የትራንስፖርት እና ሎጂስቲክስ ሚኒስቴር ከአጋር ተቋማት ጋር በጋራ በመሆን የአውቶሞቲቭ ፖሊሲ እያዘጋጀ መሆኑን አስታወቀ።
የትራንስፖርት እና ሎጂስቲክስ ሚኒስቴር ከአጋር ተቋማት ጋር በጋራ ያዘጋጀው የአውቶሞቲቭ ፖሊሲውን ረቂቅ በማጠናቀቅ ላይ መሆኑን ሚኒስትሯ ዳግማዊት ሞገስ ገልጸዋል።
የፖሊሲውን መዘጋጀት የገለጹት ሚኒስተሯ፣ የፖሊሲ ረቂቁ የተዘጋጀው፣ የአውቶሞቲቭ ዘርፉ እየሠፋ መምጣቱን ተከትሎ በፖሊሲ የተደገፈ አሠራር መዘርጋት በማስፈለጉ ነው ብለዋል። በረቂቅ ደረጃ ላይ የሚገኘው የአውቶሞቲቭ ፖሊሲ፣ የዘርፉን አሠራር እና ዕድገት በፖሊሲ የተደገፈ ከማድረጉ በተጨማሪ፣ መንግሥት በአውቶሞቲቭ ዘርፉ የተሠማራውን የግሉን ዘርፍ የሚደግፍበትን አሠራር ለመፍጠር ያግዛል ተብሎለታል።
በዝግጅት ላይ የሚገኘው ፖሊሲ ሲጸድቅ የአውቶሞቲቭ ዘርፉ ተጠናክሮ እንዲቀጥል የራሱ ሚና እንደሚኖረው ተጠቁሟል። መንግሥትም የግሉ ዘርፍ በአውቶሞቲቭ ዘርፉ ከዚህ በላይ እንዲጠናከር ዕገዛ እንደሚያደርግ ሚኒስትሯ ጠቁመዋል።
የአውቶሞቲቭ ፖሊሲውን ከትራንስፖርትና ሎጅስቲክስ ሚኒስቴር ጋር በጋራ በማዘጋጀት ላይ ከሚገኙት ተቋማት መካከል የውኃ እና ኢነርጅ ሚኒስቴር፣ የኢንዱስትሪ ሚኒስቴር እና የኢትዮጵያ ኢንቨስትመንት ኮሚሽን ይገኙበታል ተብሏል።
ሚኒስትሯ የአውቶሞቲቭ ፖሊሲ ዝግጅት ላይ መሆኑን የገለጹት፣ ማራቶችን ሞተርስ ኢንጅነሪንግ ኃላፊነቱ የተወሰነ የግል ማኅበር ታኅሳስ 19/2014፣ በኢትዮጵያ የመጀመሪያውን የኤሌክትሪክ መኪና ባትሪ መሙያ (ቻርጂንግ ስቴሽን) ባስመረቀበት መድረክ ላይ ነው። ማራቶን ሞተርስ የኤሌክትሪክ መኪና ባትሪ መሙያ (ቻርጅንግ ስቴሽን) እና ኹለተኛውን በኢትዮጵያ የተገጣጠመ “ሐዩንዳይ ኮና” የተሰኘ አዲስ የኤሌክትሪክ መኪና ሞዴል አስመርቋል።
የትራንስፖርት እና ሎጂስቲክስ ሚኒስቴር በመኪና መገጣጠሚያ ኢንዱስትሪ ዘርፍ ላይ የተሠማሩ ድርጅቶች ውጤታማ ሥራ እንዲያከናውኑ በጋራ እየሠራ መሆኑንም ሚኒስተሯ ገልጸዋል። ሚኒስትሯ በዘርፉ ከተሠማሩ ድርጅቶች ጋር በየጊዜው እየተገናኙ የድጋፍ ሥራዎችን እንደሚሠሩም ጠቁመዋል።
በዚህም በተሸከርካሪ መገጣጠሚያ ኢንዱስትሪ ዘርፍ ለተሰማሩ ድርጅቶች መንግሥት ድጋፍ የሚያደርገበትን ሁኔታ ለማመቻቸትና ኢንዱስትሪዎቹ ከመንግሥት የሚፈልጉትን ድጋፍ ለማቅረብ የሚያስችል ሠነድ እየተዘጋጀ መሆኑ ተመላክቷል። በዘርፉ የተሠማሩ ድርጅቶች መንግሥት እንዲያደርግላቸው የሚፈልጉትን ድጋፍና ጥያቄ ተቀብሎ አስፈላጊውን ትብብር እንደሚያደርግም ሚኒስትሯ ተናግረዋል።
በኤሌክትሪክ የሚሠሩ ተሽከርካሪዎችን መጠቀም ከብክለት ነጻ የሆነ አካባቢን ከመፍጠር እና ኢትዮጵያ በታዳሽ ኃይል ያላትን ዕምቅ አቅም በሥራ ላይ ከማዋል አንፃር ጉልህ ድርሻ እንዳለው ሚኒስትሯ ገልጸው፣ ለነዳጅ የሚወጣውን ከፍተኛ የዉጭ ምንዛሬ ወጪን በመቀነስ ዘርፈ ብዙ ጠቀሜታ የሚኖረው በመሆኑ መንግሥት በተቻለ መጠን ለመደገፍ ዝግጁ መሆኑን በምረቃው ወቅት አረጋግጠዋል።
በኢትዮጵያ የመጀመሪያ የሆነው ብሔራዊ የትራንስፖርት ፖሊሲና ብሔራዊ የሎጅስቲክ ዘርፍ ፖሊሲ ባለፈው ዓመት መጽደቁ የሚታወስ ነው። የጸደቀው ብሔራዊ የትራንሰፖርት ፖሊሲ እና ብሔራዊ የሎጅስቲክ ዘርፍ ፖሊሲ በቀጣይ ኢትዮጵያ የምትመራበትን የትራንስፖርት ፖሊሲ አቅጣጫ እንደሚያመላክት እና በዘርፉ ሥር ላሉ ንዑስ የትራንስፖርት ዘርፎች ዋና የፖሊሲ መነሻ ሆኖ እንደሚያገለግል መገለጹ የሚታወስ ነው።
በኢትዮጵያ በአውቶሞቲቭ ዘርፍ የተሠማሩ የተሸከርካሪ መገጣጣሚያ ፋብሪካዎች ከጊዜ ወደ ጊዜ እያደጉ መጥተዋል። ወደ ሥራ ከገቡት በተጨማሪ በግንባታ ላይ የሚገኙ የተሽከርካሪ መገጣጠሚያ ፋብሪካዎችም አሉ።
ቅጽ 4 ቁጥር 165 ታኅሣሥ 23 2014



