አንድ የመሥሪያ ቦታ ለኹለት ኢንተርፕራይዞች መሰጠቱ እያወዛገበ ነው

Views: 202

በቦሌ ከፍለ ከተማ ወረዳ አንድ የአፈር መድፊያ ቦታ በማስተዳደር ሥራ ላይ የተሰማሩ ኹለት ኢንተርፕራይዞች ተመሳሳይ ቦታ ላይ ሕጋዊ ፈቃድ ይዘው መገኘታቸው ግርታ ፈጥሯል።
የእነ መስፍን ኢንተርፕራይዝ እና የተከሰተ ዮሐንስ እና ጓደኞቹ ኢንተርፕራይዝ የተባሉ በጥቃቅን እና አነስተኛ የተደራጁ ኢንተርፕራይዞች፣ በቡልቡላ አካባቢ በሚገኝ ቦታ ላይ ፈቃድ ከወረዳቸው አግኝተዋል። አንድ መኪና አንድ አፈር ደፍቶ ለመሄድ 200 ብር የሚከፍል ሲሆን፣ በቀን እስከ 4000 ብር ድረስ የሚገኝበት ሥራም ነው።

ተከስተ ዮሐንስ እና ጓደኞቹ እንደሚሉት ቦታው ተፈቅዶላቸው በአፈር ማስደፋት ሥራ ላይ ተሰማርተው በነበሩበት ጊዜ በቀን እስከ 50 ዙር በማስደፋት ራሳቸውንም ሆነ ቤተሰቦቻቸውን ያስተዳድሩበት ነበር። የእነ መስፍን ኢንተርፕራይዝ በበኩሉ ቦታ ፈልገው እንዲጠቁሙ በታዘዙት መሰረት ይህንን ቦታ መጠቆማቸውን እና ቦታው ለሌላ ሰው አለመሰጠቱ ተረጋግጦ እንዲሠሩበት ሕጋዊ ሰነድ እንደተሰጣቸውም ይናገራሉ። እናም የጊዜ ገደባቸው እስከሚያልቅ እየተገለገሉበት መሆኑን ለአዲስ ማለዳ ተናግረዋል።

የእነተከስተ ኢንተርፕራይዝም አቤቱታውን ለወረዳው ለአራት ወራት ያህል ቢያቀርብም፣ ምላሽ ያለማግኘታቸውን ይናገራሉ። ‹‹ይሀ ችግር በመፈጠሩ ምክንያት የተሰጠንን ጊዜ ሳንሠራበት እየባከነብን ነው›› ሲሉ ቅሬታቸውን ያሰማሉ።

የቦሌ ክፍለ ከተማ ወረዳ አንድ ሥራ እድል ፈጠራ እና ኢንተርፕራይዝ ልማት ጽሕፈት ቤት ኃላፊ ዳግም ጣሰው፣ ለኹለቱም ኢንተርፕራይዞች ተመሳሳይ ቦታ የመሥሪያ ፈቃድ መሰጠቱን ያምናሉ። ነገር ግን ቀድሞ የነበረው ኢንተርፕራይዝ በቦታው ላይ ተገቢውን እንቅስቃሴ እያደረገ ካልሆነ እና ወረዳው እየተሠራበት እንዳልሆነ ካረጋገጠ ለሌላ ለመስጣት እንደሚገደድ ይናገራሉ። ነገር ግን በቦታው ላይ ጥናት ተደርጎ እየተሠራበት እንዳልሆነ ከተረጋገጠ እና ለሌላ ኢንተርፕራይዞች መተላለፍ የሚኖርበት ከሆነ ቀድሞ ለነባሮቹ ማስጠንቀቂያ ሊሰጥ ይገባል ይላሉ ኃላፊው።

በተጨማሪም የወረዳው ሥራ አስሥጅ ዘቢባ ይመር እንደሚሉት፣ ወደ ኃላፊነት ከመጡ ገና ዘጠኝ ቀናቸው መሆኑን ገልፀው፤ ‹‹ወደ ኃላፊነት ከመጣሁ ይህንን ቅሬታ አቅርበው የነበረ ቢሆንም፣ ነገር ግን ቀድሞ ተሰጥቷ ቸው የነበሩት ኢንተርፕራይዞች ቦታውን ይዘው በቸልተኝነት በመቀመጣቸው ቦታውን መነጠቃቸውን ተረድቻለሁ›› ብለዋል።

ከወረዳው መሥሪያ ፈቃድ ብቻ ተቀብለው ከአካባቢ ጥበቃ ፈቃድ ባለማግኘታቸው በቀጣይ ለመጡት እንደተላለፈ ከቀድሞ አመራሮች ተገልፆላቸው እንደነበር አስታውሳለሁ ሲሉ ጠቅሰዋል።
ሊቀመንበሯ አክለውም፣ በወረዳው ላይ ችግሩ እንዲፈጠር ያደረገው በባለድርሻ አካላቱ ላይ ያለመናበብ ሊሆን እንደሚችልም ተናግረዋል። ነገር ግን እንደ ሊቀ መንበሯ ገለጻ፣ የተፈጠረውን ችግር ወረዳው ለማስተካከል እንደሚጥር እና በአጭር ጊዜ ውስጥ መፍትሄ እንደሚሰጣቸው ለአዲስ ማለዳ ተናግረዋል።

የቦሌ ክፍለ ከተማ ዋና ሥራ አስፈፃሚ ጥላሁን ፈቃዱ፣ እንደዚህ ዓይነት ችግሮች እንደሚያጋጥሙ በመግለጽ፣ ነገር ግን ስለጉዳዩ መረጃ እንደሌላቸው ተናግረዋል።

ቅጽ 2 ቁጥር 66 ጥር 30 2012

Comments: 0

Your email address will not be published. Required fields are marked with *

This site is protected by wp-copyrightpro.com