንፋስ መውጫ አካባቢ ያሉ የጤና ተቋማትን አገልግሎት ለማስጀመር ቀደም ሲል በነበረው ጊዜ እንደተደረገው፣ አሁንም ጊዜያዊ ጥገና ከማድረግ እና ግብዓት ከማቅረብ በተጨማሪ የሐኪሞችን ቡድን በማሠማራት መሠረታዊ የሕክምና አገልግሎት የማስጀመር ሥራው እንደሚቀጥል ለማወቅ ተችሏል።
ቢሮው እስካሁን ከህወሓት ነጻ በወጡ የክልሉ አካባቢዎች ብቻ ባደረገው ጥናት፣ በርካታ የጤና ተቋማት መውደማቸውን አመላክቷል። በዚህም በስምንት ዞኖች እና በ 82 ወረዳዎች በርካታ የጤና ተቋማትን በህወሓት መዘረፋቸው እና መውደማቸው ተገልጿል።
በደቡብ ወሎ ዞን በ21 ወረዳዎች በተደረገ ጥናት፣ ከፍተኛ ወድመት የተመዘገበ ሲሆን፣ በዚህም 12 ሆስፒታሎች፣ 133 ጤና ጣቢያዎች፣ 521 ጤና ኬላዎች እና ሌሎች 163 የግል የጤና ተቋማት፣ ወራሪ ቡድኑ ባደረሰው ጥቃት የተነሳ አገልግሎት እንደማይሰጡ ነው የተገለጸው።
በተመሳሳይ መልኩ ሰሜን ወሎ ዞን ውስጥ የሚገኙ 16 ወረዳዎች፣ 8 ሆስፒታሎች፣ 78 ጤና ጣቢያዎች፣ 374 ጤና ኬላዎች፣ 82 የግል ጤና ተቋማት እና አንድ የደም ባንክ በደረሰባቸው ዘረፋ እና ወድመት አገልገሎት እንደማይሰጡ ተረጋግጧል።
በአጠቃላይ፣ በክልሉ ከህወሓት ነጻ በወጡ 82 ወረዳዎች በተደረገው ጥናት መሠረት፣ 40 ሆስፒታሎች፣ 453 ጤና ጣቢያዎች፣ 1850 ጤና ኬላዎች፣ 466 የግል የጤና ተቋማት እንዲሁም 4 የደም ባንኮች አገልግሎት የማይሰጡ መሆናቸው ከክልሉ ጤና ጥበቃ ቢሮ የተገኘው መረጃ ያመላክታል።
በደሴ ከተማ፣ ሰሜን ሸዋ፣ ኦሮሞ ብሔረሰብ አስተዳደር፣ ደቡብ ጎንደር እና ዋግኽምራ ብሔረሰብ አስተዳደር ዞኖችም እንዲሁ በርካታ የጤና ተቋማት በደረሰባቸው ጉዳት አገልግሎት እንደማይሰጡ ቢሮው የገለጸ ሲሆን፣ ነጻ ባልወጡ የክልሉ አካባቢዎች የሚገኙ የጤና ተቋማት ስለደረሰባቸው ጉዳት ማወቅ እንዳልተቻለ ተጠቁሟል።
በዚህም፣ አሁን ላይ እየተደረገ ያለው ጥናት ከላይ በተገለጹት በኹሉም የጤና ተቋማት፣ በእያንዳንዳቸው የደረሰውን ወድመትና መልሶ ለመገንባት የሚያስፈልገውን መሳሪያ አጠቃላይ ወጭ የሚያሳይ መሆኑን ጤና ጥበቃ ቢሮው ለአዲስ ማለዳ አስታውቋል።
ህወሓት በደረሰባቸው የክልሉ አካባቢዎች በዓለም አቀፍ ሕግ ጥቃት እንዳይደርስባቸው የተከለከሉ ተቋማትን ኹሉ በማፍረስ በአማራ ክልል ጤና ተቋማት ላይ እስካሁን ባደረሰው ጉዳትም፣ ተመላላሽ ሕክምና የሚያስፈልጋቸው ከ3.7 ሚሊዮን ዜጎች በላይ ለሕክምና ዕጦት መዳረጋቸው ተመላክቷል።
ቅጽ 4 ቁጥር 162 ታኅሣሥ 25 2014



