“ሲቄ” የሚለው የኦሮምኛ ቃል ‹አለንጋ› የሚል ትርጉም አለው። በገዳ ትውፊታዊ አስተዳደር ውስጥ በባሏ ጥቃት የደረሰባት ሚስት፣ ከሌሎች ሴቶች ጋር በመሆን ባሏ ላይ የካሣ ውሳኔ የምታሳልፍበት ስርዓት ሲቄ ይባላል።
በአገረ ፈረንሳይ በሉዊስ 14ተኛ የንግሥና ዘመን አንድ ደሀ አባት በሠረቀው ዳቦ የተነሳ በረሀብ እንዲሞት የሚል ቅጣት ተጣለበት። በፍርዱ መሠረት እስር ቤት ተወረወረ። እስር ቤት ውስጥም የምትጠይቀው የተፈቀደላት አንዷና ብቸኛ ሴት ልጁ እንድትሆን ተደረገ። ቀናት አለፉ፤ ሳምንታት ነጎዱ፤ ወራት ፣አንድ፣ ኹለት ፣ሦስት ፣ እያሉ አለፉ። ይህ ተዓምረኛ አባት ዕድሜው ከሦስት ቀን አያልፍም ተብሎ ሲጠበቅ፣ ሳይሞት አራት ወር አስቆጠረ። በዚህ ምክንያት ፣ ዳኞች እና የእስር ቤት ጠባቂዎች ተገረሙ።
ኹኔታውን ለማጣራት ሰላይ ተመደበ። ሴት ልጁ በድብቅ ታበላው እንደሆነ ክትትል ሲጀመር፣ ነገሩ ሌላ ሆኖ ተገኘ። ሴት ልጁ አባቷን በጎበኘችው ቁጥር፣ ከወለደቻት ልጅ እየነጠቀች ጡቷን እያጠባችው በሕይወት እንዳቆየችው ታወቀ። ይሄ አባት፣ እንደሕፃን የልጁን ጡት እየጠባ እስትንፋሱን ማቆየቱ ሲታወቅ፣ ዳኞቹ ስለሴት ልጁ ርህራሄ እና ደግነት በእስር ሊያቆዩት አልቻሉም። በነጻ አሰናበቱት።
ሴት እናት ናት፤ ሴት ልጅ እህትም፣ ሚስትም ናት። ሴት ልጅ ርህራሄዋ ከሰው ልጅ አእምሮ አድማስ ሺሕ ዕጥፍ ይልቃል። ሴት ልጅ የቤት ካስማ የአገር ማገር ናት። ሴት የሌለበት ቤት ባዶ ነው። የሴት ልጅ ሩህሩህ ማንነት በእናትነት ይገለጻል ። ከላይ የተገለጸው ታሪክ የሚያሳየው ይህንኑ ነው።በነገራችን ላይ ከላይ የተጻፈው እውነተኛ ታሪክ በስዕል ተስሎ በወቅቱ ወደ 30 ሚሊዮን ፓውንድ ሊሸጥ ችሏል። የሴት ልጅ ሙሉ ሰዋዊ ሰብዕና ዓለምን በዚህ መልኩ አስደምሞ እንደነበር የወቅቱ የታሪክ ጸሐፍት በታሪክ መዛግብታቸው አስቀምጠውታል።
በአገራችንም ዓውድ ሴት ልጅ የደግነት እና የአዛኝነት ተምሳሌት ነች። ሴት፣ ልጅ ከወለደች ለልጇ መኖር ግዴታዋ እስኪመስል ድረስ ማንኛውንም ዋጋ ስትከፍል ይስተዋላል። ባሏ አጠገቧ ኖረም አልኖረም ፣ የእናትንም ፣ የአባትንም ቦታ ሸፍና ልጇን ታሳድጋለች። የአእምሮ ሕመም ያለባቸው እናቶች እንኳን ፣ በየመንገዱ ሲንከራተቱ፣ ልጃቸውን በፍጹም ከጎናቸው አይነጥሉትም። ሴት ልጅ በምድር ስትኖር ኃላፊነቷን፣ የምትችለውን ብቻ ሳይሆን ፣ ከምትችለው በላይ ስለምትወጣ ዘላለማዊ ክብር ይገባታል።
ቅጽ 4 ቁጥር 162 ታኅሣሥ 25 2014


