በአዲስ አበባ ከተማ የኤሌክትሪክ አውቶቡስን ሥራ ላይ ለማዋል ፋይናንስ እየተፈለገ ነው

0
450

በአዲስ አበባ ከተማ ውስጥ የኤሌክትሪክ አውቶቡስን ሥራ ላይ ለማዋል ፋይናንስ የማፈላለግ ሥራ እየተሠራ እንደሚገኝ በአዲስ አበባ ከተማ አስተዳደር የትራንስፖርት ቢሮ ማስታወቁ ተዘግቧል። ትራንስፖርት ቢሮው፣ በውጭና አገር ውስጥ ከሚገኙ የሚመለከታቸው አካላት ለአውቶቡስ ግዥ የሚውል ፋይናንስ የማፈላለግ ሥራ እየሠራ ነውም ተብሏል።
የኤሌክትሪክ አገልግሎት የሚሠጡት አውቶቡሶች ሌሊት ባትሪያቸውን ሞልተው (ቻርጅ አድርገው) ቀኑን በሙሉ ያለምንም የጊዜ ብክነት አገልግሎት እንዲሰጡ ይረዳል ነው የተባለው። አውቶቡሶቹ የሙከራ ትግበራ የሚደረግባቸው በሸገር እና አንበሳ አውቶቡሶች ሲሆን፣ ከሸጎሌ ዴፖ ቅርበት ያላቸው አራት ኮሪደሮች ልየታ መከናዎኑ ተዘግቧል።
የመጀመሪያው ኮሪደር ከአዲሱ ገበያ እስከ ቄራ ሲሆን፣ ኹለተኛው ኮሪደር መነሻውን ዊንጌት አድርጎ መዳረሻው አየር ጤና እንደሚሆን ነው የተነገረው። ሦስተኛው ኮሪደር ከለገሃር ተነስቶ መዳረሻው ድል በር ሲሆን፣ አራተኛው ኮሪደር ደግሞ ከአውቶቡስ ተራ እስከ አስኮ ይሆናል ተብሏል።
ከዴፖው ያላቸው ርቀት፣ ‹‹ከBRT›› ኮሪደሮች ጋር ያላቸው ትስስር እና ገበያ አካባቢዎች መሆናቸው ለኮሪደሮች የሙከራ ትግበራ መመረጥ እንደመስፈርት መቀመጡም ተጠቁሟል። በቀጣይ በከተማዋ ሌሎች ተጨማሪ ኮሪደሮችን በማጥናት የተደራሽነት አድማሱን የማስፋት ሥራ የሚከናወን መሆኑ ተብራርቷል።


ቅጽ 4 ቁጥር 169 ጥር 21 2014

መልስ አስቀምጡ

Please enter your comment!
Please enter your name here